लकडाउनमा कलाकारलाई चलचित्रको अफर : चित्तबुझ्दो स्क्रिप्टकै खडेरी

A+ A A-

लकडाउन र निषेधाज्ञाका कारण अभिनेता दयाहाङ राई घरमै थुनिए । घरमा थुनिएर बस्दा पनि उनलाई फुर्सद भने मिलेन । उनलाई निरन्तर चलचित्रको अफर आइरहे । अफर आएका स्क्रिप्ट पढ्दा उनलाई फुर्सद नै मिलेन ।

हरेक दिनजसो स्क्रिप्ट पढ्नमा नै ब्यस्त रहेका दयाहाङ लकडाउनको समयमा आफूले झण्डै दुई दर्जन चलचित्रको स्क्रिप्ट पढेको बताउँछन् । तर, उनको मन यी दुई दर्जन स्क्रिप्टमध्ये कुनैले तान्न सकेन । दयाहाङ यी कुनै पनि चलचित्रमा काम गर्ने पक्षमा छैनन् ।

उनी भन्छन्, 'मलाई आएका स्क्रिप्ट चित्तो बुझ्दो लागेनन् । दुई दर्जन स्क्रिप्टमा पनि काम गरु झै लाग्ने स्क्रिप्ट कुनै छैनन्,' दयाहाङ आफू यी २ दर्जननै चलचित्रमा काम नगर्ने पक्षमा छन् ।

उनी काम गर्न अस्विकार मात्रै गर्दैनन्, कुनैकुनै स्क्रिप्टमा त चलचित्र नै नबनाउन पनि आग्रह गर्छन् । 'कुनैकुनै स्क्रिप्ट त चलचित्र बन्न लायक पनि हुन्नन् । उनीहरूलाई म चलचित्र नबनाउनुस् नै भन्छु,' दयाहाङ भन्छन्, 'तर, उहाँहरू मैले भन्दैमा कहाँ रोकिनु हुन्छ होला र !'

दयाहाङ एक प्रतिनिधि पात्र हुन् । यो समय चलनचल्तीका प्राय: कलाकारलाई स्क्रिप्टको लर्को नै लागेको छ । कोरोनाको संकटकालपछि चलचित्र निर्माण कम हुन्छ कि भन्ने धेरैको अनुमान कलाकारलाई आएको स्क्रिप्टले मिथ्या सावित गरिदिएको छ । कलाकार पनि याे कुरा महशुस गरेको बताउँछन् ।

दयाहाङ आफैँ पनि कोरोना कहर सकिनेबित्तिकै धेरै चलचित्र बन्ने अनुमान गर्छन् । अभिनेता विपिन कार्की पनि कोरोना कहरलगत्तै धेरै चलचित्र निर्माण हुने बताउँछन् । उनी भन्छन्, 'चलचित्रकर्मीहरूको कमाइ भनेको त चलचित्र नै हो नि ! त्यसैले चलचित्र निर्माणको क्रम कम हुने छैन ।'

विपिनले पनि यो बीचमा आधा दर्जन हाराहारी स्क्रिप्ट पढे । तर, चलचित्र 'प्रसाद-२' बाहेक अन्य चलचित्रको लागि उनी सकारात्मक छैनन् ।

'मलाई आएका स्क्रिप्टहरूलाई नराम्रो भन्ने अधिकार मलाई छैन । नराम्रो भएर छोडेको पनि म भन्दिनँ,' विपिन भन्छन्, 'मलाई आएका स्क्रिप्टमा भएका क्यारेक्टर मलाई सुहाउने भएन । त्यसैले मैले काम नगर्ने सोच बनाएको हुँ ।'

विपिन आफूलाई कमेडी तथा दुःखी क्यारेक्टरमा मात्रै अफर आइरहेको बताउँछन् । आफूले फरक काम गर्न नपाउने देखेपछि उनी अन्य चलचित्रमा काम गर्न उत्साहित छैनन् । विपिनलाई एक चलचित्रको आइडिया मन परेको छ । तर, उनी चलचित्रको लागि पक्का भएका छैनन् ।

यता, अभिनेत्री स्वस्तिमा खड्कालाई पनि आधा दर्जनभन्दा बढी चलचित्रबाट अफर आयो । उनलाई त सिक्किमका केही चलचित्रकर्मीहरूले पनि चलचित्रको लागि अफर गरेका छन् । तर, स्वस्तिमाले कमै चलचित्रको स्क्रिप्ट पढिन् ।

