स्वास्थ्य निर्देशिका पालनामा नेताकाे अटेरी

A+ A A-

प्रधानमन्त्री केपी शर्मा ओलीको सचिवालयका सदस्यहरूले आफूलाई कोरोना संक्रमण भएको सामाजिक सञ्जालबाट एकपछि अर्काेले शनिबार जानकारी गराउँदै थिए । आफ्नो सचिवालयका सदस्यलाई संक्रमण भएकोबारे प्रधानमन्त्री ओली पनि जानकार थिए ।

किचन क्याबिनेटका सदस्यहरू संक्रमित भएकाे भाेलिपल्टै आईतवार प्रधानमन्त्री ओली, अध्यक्ष पुष्पकमल दाहाल (प्रचण्ड), महासचिव विष्णु पौडेल, प्रदेश ५ का मुख्यमन्त्री शंकर पोखरेल र नेता जर्नादन शर्मा प्रधानमन्त्री निवास बालुवाटारमा छलफलमै ब्यस्त थिए । अघिल्लो साता प्रधानमन्त्रीकी निजी चिकित्सक डा. दिव्या सिंहलाई कोरोना संक्रमण भएको थियो । कार्यालयकै फोटोग्राफर राजन काफ्लेलाई पनि पोजिटिभ देखिएको थियो ।

डा. सिंह र काफ्लेलाई संक्रमण भएलगत्तै बालुवाटारमा कोरोनाको घण्टी बजेको थियो । तर यसतर्फ बालुवाटारले चासो दिएन । उल्टै भेटघाट र छलफल भई नै रहे ।

शनिबार र आइतबार प्रधानमन्त्री सचिवालयका सदस्यहरू विष्णु रिमाल, सूर्य थापा, राजन भट्टराई, ईन्द्र भण्डारी र रामशरण बजगाईँलाई कोरोना संक्रमण देखिएको थियो ।

काठमाडौं उपत्यका यतिबेला कोरोना भाइरस (कोभिड–१९) को हब बनेको छ । सरकारले जनस्वास्थ्यको मापदण्ड कडाइका साथ पालना गर्न उर्दी मात्र जारी गरेको छैन, मास्क नलगाउनेलाई जरिवानासमेत लिन भनेको छ ।

तर नियम बनाउने र पालना गर्न सिकाउने सरकारी निकायले नै आफैँले बनाएको नियमको उल्लंघन गरेको पाइन्छ ।

प्रधानमन्त्रीको सरकारी निवास बालुवाटारले कोरोनालाई बेवास्ता गरेको त होइन भनेर जनस्वास्थ्यका विज्ञहरूले प्रश्न उठाएका छन् । स्वास्थ्य निर्देशिका पालना नगरेर भेला, बैठक र छलफल गर्नुले प्रधानमन्त्री कार्यालय संवेदनशील नभएको देखाउँछ ।

स्वास्थ्य तथा जनसंख्या मन्त्रालयका प्रवक्ता भन्छन्, ‘बालुवाटारले जनस्वास्थ्यको मापदण्ड पालना गरेन । भीडभाड धेरै भयो । अनि संक्रमण फैलियो । सबै पार्टीका नेता, सांसद, जनप्रतिजिधिले जनतालाई सचेत गराउने हो । एकले अर्कोलाई विरोध र खिसिटिउरी गर्ने समय होइन ।’

सचिवालयका सदस्यहरूले आफ्नो स्वास्थ्य सामान्य रहेको बताएका छन् । ‘स्वास्थ्यमा कुनै समस्या छैन । लक्षण देखिएको छैन,’ प्रधानमन्त्रीका प्रेस सल्लाहकार सूर्य थापाले भने, ‘कोठामै रेस्ट गरेर बसेको छु ।’

प्रधानमन्त्री कार्यालयको धेरै सुरक्षाकर्मीमा पनि कोरोना संक्रमण देखिएको छ । सुरक्षाकर्मीबाट नै फैलिएको हुन सक्ने अनुमान छ ।

‘सवारी चलाउने चालक पनि प्रहरीकै हुनुहुन्छ । सुरक्षाकर्मी समूहमा बस्ने भएकाले त्यहीँबाट सरेको हुन सक्छ,’ अर्का एक सदस्यले भने, ‘पोजिटिभ देखिए पनि लक्षण देखिएको छैन ।’

