कोरोना संकटका बीच प्रदेश ५ मा खुल्न थाले विद्यालय

A+ A A-

कोरोना संक्रमणका कारण ६ महिनादेखि बन्द भएका विद्यालयमा स्वास्थ्य मापदण्ड अपनाएर प्रदेश ५ मा विद्यालय खुल्न थालेका छन् । कोरोना संक्रमण फैलिएपछि क्वारेन्टाइन बनेका विद्यालय खाली हुँदै गएपछि विद्यालय स्वास्थ्य मापदण्डअनुसार खुल्न थालेका छन् ।

अर्घाखाँची, गुल्मी, रूपन्देहीलगायका केही जिल्लाका विद्यालयमा अहिले पढाइ सुरु भएको छ ।असोजबाट लागू हुने गरी संघीय सरकारले विद्यार्थी सिकाइ सहजीकरण निर्देशिका २०७७ जारी गर्दै जनस्वास्थ्य मापदण्ड पूरा गर्दै र शिक्षण विधिको प्रयोग गर्ने विभिन्न विकल्पसहित विद्यालय सञ्चालन गर्न स्थानीय तहहरूलाई अधिकार दिएको छ ।

अर्घाखाँचीको छत्रदेव गाउँपालिकाका ४७ वटा विद्यालयमा पढाइ सुरु भइरहेको छ । विद्यालयको जोर बिजोर रोल नं. आधारमा पढाइ सुरु भएको छत्रदेव गाउँपालिकाका अध्यक्ष लेखनाथ पोखरेलले बताए ।

विद्यालयका अभिभावक, शिक्षक र सबैको सहमतिअनुसार दुई सिफ्टमा पढाउने गरी विद्यालय खुलेको अध्यक्ष पोखरेलको भनाई छ । पढाई सुरु भएसँगै विद्यार्थी नियमित रूपमा कक्षामा सामेल हुन थालेका छन् । एउटा कक्षामा १५ देखि २० जनालाई राखेर पढाउन सुरु गरिएको उनले बताए ।

त्यस्तै, अर्घाखाँचीको पाणिनी गाउँपालिकाले पनि अघिल्लो सातादेखि नै विद्यार्थीलाई पढाउन गराउन सुरु गरिसकेको छ । रूपन्देहीको सैनामैना नगरपालिकामा रहेको सैनामैना माध्यमिक विद्यालयले पनि पढाइ सुरु गरेको छ । दिनमा ३ वटा कक्षालाई पालैपालो बोलाएर पठनपाठन गराउने गरिएको सैनामैना नगरपालिकाका नगरप्रमुख चित्रबहादुर कार्कीले बताए ।

सैनामैनाकै रामापुर माविमा बिहान र दिउँसो गरी २ सिफ्टमा विद्यार्थीलाई पढाउन सुरु गरिएको छ । एउटा सिफ्टमा ३ घण्टा पढाइ हुने गरेको रामापुर माविका प्रद्यानाध्यापक कृष्णप्रसाद पौडेलले बताए । यता सियारी गाउँपालिका, कञ्जन गाउँपालिकामा पनि विद्यालय खुलेका छन् ।

त्यस्तै, गुल्मीको तम्घासस्थित सिद्धबाबा माविले पनि टोलटोलमा पुगेर पढाउन सुरु गरेको छ । १२ वटा टोली बनाएर विद्यार्थीलाई टोलटोलमा पुगेर पढाउन थालिएको विद्यालयका प्राचार्य डीबी श्रीषले बताए ।

पाल्पाको तानसेनस्थित दमकडा माविले पनि पढाउन सुरु गरेको छ । विद्यालयका प्राचार्य मोहन सापकोटाले विद्यालयमै त्रैमासिक परीक्षा सुरु गरिएकाे बताए । गत वैशाखदेखि रेडियो कार्यक्रम सञ्चालन गरेरै विद्यार्थीलाई पढाउन थालिएकोमा अब भने विद्यालय नै खाेलेर पढाइ सुरु गरिने उनले बताए ।

प्रकाशित मिति: बुधबार, असोज १४, २०७७ २३:२१