हजुरआमाको मन जितेँ, त्यही उपाधि भयाे

A+ A A-

गायक रियालिटी शो नेपाल आइडल सिजन ३ मा उपाधि विजेताको मुख्य दाबेदार थिए, बर्दियाका प्रविण बेडवाल ।

भोटिङलाई आधार मानेर छानिने विजेतामा प्रविण पहिलो हुन सकेनन् । मोरङकी सज्जा चौलागाईंले उपाधि चुमिन् भने प्रविण दोस्रो हुन पुगे ।

प्रविणले उपाधि त जितेनन् । तर, उनले धेरै शुभचिन्तक कमाएका छन्, आफ्नो छुट्टै परिचय बनाएका छन् । उनले आफ्नो गायकीबाट धेरै दर्शक र स्राेताको मन जितेका छन् ।

प्रविणले उपाधिभन्दा ठूलो कुरा जितेका छन् । त्यो हो, हजुरआमाको मन ।

सानैदेखि हजुरआमाकै काखमा हुर्किएका प्रविणलाई उपाधि गुमाएकोमा कुनै दुःख छैन । किनभने उनले हजुरआमाको मन जो जितेका छन् ।

०००

यस वर्ष नेपाल आइडलको ग्राण्ड फिनाले 'ग्राण्ड' हुन सकेन । आइडल टिममध्ये एक जनालाई कोरोना संक्रमण देखिएकाले सबै प्रतिस्पर्धीहरू घरमा नै बसेर नतिजा कुर्न बाध्य भए ।

प्रविण पनि आफ्नै रुममा बसेर टीभी हेरिरहेका थिए । केही दिनअगाडि नै रेकर्ड भएको सबै प्रतिस्पर्धीहरूको प्रस्तुति सकियो । पालो आयो, विजेता घोषणा गर्ने ।

प्रविणको मुटुको वेग बढ्दै थियो । उनको नाम त सुरुमा नै आइहाल्यो । नेपाल आइडल सिजन ३ को फस्ट रनरअप हुनुभएको छ– प्रविण बेडवाल ।

प्रविणलाई झट्ट हजुरआमाको याद आयो । उनले हजुरआमालाई फोन गरे, दादीमाँ, म दोस्रो भए ।

'बाबु, तैँले मेरो परिवारले नै कमाउन नसकेको नाम कमाइस्,' जवाफमा प्रविणकी हजुरआमा बोलिन्, 'अब मेरो आउने तीन/चार पुस्ता तेरो नामले चिनिनेछ । मलाई गर्व छ ।'

प्रविण खुसीले गदगद भए । आफ्नो परिवारको मूल मान्छेले नै यस्तो राम्रो भनेको सुनेपछि कसको मन खुसी हुन्न र ? यो त धेरै कमै व्यक्तिको भाग्यमा हुन्छ नि । प्रविण त्यो समय केही भावुक पनि भए ।

हजुरआमासँगको माया

प्रविण सानो उमेरदेखि नै हजुरआमाको काखमा हुर्किए । जन्मिएको सात दिनदेखि नै आफूलाई हजुरआमाले हुर्काएको प्रविण बताउँदै आएका छन् ।

हजुरआमाले प्रविणलाई गर्ने प्रेम यस्तो छ कि परिवारको जोकोहीले डाहा गर्छन् । प्रविण भन्छन्, 'मेरा भाइबहिनीहरू त छँदै छन् । मेरा बुबाहरू पनि हजुरआमाले मलाई गर्ने प्रेममा डाहा गर्नुहुन्छ ।'

प्रविणका हरेक इच्छाहरू हजुरआमाले नै पूरा गरिदिएकी छन् । प्रविणले मागेको हरेक कुरा पूरा गरिदिएकी छन् । आफैँसँग राखेर प्रविणलाई कहिल्यै आमा-बुबाको अभाव महुसुस हुन दिइनन् ।

त्यसैले त प्रविणले भन्ने गरेका छन्, 'मेरो आमा-बुबा नै मेरो दादीमा हो । उहाँ त मेरो भगवान् नै हो ।'

हजुरआमासँगै रमाएर हुर्किएका कारण प्रविणले आफ्नो बुबा-आमाको खासै खोजी गर्दैनन् । एक भेटमा त प्रविणले आफ्नो बुबा पनि चिननेन् ।

दुर्घटनामा परेर प्रविण हस्पिटलमा थिए । उनलाई भेट्न बुबा हस्पिटल आइपुगे । तर, प्रविणले बुबालाई चिननेन् । हजुरबुबाले चिनाएपछि बल्ल प्रविणले नमस्ते गरे ।

'हाम्रो भेट नभएको नै चार/पाँच वर्ष भइसकेको थियो । त्यसैले बुबालाई मैले चिनिनँ,' प्रविण भन्छन्, 'चिनेपछि पनि ओहो मेरो बाबा भन्ने आत्मीयता नै रहेन । शायद हजुरआमाको मायामा मैले संसार पाएको छु ।'

यति मात्रै होइन, प्रविणलाई आफ्नो भाइ-बहिनीको विषयमा प्रश्न सोध्यो भने पनि अचम्मको जवाफ दिन्छन् । उनी भन्छन्, 'हजुरआमाको तर्फबाट त म एक्लो छोरा हो । बुबा-आमाबाट भाइ बहिनीहरू हुनुहुन्छ ।'

