कति बने स्कुल र स्वास्थ्य संस्था ?

A+ A A-

भूकम्पले क्षतिग्रस्त संरचना अझै पुनर्निर्माणका क्रममा छन् । कतिपय ठाउँमा पुनर्निर्माण सकिनै लागेको छ भने कतिपय संरचनाको पुनर्निर्माण सुरु भएको छ ।

भूकम्पले निजी आवास, शैक्षिक संस्था, स्वास्थ्य संस्था, पुरातात्त्विक सम्पदा, सुरक्षा निकायका भवन, सरकारी भवन, सडक, खानेपानी जस्ता संरचनालाई क्षति पु-याएको थियो । पुनर्निर्माण प्राधिकरणका अनुसार भूकम्पले क्षति पु-याएका संरचनाको पुनर्निर्माण तीव्र गतिमा भएको छ ।

शैक्षिक संस्था

भूकम्पले क्षतिग्रस्त भएका शैक्षिक संस्थाका केही संरचना पुनर्निर्माण भइसकेका छन् । केही पुनर्निर्माणको क्रममा छन् ।

भूकम्पबाट क्षतिग्रस्त विद्यालयको ८३ प्रतिशत काम सम्पन्न भइसकेको छ ।

७ हजार ५ सय ५५ शैक्षिक संस्थामा क्षति भएको थियो । जसमध्ये ४ हजार १ सय ७२ शैक्षिक संस्थाको पुनर्निर्माण सम्पन्न भइसकेको छ भने २ हजार ५ सय ६ वटा पुनर्निर्माणको क्रममा रहेको प्राधिकरणले जनाएको छ ।

स्वास्थ्य संस्था

क्षतिग्रस्त स्वास्थ्य संस्थाका संरचनामध्ये ६६ प्रतिशतको पुनर्निर्माण सम्पन्न भएको छ । १ हजार १ सय ९७ स्वास्थ्य संरचनामध्ये ५ सय ४४ संरचनामा सामान्य क्षति पुगेको थियो । यस्तै, ६ सय ५३ संरचनालाई प्रबलीकरणको आवश्यकता थियो । पुनर्निर्माण गर्नुपर्ने ५ सय ४४ संरचनामध्ये ३ सय १२ वटाको पुनर्निर्माण सम्पन्न भएको छ भने ५१ वटा पुनर्निर्माणको क्रममा छन् ।

प्रबलीकरण गर्नुपर्ने ६ सय ५३ संरचनामध्ये ३ सय ३१ संरचना निर्माण सम्पन्न भइसकेका छन् भने ९४ संरचना प्रबलीकरणको क्रममा छन् ।

सांस्कृतिक सम्पदा

पुरातात्त्विक महत्त्वको सांस्कृतिक सम्पदा पुनर्निर्माणको काम ५९ प्रतिशत छ । क्षतिग्रस्त ७ सय ५३ सांस्कृतिक सम्पदाका भौतिक संरचनामध्ये २ सय २४ वटा अर्थात् ३० प्रतिशत पुनर्निर्माण सम्पन्न भएको छ । त्यस्तै, २१२ वटा अर्थात् २९ प्रतिशत पुनर्निर्माणको क्रममा छन् ।

सरकारी भवन

क्षतिग्रस्त ४ सय १५ सरकारी भवनमध्ये १ सय ६२ मा सामान्य क्षति भएको थियो । त्यस्तै, २ सय ५३ भवनलाई प्रबीलकरण गर्नुपर्ने थियो । जसमध्ये १६ वटा संरचनाको प्रबलीकरण सकिएको छ भने १ सय २६ वटा संरचना निर्माणको क्रममा छन् ।
प्रबलीकरण गर्नुपर्ने संरचनामध्ये २ सय ३२ संरचना निर्माण सम्पन्न भएका छन् भने १९ वटा विद्यालय भवन निर्माणका क्रममा छन् ।

खानेपानी पूर्वाधार

खानेपानी पूर्वाधारका संरचनामध्ये ३ हजार २ सय संरचनालाई भूकम्पले क्षति पु¥याएको थियो । जसमध्ये पुनर्निर्माण प्राधिकरणले ७ सय ९१ संरचनाको निर्माण सम्पन्न गरेको छ भने ६ सय ७० वटा संरचना निर्माणको क्रममा रहेको प्राधिकरणले जनाएको छ ।

प्रकाशित मिति: बिहीबार, वैशाख १२, २०७६ २२:४७