कोरोना संक्रमित गायक रिजाल भन्छन्- 'हिम्मत नै कोरोनाको उपचार'

A+ A A-

गत सोमबार गायक तथा संगीतकार लोचन रिजालले आफ्नो स्वस्थ्य ठीक नभएको शंका पाए । ज्वारो आएको छ, टाउको पनि दुखिरहेको छ, शरीर पूरै थकित छ ।

लक्षण कोभिड- १९ सँग मिल्यो । गायक रिजालको मन झस्कियो ।

रिजाल कामको सिलसिलामा काठमाडौंकाे त्रिपुरेश्वरमा नै थिए । आफूलाई निकै गाह्रो भएपछि उनी बेड रेस्टमा नै थिए । सोमबारबाट ३ दिनसम्म त उनी उठ्न पनि सकेनन् ।

बिहीबार साँझ उनलाई केही तागत आएजस्तो भयो । उनले आफू बस्ने धुलिखेलको होस्टल जाने साहस गरे । उनी भन्छन्, 'मलाई होस्टलमा आउन मन लाग्यो । बिहीबार बेलुका सक्छुजस्तै लागेर म परिवारमा सल्लाह गरेर नै धुलिखेल निस्किएँ ।'

धुलिखेल पुगेपछि रिजालले कोरोना परीक्षण गर्ने सोच बनाएर शुक्रबार बिहान धुलिखेल अस्पताल पुगे । दिनभर नतिजाको प्रतीक्षामा रहेका रिजाललाई बेलुकीपख डाक्टर राजीवबाट फोन आयो ।

साथीसमेत रहेका डक्टरबाट फोन आएपछि रिजालले आफूलाई शंका पाइसकेका थिए । फोन उठाए र सोधे- 'मलाई कोरोना पोजिटिभ देखियो हो ?'

राजीवले उनलाई 'हो'को उत्तर फर्काए र हत्तोसाहित नहुन आग्रह गरे । केही उपचारका विधिहरू पनि सिकाए ।

राजीवले फोन राखेलगत्तै रिजालले परिवार सम्झिए । काठमाडौंमा नै रहेकी श्रीमतीलाई तुरुन्तै फोन गरे र भने, 'मलाई कोरोना पोजिटिभ देखिएछ । तिमीहरू पनि नडराई सुरक्षित बस है !'

मंगलबार टाउको दुखेर सुतेका रिजाललाई उनकी श्रीमतीले टाउको मालिस गर्दिएकी थिइन् । त्यो भएर पनि रिजाललाई केही डर भयो ।

उनले आफूसँगै काम गर्ने सम्पूर्ण साथीलाई पनि आफ्नो रिपोर्ट पोजिटिभ आएको खबर सुनाए, ताकि सबै सचेत हुन सकून् । उनी भन्छन्, 'भन्नेलाई त मैले फोन नै गरेर भनेँ । कतिपय छुट्नुभएको थियो होला, त्यसैले सबैको जानकारीका लागि शनिबार स्टाटस नै लेखेँ ।'

०००

तीन दिन त उठ्न पनि नसकेका रिजाललाई अहिले स्वास्थ्यमा त्यति धेरै समस्या छैन । शरीरको थकान कम भएको छ, टाउको दुखाइ पनि कम भएको छ । तर, ज्वरो भने बेलाबेला आइरहन्छ ।

रिजाल भन्छन्, 'सुतेर उठ्दा म पूरै पसिनै पसिनाले भिजेको हुन्छु । ज्वरो आइरहेको हुन्छ । अन्य त्यस्तो खासै समस्या भने छैन ।' एकचोटि उनलाई श्वास फेर्न गाह्रो भयो । उनी तुरुन्तै रुखको छेउमा गए र लामोलामो श्वास लिए । अहिले त श्वास फेर्न पनि खासै समस्या छैन ।

