थ्रिडी भर्चुवल टुर गाईड एप्लिकेसन निर्माण : अख्तियारमा पुगे विवादस्पद कागजात

थ्रिडी भर्चुवल टुर गाईड एप्लिकेसन निर्माण : अख्तियारमा पुगे विवादस्पद कागजात

A+ A A-

आन्तारिक एवं बाह्य पर्यटकलाई लक्षित गर्ने उद्देश्यले लुम्बिनी प्रदेशका प्रमुख पर्यटकीय स्थल, धार्मिक, ऐतिहासिक एवं हाेटेल र यातायात क्षेत्रलाई समेट्ने भन्दै उद्योग पर्यटन वन तथा वातावरण मन्त्रालय लुम्बिनी प्रदेशले थ्रिडी भर्चुवल टुर गाईड एप्लिकेसन निर्माण गर्ने योजना बनायो ।

सोही प्रयोजनका लागि माघ २०७६ सूचना जारी गरेको मन्त्रालयले उक्त एप्लिकेसन निर्माणका लागि १० वैशाख २०७७ मा एप्लिकेसन निर्माणकर्ता पिकासो डेभलपर्स सट्याक जेभीसँग सम्झौता भयो । असार मसान्तसम्म सक्ने योजनाका साथ निर्माणको सम्झौता गरिएको थियो ।

लकडाउनका बीच हतारहतार सम्झौता गरेर कार्यसम्पादनमा लागे पनि अन्ततः असारसम्म एप्लिकेसनको काम पूर्ण भएन । कार्य सम्पादन गर्ने सम्झौता अवधि सकिए पनि मन्त्रालयले उक्त एप्लिकेसन बनाउनेलाई ७५ लाख भुक्तानी दियो ।

काम नै सम्पन्न नगरी ७५ लाख रुपैयाँ भुक्तानी दिएपछि अहिले मन्त्रालयका विवादस्पद कागजात अख्तियार बुटवलको नियन्त्रणमा छन् । अख्तियार बुटवलका सूचना अधिकारी सुरेश भुसालले मन्त्रालयले आवश्यक सम्पूर्ण कागजपत्र ल्याएर अहिले अनुसन्धान भइरहेको बताए ।

डेमो देखाएकै भरमा पटकपटक गरेर भुत्तानी दिइयो

उद्योग पर्यटन वन तथा वातावरण मन्त्रालय लुम्बिनी प्रदेश बुटवलमा एप्लिकेसन निर्माणकर्ताले गत २९ असारमा मन्त्रालयमा थ्रि डि डेमो गरे । भिडियोसहित सम्पूर्ण ऐतिहासिक, धार्मिक एवं पर्यटकीय स्थलहरूको थ्रि डि राखिने भनेर डेमो मन्त्रालयमा देखाइएको थियो । त्यो बेला बुद्धसँग सम्वन्धीत लुम्बिनी, रामग्राम र तौलिहवाका केही स्थानका ड्रोनले खिचेका फुटेजहरू समावेश गरिएको थियो ।

उक्त भिडियो खिच्ने एक जनालाई २० हजार मात्र रुपैयाँ दिएर निर्माण कम्पनीले ड्रोन भिडियो खिचाएको थियो । तर, लकडाउनका बीचमा सम्झौता गरेर लकडाउनमै कार्य सम्पादन सकिने अवस्था नहुँदासमेत मन्त्रालयबाट भने डेमो देखाएकै भरमा एप्लिकेसन निर्माणकर्ता पिकासो ईन्फो डेभलपर्स सट्याक जेभीलाई पटकपटक भुक्तानी दिइएको छ ।

मन्त्रालयको लेखा शाखाका अनुसार असार ३० गते ५२ लाख २२ हजार ५ सय ६५ त्यस्तै अर्को पटक २२ लाख ३८ हजार २ सय ४२ रुपैयाँ लगेको छ । मन्त्रालयका लेखा अधिकृत मुकुन्दप्रसाद पराजुलीले माथीबाटै टोक र टिप्पणी आएपछि आफूले भुक्तानी दिइएको बताए ।

कर्मचारीलाई ६० प्रतिशत दिने योजना

देश कोरोना संकटमा जुधिरहेका बेला हतारहतारमा बजेट सक्नका लागि निर्माण गर्न थालिएको एप्लिकेसनबाट मन्त्रालयकै कर्मचारीलाई ६० प्रतिशत कमिसन दिने भएपछि भुक्तानी दिइएको स्रोतले बताएको छ ।

४० प्रतिशत एप्लिकेसन बनाउने पिकासो ईन्फो डेभलपर्स सट्याक जेभी र ६० प्रतिशत त्यहाँका कर्मचारीलाई दिने गरी भुक्तानी दिइएको स्रोतले बताएको छ । यसमा मन्त्रालयका तत्कालीन सचिव राधा वाग्ले, योजना शाखा प्रमुख शिवकुमार केसीको प्रत्यक्ष संलग्न देखिन्छ ।

हालसम्म पनि उक्त एप्लिकेसन गुगो प्ले स्टोरमा आउन सकेको छैन । योजना शाखा प्रमुख शिवबहादुर केसीले भने गुगलसँग डलर तिरेर ‘स्पेस’ लिनुपर्ने भएकोले ढिलाई भएको बताए ।

प्रकाशित मिति: शुक्रबार, असोज २३, २०७७ १४:३३