लुम्बिनी प्रदेश राजधानी : प्रस्ताव एउटा, राजपत्रमा अर्कै

A+ A A-

प्रदेशसभामा आन्तरिक मामिला तथा कानुनमन्त्री कुलप्रसाद केसीले स्थायी राजधानी र नामकरण प्रस्ताव दर्ता गर्दा स्पष्ट भाषामा भने, ‘दाङको राप्ती गाउँपालिका र गढवा गाउँपालिका तथा अर्घाखाँचीको शीतगंगा नगरपालिकाले ओगटेको, चर्चेको राप्ती नदी किनारको मैदानी भाग राप्ती उपत्यका देउखुरीलाई प्रदेशको स्थायी राजधानी कायम गरियोस् ।'

सभामुख पूर्णबहादुर घर्तीले मतदान गराउँदा पनि सोही विवरण पढेर सुनाउँदै मतदान प्रक्रिया सुरु गराएका थिए । लुम्बिनी प्रदेशको राजधानी पारित हुँदा पनि सदनमा सभामुख घर्तीले विवरण सुनाउँदै माथिकै कुरा दाेहाेर्‍याएका थिए ।

संसद्‌को दुईतिहाइ बहुमतले पास उक्त प्रस्ताव प्रदेश राजपत्रमा भने फरक आएको छ । बुधबार साँझ प्रदेशसभा सचिवालयले जारी गरेको राजपत्रमा दाङको राप्ती उपत्यका (देउखुरी) लाई मात्र स्थायी राजधानी तोकिएको सूचना जारी भएको छ ।

गाउँपालिका र नगरपालिकाका नाम उक्त राजपत्रमा नभएपछि अर्घाखाँचीवासीले सामाजिक सञ्जालमा धोका भएको भन्दै विरोध जनाएका छन् । सामाजिक सञ्जालमा हरि ज्ञवाली लेख्छन्, ‘भालुबाङ, गढवा, शीतगंगा त हाेइन रै'छ । अब देउखुरी रे ।’

त्यस्तै, कांग्रेसका स्थानीय नेता हरि लम्साल लेख्छन्, ‘हिजो प्रदेश राजधानीको मुकाम पास गर्दा दाङको भालुबाङ, गढवा गाउँपालिका र अर्घाखाँचीको शीतगंगा नगरपालिकाका केही भाग भनेजस्तो लाग्थ्यो । राजपत्रमा त त्यो क्षेत्र हराएछ । लौ न माननीयज्यू, खोजी गर्दिनुस्, बिन्ती छ ।’

राजपत्रमा दाङको देउखुरी (राप्ती भ्याली) नाम आएसँगै केवल मत तान्न भालुबाङ, अर्घाखाँची र बाङ्गेसालको नाम लिइए पनि प्रदेश सरकारको नियत दाङमा मात्र राजधानी राख्ने नियत रहेको भन्दै टिकाटिप्पणी सुरु भएको छ ।

प्रदेश राजधानी तोकिएको स्थान जैविकमार्गमा पर्ने र भाैतिक संरचना निर्माण गर्न प्रतिबन्ध लगाइएकाे क्षेत्र भएकाले प्रदेश सरकारले चलाखीपूर्वक यसरी ती स्थानको नाम हटाएर देउखुरी मात्रै राखेको स्रोतले बताएको छ । प्रदेशसभा सचिव दुर्लभकुमार पुनले प्रदेशसभामा भएको निर्णयअनुसार नै राजपत्रमा नाम आएको बताए । ‘प्रस्तावमा चार किल्ला छुट्याएको छ । नाम लेख्दा सजिलो होस् भनेर राप्ती उपत्यका (देउखुरी) राखिएको हो । अरू केही होइन,’ उनले भने ।

सभामुख घर्तीले प्रदेशसभामा भएको निर्णय मुख्यमन्त्री कार्यालय, प्रदेश प्रमुखलाई पठाएको र नाम आउँदा छोटो रूपमा स्थान तोकेर राजपत्रमा प्रकाशित गरिएको बताए । ‘प्रस्तावअनुसार नै नाम आएको छ । बोर्डमा लेख्दा प्रस्तावमा जस्तै ठूलो नाम लेख्ने कुरा हुँदैन । त्यसैले नाम राप्ती उपत्यका (देउखुरी) प्रकाशित भएको हो,’ उनले भने ।

प्रकाशित मिति: बिहीबार, असोज २२, २०७७ १३:२५