रानीपोखरी पुनर्निर्माणको काम सुस्त

A+ A A-

आगामी वर्षको तिहारसम्म सम्पन्न गर्ने लक्ष्य रहेको रानीपोखरीको पुनर्निर्माण कार्य सुस्त देखिएको छ । रानीपोखरीको पुनर्निर्माण २१ फागुनदेखि काम सुरु भए पनि त्यसले गति भने लिन सकेको छैन । फागुन दोस्रो साता प्राधिकरणका प्रमुख कार्यकारी अधिकृत सुशील ज्ञवालीको संयोजकत्वमा बसेको पुरातत्वसम्बन्धी विज्ञसहितको बैठकले रानीपोखरी पुनर्निर्माणको मोडालिटीबारे टुंगो लगाएको थियो ।

त्यसअनुसार रानीपोखरी पुनर्निर्माण करिब एक फिट तलसम्म खनी घाँस हटाएर सुरु गरिनेछ । घाँस हटाएसँगै बालुवा पनि निकालेर एक ठाउँमा माटो नमिसिने गरी जम्मा गर्ने र माटो जम्मा गरेसँगै पोखरीको कालीमाटी रहेको तहमा थप एक फिटको कालीमाटी राख्ने र माटोको तह तयार भएपछि करिब दुई फिटको बालुवा राखिने निर्णय भएको हो ।
निर्णय भएको दुई महिनाको अवधिमा घाँस हटाउने, बालुवा राख्ने काम सुस्त गतिमा मात्र बढेको छ । ती कामका लागि आवश्यक प्रविधि प्रयोग गरिएको छैन भने थोरै जनशक्ति प्रयोग गरेर काम भइरहेको छ ।

रानीपोखरी पुनर्निर्माण उपभोक्ता समिति गठन गरेर रानीपोखरीको पुनर्निर्माण सुरु गरिएको थियो । प्राधिकरणका प्रवक्ता तथा सहसचिव पीताम्बर घिमिरेले रानीपोखरीको पुनर्निर्माण उपभोक्त समितिमार्फत हुने निर्णय भएकाले समितिमार्फत काम सुरु भइसकेको बताए । उनले पुनर्निर्माणमा ढिलासुस्ती भएमा त्यसको नियम अनुगमन हुने र निर्धारित समयमै काम सम्पन्न गरिनेसमेत बताए ।

रानीपोखरी पुनर्निर्माणको क्रममा विगतमा रिटेनिङ पर्खाल लगाउँदा बिग्रेको पोखरीको सतहलाई पुरानै तहअनुसार बनाइनेछ । त्यसपछि पोखरीको डिलको माथिल्लो भागमा ठूलो पेटी लगाइने भएको छ ।
पोखरीको डिल र फुटपाथको छेउसम्म इँटा सोलिङ एवं लाइम कंक्रिटको काम सम्पन्न गरेसँगै ठाडो इँटा बिछ्याइने र हालै बनाइएको ढुंगाको रिटेनिङ पर्खालमा माअप्पाको आवरण लगाई फुटपाथ लेवलमा लाइम कंक्रिटपछि माअप्पाको नै रेलिङ वाल बनाइनेछ । त्यसक्रममा फुटपाथमा इँटा सोलिङ र लाइम कंक्रिट गरी २ इन्च बाक्लो कालो ढुंगा बिछ्याउने राष्ट्रिय पुनर्निर्माण प्राधिकरणले निर्णय गरेको छ ।

पोखरीको पानीका लागि पूर्वतर्फ एउटा बोरिङको व्यवस्थासमेत गरिनेछ । त्यस्तै, ठाउँ ठाउँमा अकासे पानी संकलन गर्ने संयन्त्र निर्माणसमेत हुनेछ । पोखरीमा पानीको मात्रा अटुट राख्न मेलम्ची पाइप लाइनसँग जोड्ने प्रावधान पनि खुला राखिनेछ । पोखरीको माथिल्लो सतहमा केही मात्रामा माटो राखी हरियाली पनि कायम गरिने भएको छ ।
त्यसैगरी, रानीपोखरीको बीचमा अवस्थित बालगोपालेश्वर मन्दिरसँग जोडिएको पुलको निर्माण गर्दा पुलको जगदेखि पानीको सतहसम्म ड्राई ड्रेस स्टोन वाल लगाउने र त्यसको बाहिरी भागमा सम्भव भएसम्म पुरानै इँटा प्रयोग गरिने निर्णय भएको छ ।
पुलको वृत–खण्ड र त्यसमाथिको भाग निर्माण गर्दा लाइमरसुर्खी मोर्टार प्रयोग गरिनेछ । पानीको सतहदेखि माथि पुलसम्म निर्माण गर्दा सम्भव भएसम्म पुरानै इँटाको प्रयोग हुनेछ । पुलको फुटपाथमा कालो ढुंगाले पेभिङ गर्ने र पुलको दायाँ र बायाँतर्फ दचिअप्पा प्रयोग गरी १४ इन्चको पर्खाल निर्माण गरिने भएको छ ।