कालिका, ग्लोबल र लक्ष्मीको ९ महिने विवरणः कति देलान् प्रतिफल ?

A+ A A-

ग्लोबल आईएमई, कालिका र लक्ष्मी लघुवित्तले आर्थिक वर्ष २०७५/७६ को तेस्रो त्रैमासिक वित्तीय विवरण सार्वजनिक गरेका छन् । विवरणअनुसार यी तीन लघुवित्तको खुद आम्दानी अघिल्लो वर्षको यही अवधिको तुलनामा ४ प्रतिशतदेखि २५६ प्रतिशतसम्म बढेको छ ।

ग्लोबल आईएमई लघुवित्तको स्थिति

ग्लोबल आईएमई लघुवित्तले यस वर्षको चैत मसान्तसम्म ४ करोड ८ लाख रुपैयाँ खुद नाफा गरेर प्रतिसेयर वार्षिक आम्दानी ४९ रुपैयाँ २८ पैसा कायम गरेको छ । २५ करोड ४८ लाख रुपैयाँ ब्याज आम्दानी र १५ करोड ९८ लाख रुपैयाँ ब्याज खर्चपछि ९ करोड ५० लाख रुपैयाँ खुद ब्याज आम्दानी गरेको छ ।

त्यस्तै, अन्य सञ्चालन आम्दानी ६ करोड रुपैयाँसमेत गरी १५ करोड ५० लाख रुपैयाँ कुल सञ्चालन आम्दानी गरेको छ ।

कर्मचारी र कार्यालय सञ्चालन खर्चपछिको सञ्चालन आम्दानी ८ करोड १३ लाख रुपैयाँ रहेको छ ।

ब्याज आम्दानी १७७ र ब्याज १९० प्रतिशत वृद्धि भए पनि खुद ब्याज आम्दानी १३७ प्रतिशतले वृद्धि भएको छ । त्यस्तै, अन्य सञ्चालन आम्दानी ३ सय प्रतिशतले वृद्धि भएको छ । कार्यालय सञ्चालन र कर्मचारी खर्च शतप्रतिशतभन्दा बढीले बढे पनि खुद आम्दानी २५६ प्रतिशतले वृद्धि भएको छ । खुद आम्दानी वृद्धिमा ब्याज र अन्य सञ्चालन आम्दानीमा आएको वृद्धिलाई कारण मान्न सकिन्छ ।

आगामी वर्ष ३० प्रतिशतभन्दा बढी लाभांश दिन सक्ने हैसियत बनाएको देख्न सकिन्छ ।

कम्पनीको चुक्ता पुँजी ११ करोड ४ लाख रुपैयाँ, सापट २ अर्ब २६ करोड र कर्जा लगानी २ अर्ब ८३ करोड रुपैयाँ छ ।

अन्य सूचकमा खराब कर्जा ०.४७ प्रतिशत र कोषको लागत १०.१८ प्रतिशत छ ।

कालिका लघुवित्तको स्थिति

कालिका लघुवित्तले यस वर्षको चैत मसान्तसम्म २ करोड रुपैयाँ खुद नाफा गरेर प्रतिसेयर वार्षिक आम्दानी २४ रुपैयाँ ७५ पैसा कायम गरेको छ । १८ करोड ६२ लाख रुपैयाँ ब्याज आम्दानी र ९ करोड १२ लाख रुपैयाँ ब्याज खर्चपछि ९ करोड ४९ लाख रुपैयाँ खुद ब्याज आम्दानी गरेको छ ।

त्यस्तै, अन्य सञ्चालन आम्दानी ३ करोड ८५ लाख रुपैयाँसमेत गरी १३ करोड ३५ लाख रुपैयाँ कुल सञ्चालन आम्दानी गरेको छ ।

कर्मचारी र कार्यालय स्ञ्चालन खर्चपछिको सञ्चालन आम्दानी ३ करोड १५ लाख रुपैयाँ छ ।

ब्याज आम्दानी र ब्याज खर्चमा बराबर ४२ प्रतिशत वृद्धि भए पनि खुद ब्याज आम्दानी ३९ प्रतिशतले वृद्धि भएको छ । त्यस्तै, अन्य सञ्चालन आम्दानी ५६ प्रतिशतले वृद्धि भएको छ ।

कर्मचारी खर्च शतप्रतिशतभन्दा बढी र कार्यालय सञ्चालन खर्च झन्डै ५० प्रतिशत वृद्धि भएको छ । कर्मचारी र सञ्चालन खर्चमा आएको वृद्धिले खुद आम्दानीलाई प्रभाव पारेको देखिन्छ । खुद आम्दानी ४ प्रतिशतले वृद्धि भएको छ ।

चालू वर्षको आम्दानीबाट १८ प्रतिशतसम्म लाभांश दिन सक्ने हैसियत बनाएको देख्न सकिन्छ ।

कम्पनीको चुक्ता पुँजी १० करोड ८० लाख रुपैयाँ, सापट ९२ करोड, सदस्यको बचत ६७ करोड र कर्जा लगानी १ अर्ब ७६ करोड रुपैयाँ छ ।

अन्य सूचकमा खराब कर्जा १.२८ प्रतिशत र कोषको लागत ८.९ प्रतिशत छ ।

लक्ष्मी लघुवित्तको स्थिति

लक्ष्मी लघुवित्तले यस वर्षको चैत मसान्तसम्म ७ करोड ९१ रुपैयाँ खुद नाफा गरेर प्रतिसेयर वार्षिक आम्दानी ४३ रुपैयाँ ६१ पैसा कायम गरेको छ । ४१ करोड ५३ लाख रुपैयाँ ब्याज आम्दानी र २० करोड ११ लाख रुपैयाँ ब्याज खर्चपछि २१ करोड ४९ लाख रुपैयाँ खुद ब्याज आम्दानी गरेको छ ।

त्यस्तै, अन्य सञ्चालन आम्दानी ६ करोड ३० लाख रुपैयाँसमेत गरी २७ करोड ७३ लाख रुपैयाँ कुल सञ्चालन आम्दानी गरेको छ ।

कर्मचारी र कार्यालय सञ्चालन खर्चपछिको सञ्चालन आम्दानी १४ करोड ३७ लाख रुपैयाँ छ ।

ब्याज आम्दानी २६ र ब्याज खर्च ३२ प्रतिशतले वृद्धि भए पनि खुद ब्याज आम्दानी २१ प्रतिशतले वृद्धि भएको छ । त्यस्तै, अन्य सञ्चालन आम्दानी ६१ प्रतिशतले वृद्धि भएको छ ।

कर्मचारी खर्चमा झन्डै ५० प्रतिशत वृद्धि भएको छ । कार्यालय सञ्चालन खर्च २२ प्रतिशतले वृद्धि भएको छ । खुद आम्दानी १८ प्रतिशतले वृद्धिमा भएको छ ।

चालू वर्षको आम्दानीबाट ३० प्रतिशतसम्म लाभांश दिन सक्ने हैसियत बनाएको देख्न सकिन्छ ।

कम्पनीको चुक्ता पुँजी २४ करोड २० लाख रुपैयाँ, सापट १ अर्ब ८६ करोड, सदस्यको बचत १ अर्ब १८ करोड रुपैयाँ र कर्जा लगानी ३ अर्ब ३७ करोड रुपैयाँ छ ।

खराब कर्जा १.३७ प्रतिशत र कोषको लागत ९.५१ प्रतिशत छ ।

प्रकाशित मिति: बुधबार, वैशाख ११, २०७६ ०१:०१