'राजधानी र नामाकरणको विषयमा पार्टी निर्णय नै अन्तिम'

A+ A A-

नेपाल कम्युनिस्ट पार्टी (नेकपा) प्रदेश- ५ का प्रमुख सचेतक भूमिश्वर ढकालले प्रदेशको राजधानी र नामाकरणको विषयमा पार्टीको निर्णय नै अन्तिम हुने बताएका छन् ।

शिलापत्रसँगको कुराकानीमा उनले संसद सुरु हुनुअगावै संसदीय दलको बैठक बस्ने र सवै नेकपा सांसदको भनाइ सुनेपछि मात्र अन्तिम निर्णय दलको बैठकले गर्ने उनले बताए ।

'प्रमुख प्रतिपक्ष दलसहित सबैको सहमतिमा प्रस्तावमाथि छलफल र सहमति जुटाउने प्रयास गरिनेछ' उनले भने, 'सर्वसहमत नभएमा पार्टीले निर्णय गर्नेछ । त्यहि निर्णय हामीले मान्नुपर्छ । मान्छौँ पनि,' उनले भने ।

आज प्रदेशसभामा प्रस्तुत भएको प्रदेशको स्थायी राजधानी र नामाकरणसम्बन्धी प्रस्तावमाथि १९ असोजबाट छलफल हुँदैछ । यता प्रदेश सभामा राजधानी र नामाकरणको प्रस्ताव पेश भएसँगै बुटवलमा विरोध सुरु भएको छ ।

प्रदेश सरकारले शुक्रबारको बैठकमा राजधानी र नामाकरण प्रस्ताव पेश गरेपछि बुटवलमा विरोध सुरु भएको हो । नेपाल विद्यार्थी संघ राजधानी बुटवलबाट अनेत्र लैजान नदिने भन्दै प्रदर्शन र सरकारी गाडी तोडफोड गरेको छ ।

संसदमा प्रस्ताव पेस हुनासाथ नेविसंघले चार वटा गाडीमा तोडफोड गरेको छ भने नेपालगञ्ज रोड, ट्राफिकचोकमा टायर बालेर प्रदर्शन गरेको छ ।

सामाजिक विकास समितिका सभापति दीर्घनारायण पाण्डे सवार लु १ झ ४४५ नं को स्कारपियो र कृषि मन्त्रालय योजना महाशाखाको लु१ झ ४२१ नं गाडी तोडफोड गरेको छ । त्यस्तै, लु १ झ ४४९ नं गाडी र सामाजिक विकास मन्त्रालयको लु १ झ ४२९ नं गाडी पनि प्रदर्शनकारीले तोडफोड गरेका छन् ।

नेविसंघका केन्द्रीय उपाध्यक्ष मुक्ति पौडेलले राजधानी बुटवलबाट सार्न नदिने गरि नेविसंघले आन्दोलन सुरु गरेको बताए ।

यता, सत्तापक्षले भने प्रस्तावमाथि छलफल र मतदान प्रक्रियाको समयमा बुटवलमा निषेधाज्ञा जारी गरेरै भए पनि प्रस्ताव पास गर्ने योजना बनाएको स्रोतको दावी छ ।

सरकारी गाडी तोडफोड गरे पनि अहिले सडकमा बाक्लो संख्यामा प्रहरी परिचालनसमेत गरिएको छ । जिल्ला प्रहरी कार्यालय रूपन्देहीका प्रवक्ता खड्गप्रसाद खत्रीले सम्भावित घटना हुन सक्ने भन्दै मुख्य बजार स्थानमा प्रहरीले निगरानी बढाएको बताए । ट्राफिकचोक, मुख्यमन्त्री कार्यालय, निवास, सवैमन्त्रालयमा अहिले बाक्लो संख्यामा प्रहरी परिचालन गरिएको छ ।

प्रकाशित मिति: शुक्रबार, असोज १६, २०७७ २३:०५