'म पहिला मेकरसँग कुरा गरेर चलचित्रको आइडिया सुन्छु । अनि मात्रै स्क्रिप्ट पढ्छु । त्यसैले एकदमै कम स्क्रिप्ट पढेँ, 'स्वस्तिमा भन्छिन् ।

आफूलाई आएका चलचित्र उत्साहजनक नभएको स्वस्तिमा बताउँछिन् । उनी भन्छिन्, 'यो बीचमा मलाई मन परेको चिसो मान्छे हो । उक्त चलचित्रमा काम गर्ने कुराकानी भइरहेको छ । अन्य चलचित्र त गर्दिन होला ।'

बरु स्वस्तिमालाई एक छोटो चलचित्र मन परेको छ । उनी उक्त छोटो चलचित्र गर्ने मनस्थितिमा छिन् । त्योसँगै सिक्किमको एक चलचित्रको आइडिया पनि स्वस्तिमालाई रुचि लागेको छ । टिमसँग बसेर छलफल गरेर उक्त चलचित्रमा काम गर्ने वा नगर्ने निधो गर्ने स्वस्तिमा बताउँछिन् ।

लकडाउनको समयमा नै अभिनेता पल शाहले दुई चलचित्रमा साइन गरे । पलले 'हुतुतु' र 'रेड वाइन'मा काम गर्न सम्झौता गरिसकेका छन् ।

पललाई पनि यो बीचमा आधा दर्जन हाराहारी स्क्रिप्ट आइपुगे । म्युजिक भिडियोमा भ्याइ-नभ्याई काम गरिरहेका पलले बिहान बेलुकाको समय छुट्याएर स्क्रिप्ट पढे । तर, उनले पनि चित्त बुझ्दो स्क्रिप्ट भेटेनन ।

'मलाई मन परेको दुई स्क्रिप्टमा त सम्झौता भइसकेको छ,' पल भन्छन्, 'बाँकी केही मन परेन, केही स्क्रिप्टमा निर्माण पक्षसँग सर्तहरू मिलेनन् ।' पल अब बाँकी चलचित्रहरू गरिहाल्ने पक्षमा छैनन् ।

त्यस्तै, अभिनेत्री वर्षा सिवाकोटीले पनि आधा दर्जन स्क्रिप्ट पढ्न भ्याएको बताउँछिन् । तर, उनलाई पनि कुनै स्क्रिप्टमा चित्त बुझेन ।

'मलाई अफर आएका चलचित्रहरूमा कतै न कतैबाट कोरोना भाइरसको कथालाई जोडिएको छ,' उनी भन्छिन्, 'कुनै पनि चलचित्रको स्क्रिप्टमा काम गरूँ जस्तो नै लागेन ।' वर्षाले आधा दर्जन नै चलचित्रलाई अस्वीकार गरेकी छन् ।

वर्षा आफ्नो पहिला नै सम्झौता भएका चलचित्रलाई समय दिएर काम गर्ने सोचमा छिन् । उनले चलचित्र 'परदेशी- २, सुदूर, गोर्खा वारियर' लगायत चलचित्र गर्ने सम्झौता गरिसकेकी छिन् ।

अभिनेता पुष्प खड्काले पनि चार वटा चलचित्रको स्क्रिप्ट पढे । उनले पनि चित्तबुझ्दो स्क्रिप्ट भेटेका छैनन् । आफूलाई मन परेको एक स्क्रिप्टमा भने उनी बसेर छलफल गरिरहेका छन् ।

'लकडाउनको समय मैले केही चलचित्रको स्क्रिप्ट पढे । तर, प्राय: स्क्रिप्ट कमजोर नै लाग्यो । मलाई एउटा चलचित्रको स्क्रिप्ट मन परेको छ,' पुष्प थप्छन्, 'त्यसलाई केही मिलाउन सकिन्छ कि भनेर छलफल भइरहेको छ ।'

पुष्पलाई अर्को एक चलचित्रको आइडिया पनि मन परेको छ । तर, स्क्रिप्ट पढ्न पाएका छैनन् । स्क्रिप्ट राम्रो बने उक्त चलचित्रका लागि पनि पुष्प सकरात्मक छन् । बाँकी स्क्रिप्टमा भने पुष्प काम गर्ने मनस्थितिमा छैनन् ।

प्रकाशित मिति: मंगलबार, असोज ६, २०७७ २२:०७