नेपाली कांग्रेसका नेताहरूमा पनि संक्रमण देखिएको छ । कांग्रेस महामन्त्री शशांक कोइराला, केन्द्रीय सदस्यहरू अर्जुननरसिंह केसी, गगनकुमार थापा, जंगीलाल राय, कल्पना चौधरी र आमन्त्रित केन्द्रीय सदस्य शम्भुलाल श्रेष्ठलाई कोरोना संक्रमण देखिएको हो । महामन्त्री कोइराला भने कोरोनामुक्त भइसकेका छन् । केन्द्रीय कार्यसमतिको बैठक बस्नु अगाडि परीक्षण गर्दा नेताहरूका संक्रमण देखिएको हो । संक्रमण देखिएपछि कांग्रेसले बैठक स्थगित गर्‍यो ।

‘कहाँबाट सर्‍यो थाहा छैन । लक्षण पनि छैन । पोजिटिभ भनिएको छ,’ केन्द्रीय सदस्य अर्जुननरसिंह केसीले भने, ‘अहिले सेल्फ क्वारेन्टाइनमा छु । केही समयअगाडि जिल्लामा गएको थिएँ । गाउँपालिकामा पनि गएको थिएँ । हालसाल कतै गएको छैन । भेटघाट भएको छ तर मास्क लगाएकै थिएँ ।’

संघीय र प्रदेश सांसद, स्थानीय सरकारका जनप्रतिनिधि र नेताहरूलाई पनि कोरोना संक्रमण भएको छ । कर्णाली प्रदेशका विपक्षी दलका नेता जीवनबहादुर शाही, अछामका नेकपाका सांसद यज्ञबहादुर बोगटी, नेपाली कांग्रेसका सांसद उमेश श्रेष्ठ र जनता समाजवादी पार्टीका सांसद डा. सूर्यनारायण यादवलाई पनि कोरोना संक्रमण भएको थियो ।

बागमती प्रदेशका उपसभामख राधिका तामाङ र सांसद नारायण सिलवाल, प्रदेश ५ की सांसद कृष्णा केसी, गण्डकी प्रदेश सभाअन्तर्गत विधायन समितिका सभापति मोहन रेग्मीलाई पनि कोरोना संक्रमण भएको थियो ।

त्यस्तै, नेपाल मजदुर किसान पार्टीका नेता प्रेम सुवाललाई पनि कोरोना संक्रमण भएको थियो । काठमाडौं महानगरपालिकाका मेयर विद्यासुन्दर शाक्य र वीरगन्ज महानगरपालिकाका मेयर विजयकुमार सरावगीलाई पनि कोरोना संक्रमण भएको थियो ।

नेतालाई विज्ञको सुझाव

अधिकांश नेताहरूले भेटघाट, बैठक, राहत वितरण, मास्क नलगाउने, र दूरी कायम नगर्ने गरेकाले संक्रमण भएको देखिन्छ । धेरै नेताहरूले मास्क लगाए पनि चिउँडोभन्दा मुनि लगाउने गरेकाले समस्या भएको स्वास्थ्यकर्मी बताउँछन् ।

‘प्रधानमन्त्री, मन्त्री, सांसदले जनतालाई सचेत गराउनुपर्ने हो । उहाँहरूले नै नियम मानेको देखिँदैन,’ इपिडिमियोलोजी तथा सरुवा रोग नियन्त्रण महाशाखाका पूर्वनिर्देशक डा. बाबुराम मरासिनीले भने, ‘नेताहरूले कोरोनालाई हलुका रूपमा लिए । प्रधानमन्त्री आफैँ हाछ्यूँ गरेर कोरोना भाग्छ भन्नुहुन्छ । उहाँले हलुका रूपमा लिएपछि अरुले पनि त्यस्तै सोचे ।’

राजनीतिक पार्टीहरूले कोठा–कोठामा भेला बैठक गरेकाले नेताहरूमा संक्रमण देखिएको उनको बुझाइ छ । ‘यो महामारीमा कोठाकोठामा भेला बैठक गर्नै हुन्न,’ उनले भने, ‘खुल्ला चौरमा कुर्सी राखेर गर्न सकिन्छ । तर यहाँ कोठामै बैठक भएका छन् । अनि कोरोना सर्दैन त ?’

भेला बैठक भर्चुअल रूपमा गर्न डा. मरासिनीको सुझाव छ । ‘प्रविधिको विकास भएको छ । किन नेताहरूले प्रविधिको प्रयोग नगरेको ? अहिले जुमबाट पनि बैठक गर्न सकिन्छ । कोठामै भेला भएर किन गर्नुपर्ने ? प्रविधि चलाउन नजानेर समस्या भएको हो । प्रविधिलाई प्रयोग गर्ने हो भने जोखिम पनि भएन, बैठक पनि भयो,’ उनले भने ।

प्रकाशित मिति: सोमबार, असोज १९, २०७७ १९:५०