चराहरूले बाँचिआएको साझा पृथ्वी (फाेटाे कथा)

A+ A A-

जंगल, खोला, नदी, घाँसेमैदान, पोखरी यी सबै स्थानमा मात्र नभएर हाम्रो घर, गोठ, खेतीपाती, कार्यालय आदि स्थानहरूमा चराचुरुङ्गीहरू प्रशस्त पाइन्छ । यी विभिन्न ठाउँमा पाइने चराको प्रकारमा समानता हुँदैन । स्थानका आधारमा, मौसमका आधारमा चराचुरुङ्गीहरू पाइन्छ । हामी आ-आफ्नो निजी जीवन र काममा ब्यस्त छौँ ।

आजको यो ब्यस्त युगमा मान्छेसँग चराचुरुङ्गी हेरेर बस्ने फुर्सद छैन । निकै कम मान्छे मात्र छन्, जो अहिलेको समयमा चराचुरुङ्गीका बारेमा पनि सोच्छन् र यिनीहरूको संरक्षणमा चासो दिन्छन् । चरा संरक्षणका लागि आफूले आफ्नो ठाउँमा बसेर गर्न सक्ने काम सबैले गर्दैनन् । आफ्नो नियमित कामलाई रोकेर केही गर्न सकिँदैन भने पनि आफ्नो दिनचर्याले वन्यजन्तु तथा चराचुरुङ्गीलाई नकारात्मक प्रभाव पार्नु हुँदैन ।

हामीहरूले जानीजानी या अन्जानमा विभिन्न तरिकाले वन्यजन्तु र चराचुरुङ्गीहरूलाई असर पर्ने काम गरिरहेका हुन्छाैँ । बाली लगाएको स्थानमा विभिन्न प्रजातिका चराचुरुङ्गीले आफ्नो बासस्थान बनाएका हुन्छन् । किसानले आफ्नो बालीमा प्रयोग गर्ने कीटनाशक औषधि, मुसा मार्ने औषधि तथा विभिन्न प्रकारका विषादीहरूले चराचुरुङ्गीलाई नकारात्मक असर पारेको देखिन्छ ।

अझै मुसा मार्न प्रयोग गरिने लिसोमा टाँसिएर चराचुरुङ्गीले ज्यान गुमाएको पनि देख्न सकिन्छ । जथाभावी फालिएको प्लास्टिक, सिसा, रबर तथा अन्य प्रयोगविहीन वस्तुहरूले चराचुरुङ्गीलाई उत्तिकै नकारात्मक असर पारेको हुन्छ ।

नेपालमा ८ सय ६० भन्दा बढी प्रजातिका चारहरू पाइन्छन् । त्यसमध्ये काडेँ भ्याकुर नेपालमा मात्र पाइन्छ । आउँदा दिनहरूमा सम्बन्धित निकायको मात्र जिम्मेवारी हो भन्ने भ्रम नपालेर हामी सबैले यथास्थानबाट सकारात्मक गतिविधिलाई निरन्तरता दिने हो भने हामीले हाम्रा भावी पुस्तालाई यस्तै सुन्दर पृथ्वी हस्तान्तरण गर्न सक्छौँ । हेर्नुस्, हेटौँडा वरिपरि लिएका तस्वीरहरू: