जानकी मेडिकल कलेजमा आकस्मिकबाहेकका सेवा ठप्प

A+ A A-

जानकी मेडिकल शिक्षण अस्पतालमा आकस्मिकबाहेक सबै सेवा ठप्प गरिएको छ । विगतमा अस्पताल प्रशासनसँग भएको सम्झौतासहित विभिन्न माग राख्दै लगातार १३ दिनदेखि कर्मचारी धर्नामा बसेका छन् ।

६ वर्षदेखि बाँकी रहेको सञ्चयकोष, दसैँखर्च, नियमित तलबभत्तालगयातका माग राख्दै कर्मचारी धर्नामा बसेका हुन् । १५ भदौदेखि अस्पतालमा तालाबन्दी गरी कर्मचारी आन्दोलित भएका थिए । तालबन्दीविरुद्ध अस्पताल प्रशासनले जिल्ला प्रहरी कार्यालय धनुषामा उजुरी दिएपछि प्रहरीले दुवै पक्षलाइ छलफलमा बोलाएको थियो । त्यसपछि ३१ भदौमा दुवैपक्षबीच ४ असोजमा हरहिसाब गर्ने, १ असोजदेखि कलेजको सम्पूर्ण तालबन्दी खोली सेवा सुचारु गर्नेगरी तीन बुँदे सहमति गरिएको थियो ।

तर, सहमति कार्यान्वयन नगरी थप स्पष्टीकरण सोधेपछि १२ असोजदेखि आकास्मिकबाहेक सबै सेवा बन्द गरी धर्नामा बस्दै आएको कर्मचारी हकहित संरक्षण संघर्ष समितिका संयोजक उमेश यादवले बताए । सहमति कार्यान्वयन गर्नुको साटो विनाकारण स्पष्टीकरण सोध्ने कार्य गरिएको र पूर्वाग्रही भएर कर्मचारीलाई दुःख दिएको अर्का कर्मचारी विरेन्द्रकुमार झाको गुनासो छ ।

तर, विगतदेखि संघर्ष समितिका संयोजक यादवले विभिन्न बहानामा अस्पतालको सेवा ठप्प गरी आन्दोलन गर्दै आएकाले उनलाई स्पष्टीकरण सोधिएको कलेजका वरिष्ठ प्रशासन अधिकृत दयानन्द झाले बताए । कलेजका संचालक समितिका अध्यक्ष ओपी पाण्डे आए मात्रै आन्दोलनरत कर्मचारीको समस्या समाधान गरिने उनको भनाइ छ ।

प्रकाशित मिति: शनिबार, असोज २४, २०७७ १७:२८