ह्विप जारी गरेर भए पनि सरकारको प्रस्ताव पास गर्ने नेकपाको निर्णय

A+ A A-

सत्तारुढ दल नेपाल कम्युनिस्ट पार्टी (नेकपा) प्रदेश- ५ संसदीय दलको बैठकले प्रदेश सरकारले प्रदेशसभामा पेस गरेको स्थायी राजधानी र नामाकरणको प्रस्ताव पास गर्ने निर्णय गरेको छ । आज मुख्यमन्त्री निवासमा बसेको संसदीय दलको बैठकले ह्विप जारी गरेरै भए पनि सरकारले ल्याएको प्रस्तावलाई पास गर्ने निर्णय गरेको नेकपाका प्रमुख सचेतक भूमिश्वर ढकालले बताए ।

प्रदेश- ५ प्रदेशसभामा हिजो शुक्रबार प्रदेशको स्थायी राजधानी दाङको देउखुरी र नामाकरण लुम्बिनी राख्ने प्रस्ताव पेस भएको छ । प्रस्ताव पेस भएपछि नेकपाले आज बिहान संसदीय दलको बैठक बोलाएको थियो ।

बैठकमा सहभागि साविक लुम्बिनी अञ्चलका सांसदले भने बुटवल राजधानीलाई निरन्तरता दिनुपर्ने बताएका थिए । बैठकमा सहभागी सांसदले प्रस्तावमाथि छलफल गरेर आफ्ना भनाइ राखे पनि अन्ततः निर्णयको तहमा जाँदा सरकारले प्रस्तुत गरेको प्रस्तावमा मतदान गर्ने निर्णय गरेको सचेतक ढकालको भनाइ छ ।

छलफलमा सहभागि सांसदले आफ्ना भनाइ राखेपछि मुख्यमन्त्री शंकर पोखरेलले बैठकमा उठेका विषयलाई सम्बोधन गर्दै पार्टीको निर्णय र प्रदेश सरकारले पेस गरेको प्रस्तावमा मतदान गर्न आग्रह गरेका थिए । मतदान गर्न नचाहने सांसदलाई समेत ह्विप लगाएरै भए पनि प्रस्ताव पास गर्नका लागि मुख्यमन्त्री पोखरेलले सांसदलाई निर्देशनसमेत दिएका छन् ।

बैठकमा सभामुख पूर्णबहादुर घर्ती र दाङकी सांसद विमला वलीबाहेक अरू सबैको उपस्थिति रहेको थियो । बैठकमा सहभागि प्रदेश सरकारका प्रवक्तासमेत रहेका बैजनाथ चौधरीले लुम्बिनी क्षेत्रका सांसदले बुटवललाई नै राजधानी निरन्तरता दिनुपर्ने छलफलका क्रममा बताएको बताए । उनले स्थायी राजधानी दाङ देउखुरीको प्रस्तावमाथि आपत्तिसमेत रहेको बताए ।

हिजो प्रदेशसभामा पेस भएको प्रस्तावमाथि सोमबार बस्ने बैठकमा छलफल हुनेछ । सत्तारुढ दल नेकपाले सोमबार र मंगलबार दुई दिन प्रस्तावमा छलफल गरेर मंगलबार नै प्रस्ताव पास गराउने रणनीतिमा छ । त्यसका लागि भोलि पुनः सर्वदलीय बैठकको समेत आव्हान गरिएको प्रमुख सचेतक ढकालले बताए । सर्वदलीय बैठकमा मुख्यमन्त्री शंकर पोखरेल भने सहभागि हुने छैनन् । सर्वदलीय बैठकले सबै दलको बीचमा साझा सहमती गराउने उद्देश्य रहेको उनले बताए ।

प्रकाशित मिति: शनिबार, असोज १७, २०७७ २१:१४