रिजाललाई कोरोना जित्न सक्ने साहस आइसकेको छ । उनी आफू केही समयमा नै कोरोनालाई जितेर फर्किनेमा विश्वस्त छन् । भन्छन्, 'अहिले आएर मलाई के लाग्दै छ भने कोरोना लाग्यो भन्दैमा मरिहाल्ने हुन्न रहेछ । मलाई त अहिले कोरोना सजिलै जित्छु भन्ने आँट आइसकेको छ ।'

गायक रिजाल आफू बस्ने होस्टलमा एक्लै छन् । वरिपरि हरियाली र रमणीय दृश्यहरू छन् । उनी त्यसैमा भुलिएका छन् ।

गीतसंगीत तथा आफ्नो कामबाट कहिल्यै फुर्सद नपाएका रिजाललाई यो समय त 'भ्याकेसन' मनाएजस्तै लागेको छ । उनी भन्छन्, 'यस्तो फुर्सद मिल्ला र यसरी बसूँला भन्ने कहिल्यै सोचेको थिइनँ । अहिले फुर्सद मिलेको छ । यसलाई मैले भ्याकेसनजस्तै मनाइरहेको छु ।'

रिजाल आफ्नो लागि आफैँ खाना बनाउँछन् । आफूले नै पकाएको दाल-भातले आफ्नो पेट भर्छन् । तर, त्यसको स्वाद र बास्ना उनले खासै पत्तो पाएका छैनन् । 'मैले स्वाद र बास्न भने थाहा पाउदिनँ । गत सोमबारदेखि नै योचाहिँ समस्या भयो', गायक रिजाल भन्छन्, 'स्वाद पत्तो नपाए पनि पेट भर्नलाई खाना खाइरहेकै छु ।'

आइसोलेट भएर बस्दा गायक रिजालले संगीतमा आफूलाई भुलाउन खोजे । तर, मन स्थिर हुन नसक्दा उनलाई संगीतमा पनि दिक्क लाग्यो । अहिले उनी गीत-संगीत पनि उत्ति सुन्दैनन् ।

उनको दैनिकी आफ्नो परिवारलाई आफ्नो स्वास्थ्यको जानकारी र देश-विदेशमा रहेका साथीहरूसँग गफ गरेर बितिरहेको छ । त्यो पनि अल्छी लागे उनी मोबाइल 'साइलेन्ट' गरेर सुतिदिन्छन् ।

उनी धैर्य भएर किताब पनि पढ्न सकेका छैनन् । उनी भन्छन्, 'अहिलेको अवस्थामा मनमा शान्ति नै छैन । त्यसैले पनि केही गर्ने मुड नै बनेको छैन । बरु रुखहरू हेरेर, रमणीय दृश्यहरू हेरेर मन भुलाइरहेको छु ।'

अझै केही समय आइसोलेसनमा नै बस्नुपर्ने भएकाले रिजाललाई केही संगीत सिर्जना गर्ने रहर जागेको छ । त्यसैले उनी आजदेखि बाजा बजाउन सुरु गरेका छन् ।

'अफिसको कामले गर्दा मैले गर्नुपर्ने संगीत सिर्जनाका कामहरू धेरै पेण्डिङमा थिए । राम्रा कामहरू गर्ने इच्छा भएर पनि काम गर्ने समय मिलेको थिएन', रिजाल भन्छन्, 'अब भने मलाई केही सिर्जना गरौँ कि भन्ने लागेको छ । आजबाट यसो बजाहरू बजाउन सुरु गरेको छु ।'

कोरोनालाई जितेपछि भने रिजाललाई अब संगीत सिर्जनालाई बढी समय दिने सोच पलाएको छ । उनी भन्छन्, 'एक चोटिको जिन्दगी हो रै'छ कि हाम्रो । यो समयमा केही सिर्जनात्मक कामहरू गरेन भने आफूलाई सम्झिने केही नहुने रै'छ । त्यसैले अब संगीतमा नै केही थप काम गर्नेछु ।'

गायक रिजाल कोरोना लाग्दैमा आत्तिन नहुने बताउँदै भन्छन्, 'हिम्मत राख्यो भने कोरोनालाई जित्न गाह्रो हुन्न ।'

प्रकाशित मिति: सोमबार, असोज ५, २०७७ २३:३१