दसैँको टीका नजिकियो : अग्रिम टिकट बुकिङ अन्योल, नयाँ नोटको छैन टुंगो

A+ A A-

गत वर्ष विजयादशमीको १६ दिनअघि सार्वजनिक यातायातको अग्रिम टिकट खुला गरिएको थियो । त्यस्तै, ११ दिनअघि नयाँ नोट साट्न सुरु भएको थियो ।

यस वर्षको विजयादशमी आउन १७ दिन बाँकी छ । न नयाँ नोट वितरण गर्ने टुंगो छ न दसैँका लागि अग्रिम टिकट खुला गर्ने निश्‍चित छ ।

कोरोना भाइरस महामारीकै कारण राष्ट्र बैंकले नयाँ नोट वितरण गर्ने/नगर्ने निर्णय लिन सकेको छैन भने यातायात व्यवस्था विभाग र यातायात व्यवसायी पनि टिकट बुकिङ खुला गर्ने/नगर्नेमा अनिर्णित छन् ।

नेपाल राष्ट्र बैंकले दसैँमा वितरण गर्नको लागि मात्रै करिब ३५ देखि ४० अर्ब नयाँ र सुकिला नोट बजारमा पठाउने गर्छ । आव २०७४ र ०७५ मा नेपाल राष्ट्र बैंकले प्रतिव्यक्ति २७ हजारका दरले ५, १०, २०, ५० र सयका नोट साट्ने सुविधा दिएको थियो । आव २०७६ मा प्रतिव्यक्ति १८ हजार ५ सय रुपैयाँ वितरण गर्ने सुविधा दिएकाे थियाे ।

राष्ट्र बैंकले यो वर्ष नयाँ नोट साट्ने नसाट्ने भन्ने निर्णय लिन सकेको छैन । अहिलेसम्म औपचारिक निर्णय नगरे पनि यथास्थितिमा लाइन लागेर नयाँ नोट वितरण गर्ने अवस्था नरहेको बताउँछन् राष्ट्र बैंकका निर्देशक नारायण पोखरेल ।

'विगत वर्षहरूको तुलनामा दसैँको नयाँ नोट वितरण गर्ने समय भयो । अहिलेको परिस्थिति लाइन लागेर नयाँ नोट वितरण गर्ने छैन । तथापि, राष्ट्र बैंकले आधिकारिक निर्णय अझै लिइसकेको छैन,' पोखरेलले भने ।

राष्ट्र बैंकका प्रवक्ता गुणाकरण भट्ट पनि आगामी आइतबार वा सोमबार बैंकको बैठकपछि मात्रै निर्णय लिइने जानकारी गराएका छन् । यद्यपि, बैंकमा अहिले लाइन लगाएर पैसा वितरण गर्ने योजनामा नरहेको राष्ट्र बैंकका अधिकारी रहेका छन् ।

वाणिज्य बैंकहरूमा नयाँ नोट उपलब्ध गराएर खाता भएको बैंकबाट मात्रै निश्‍चित रकम दिन सकिने व्यवस्था गर्न सक्ने राष्ट्र बैंक स्रोत बताउँछ ।

दसैँ सुरु हुन ७ दिन मात्रै बाँकी रहँदा यातायात व्यवस्था विभागले अग्रिम टिकट खुला गर्न सकेको छैन । कहिलेदेखि अग्रिम टिकट दिने भन्ने निर्णय लिन पनि विभागले सकेको छैन ।

शुक्रबार मात्रै यातायात व्यवस्था विभागका महानिर्देशक गोगनबहादुर हमालले अग्रिम टिकका विषयमा छलफल गर्न यातायात व्यवसायी बोलाएका थिए । तर, एक सातापछिको अवस्था हेरेर मात्रै निर्णय लिने निष्कर्ष बैठकले निकाल्यो ।

अहिलेको पनि घरमा जानेहरूको आउजाउ गर्नेको अवस्था कम देखिएको कारणले अग्रिम टिकट बुकिङ खुला गर्ने कि नगर्ने निर्णय लिन समस्या भएको बताउँछन् नेपाल यातायात राष्ट्रिय व्यवसायी महासंघका अध्यक्ष योगेन्द्र कर्मचार्य । सरकारले अहिले सार्वजनिक यातायता ५० प्रतिशतसम्म भाडा बढाउन पाउने तर ५० प्रतिशत मात्रै यात्रु राख्ने गरी खुला गरेको छ ।

अध्यक्ष कर्मचार्यका अनुसार अहिले लामो दूरीका ५० प्रतिशत मात्रै सार्वजनिक बस सञ्चालन छन् । ५० प्रतिशत यात्रु पनि पूरा भएका छैनन् । सरकारले नै औपचारिक रूपमा आउजाउ नगर्नू भनेको कारण पनि यात्रा गर्ने कम भएको उनको बुझाइ रहेको छ ।

'कोरोनाको संक्रमण बढेको छ, सरकारले सार्वजनिक रूपमा यात्रा नगर पनि भनेको अवस्था यात्रु नै पाइएको छैन,' कर्मचार्यले भने, 'असोज १/२ गते तिर यात्रु पाइन्छन् जस्तो लागेको थियो । अहिले चलेकै गाडीले पनि ५० प्रतिशत यात्रु पूरा गर्न सकेका छैनन् ।'

सार्वजनिक बसमा यात्रुको अवस्था, फोटो : सुशील श्रेष्ठ

यो वर्ष सार्वजनिक यातायातमा यात्रा गर्नको लागि समस्या पर्ने र टिकट बुकिङ पनि खुला नगरेको अवस्थामा इजी ट्क्सी नेपालले १५ असोजमा नै बुकिङ खुल्ला गरेको थियो ।

ट्याक्सीमा परिवार मात्रै जानुपर्ने र कन्ट्रयाक ट्रेसिङमा नपर्ने भएकोले पनि सहज हुने अनुमान इजी ट्याक्सी नेपालको थियो । तर, अपेक्षित बुकिङ नभएको बताउँछन्, अध्यक्ष सञ्जीत पौडेल । 'हामीले पहिलोपटक अनलाइनबाट नै लामो दूरीमा समेत ट्याक्सीको बुकिङ खुला गरेका थियौँ । अहिलेसम्म ३ हजार ३५ सय बुकिङ होला भन्ने अपेक्षा थियो सात सय पनि भएको छैन,' पौडेलले भने ।

कोरोनाको संक्रमण बढ्दै गएको र सरकारले सकेसम्म नहिँड्नका लागि आग्रह गरहेको अवस्थामा सर्वसाधरण अन्योलमा देखिएका छन् । शहरभित्र घट्दो आयमा बढ्दो मूल्यवृद्धि, गाउँ जानको लागि यातायातको समस्या र कोरोनाको त्रासले सर्वसाधरण अन्योलमा देखिन्छन् ।

प्रकाशित मिति: शुक्रबार, असोज २३, २०७७ १७:०३