प्रदेश ५ : राजधानी दाङ सार्ने प्रस्तावप्रति संघ-संस्थाको आपत्ति

A+ A A-

रूपन्देहीको बुटवलमा रहेको प्रदेश- ५ को अस्थायी राजधानीलाई प्रदेश सरकारले दाङको देउखुरीलाई स्थायी राजधानी बनाउने प्रस्ताव संसदमा पेश भएसँगै यस क्षेत्रका विभिन्न संघ-संस्थाले आपत्ति जनाएका छन् ।

अस्थायी राजधानीका लागि आफ्ना भवनहरू प्रदेश सरकारलाई दिएका संघ-संस्थाले प्रदेशसभामा पेस भएको प्रस्तावप्रति कडा निन्दा र भर्त्सना गरेका छन् ।

रूपन्देही व्यापार संघका अध्यक्ष अध्यक्ष यमलाल लोहनी तथा महासचिव दयानिधि भण्डारीले संयुक्त रूपमा शुक्रबार विज्ञप्ति जारी गर्दै जनभावना विपरीत राजधानी सार्ने प्रस्ताव अगाडि सारिएकोमा आपत्ति प्रकट गरेका छन् ।

'प्रदेश सरकारले बुटवलमा रहेको अस्थायी राजधानीलाई स्थायी बनाउने प्रक्रिया थाल्नुको सट्टा दाङ लैजाने प्रस्ताव गर्नु हामीले यस क्षेत्रलाई अखण्ड राख्न गरेको आन्दोलन र माग विपरित रहेको छ, विज्ञप्ति भनिएको छ ।

संघले प्रदेशको अखण्ड आन्दोलनमा देखाएको एतिहासिक सहभागिताको स्मरण गर्दै प्रदेशसभामा प्रतिनिधित्व गर्ने सबै दलका प्रदेशसभा सदस्यलाई रूपन्देहीबाट राजधानी सार्ने निर्णयको विपक्षमा दृढका साथ उभिनका लागि अनुरोध पनि गरेको छ ।

त्यस्तै, बुटवल उद्योग वाणिज्य संघले पनि जनताको हित विपरीत राजधानी दाङ लैजान लागिएको भन्दै प्रस्तावप्रति आपत्ति जनाएको छ । संघका अध्यक्ष खेमबहादुर हमालले प्रदेशलाई स्थायित्व दिन आफ्ना भवन सरकारलाई सुम्पे पनि सरकारले भने जनताको भावना विपरीत प्रदेशसभामा प्रस्ताव पेस गरेको बताए । 'हाम्रो मान्यज्यूको कमजोरी भयो । हाम्रो संरचना दुःख पाएर दियौँ । हामीले गर्नुपर्ने गर्‍यौँ । नेताहरूले गर्नुपर्ने गरेनन्,' उनले भने ।

रूपन्देही उद्योग संघका अध्यक्ष बावुराम बोहोराले विवेकपूर्ण निर्णय हुने अपेक्षा गरेको बताए । 'बुटवलको राजधानी उपयुक्त कारण के हो ? सबै सुविधा सम्पन्न भएको ठाउँ हो । हामीले भवनसमेत दियौँ । हेरक गतिविधिमा हामीसँगै भयौँ । सहयोगी जनतालाई हेला गरेर देउखुरी लैजाने कारण के हो ? यसको जवाफ सडकबाट खोज्ने बेला हो,' उनले भने ।

त्यस्तै, होटल तथा रेष्टुरेन्ट व्यवसायी संघ रूपन्देहीका अध्यक्ष समुन्द्र जिसिले राजधानी बुटवलमा हुनका लागि सरकारविरुद्ध आन्दोलनमा जाने बताए । त्यस्तै, बुटवलबाट प्रदेश राजधानी सार्ने प्रदेश सरकारको निर्णयलाई खारेज गराउन र रूपन्देहीलाई राजधानी तोक्न सबै व्यावसायिक संघ-संस्था, पेशागत संगठन र आम सर्वसाधारणलाई एक जुट भएर अगाडी बढ्नसमेत संघ-संस्था आग्रह गरेका छन् ।

प्रकाशित मिति: शनिबार, असोज १७, २०७७ ००:३२