आफ्नै परीक्षा लिन नेपाल आइडल

सानो उमेरमा नै निमोनिया भएर उपचारका लागि इन्डिया पुगेका प्रविण त्यहीँ पढ्न थाले । तीन वर्षको उमेरमा उनी एलकेजीमा पढ्दै थिए । एक दिन शिक्षिकाले प्रविणलाई गीत गाउन आग्रह गरिन् ।

तोते बोलीमा प्रविणले मीठो गाए कि क्या हो, शिक्षिकाले स्वाबास दिँदै भनिन्, 'तिमीले राम्रो गायौ ।'

यो शब्द प्रविणको कलिलो दिमागमा यसरी दब्यो कि उनले गायकीको विकल्प नै सोचेनन् । विभिन्न संगीत कक्षाहरू लिए । सानै उमेरदेखि संगीत सिकेका प्रविणले ब्याचलर्स पढ्दै गर्दा पनि संगीत सिकाइलाई रोकेनन् ।

सिक्न त सिके, तर प्रविणलाई आफ्नै स्वर फिक्का लाग्दै गयो ।

'सिकिरहेको छु, सबै प्रकारका गीतहरू गाउन सक्छु । तर मैले साँच्चिकै राम्रो गाउन सक्छु त ?,' यो प्रश्नले प्रविणलाई लखेटिरहेको थियो ।

प्रविण एक कार्यक्रमका लागि तीन महिना बस्ने गरी चितवनमा थिए । त्यही समय नेपाल आइडलको अडिसन चलिरहेको प्रविणले पत्तो पाए । आफूलाई जाँच्ने सोच बनाइरहेका प्रविणको ध्यान नेपाल आइडलले तान्यो ।

प्रविण अडिसन दिन चितवनबाट बुटवल पुगे । उनी भन्छन्, 'मेरो उद्देश्य भनेको छनोट हुनु थिएन । मलाई त सिर्फ आफ्नो परीक्षा लिनु थियो । अग्रजहरूबाट मेरो स्वरको विषयमा प्रतिक्रिया सुन्नु थियो ।'

वर्षाैंदेखि संगीत सिकेको त्यहाँ काम लाग्यो । तीनै जना जजको प्रशंसासहित प्रविण आइडलका लागि छनोट भए ।

छनोट हुँदाको भन्दा खुसी उनी त्यो बेला थिए, जब न्ह्यु वज्राचार्यले उनको प्रशंसा गरेका थिए । 'मलाई एकदमै मन पर्ने संगीतकार तथा गायक हुनुहुन्छ न्ह्यु सर,' प्रविण भन्छन्, 'उहाँले राम्रो छ भनेपछि म बाहिरिएको भए पनि मलाई चित्त दुख्ने थिएन ।'

अडिसनमा छनोट भए पनि प्रविणले आफ्नो यात्रा लामो होला भन्ने सोचेकै थिएनन् । केही भागबाट नै आफू आउट हुन्छु भन्ने डर उनलाई छदैँ थियो । त्यसैले पनि उनी थप मिहिनेत गर्थे ।

आखिर मिहिनेत नै त रै'छ, जसका कारण प्रविणले राम्रो गाउन सके, दर्शकको साथ र माया पाए, फाइलनसम्मको यात्रा तय गरे ।

०००

नेपाल आइडलले आफूलाई धेरै कुराहरू दिएको प्रविण बताउँछन् । आफ्नो अस्तित्व चिनायो, आफ्नो क्षमता पहिचान गराइदियो । त्योभन्दा ठूलो यत्तिका दर्शकसामु परिचित गरायो ।

प्रविण भन्छन्, 'मैले संगीतमा दुःख गरिरहेको नै थिएँ । तर, मलाई यो स्थान बनाउन १० वर्ष लाग्थ्यो होला । आज मलाई नेपाल आइडलले छोटो समयमा नै यो स्थान दिएको छ । यो कुरालाई बिर्सिन मिल्दैन ।'

आफ्नो मूल्य पत्तो नहुँदासम्म जुनसुकै सामान सस्तोमा बिक्री भइरहेको हुन्छ । जब क्षमता र महत्त्व चिन्छ, तब उक्त सामानको मूल्य राम्रो मिल्छ । प्रविणले पनि यो कुरा मज्जाले नै महसुस गर्न पाए ।

नेपाल आइडलको उपाधि जित्न नसकेकोमा प्रविणलाई गुनासाे छैन । किनभने उनले धेरै अग्रजहरूबाट राम्रो प्रतिक्रिया पाएका छन् । धेरैले उनलाई भन्ने गरेका छन्, 'यो त ट्रेलर हो । असली प्रतिस्पर्धा अब सुरु हुन्छ ।' त्यसका लागि पनि प्रविण तयार छन् ।

अबको योजना

नेपाल आइडलबाट बाहिरिएपछि प्रविणलाई गीत रेकर्डिङ भ्याई-नभ्याई नै परेको छ । उनले यही बीचमा झण्डै एक दर्जन गीत रेकर्ड गराइसकेका छन् ।

आफूलाई माया गरेर यो स्थानसम्म पुर्‍याउने दर्शकको विश्वासलाई मर्न नदिने सोचले प्रविण निरन्तर काम गरिरहेका छन् । भन्छन्, 'मलाई सपोर्ट गर्नुहुने दर्शक र स्राेताको ऋण तिर्छु म भन्दिनँ । किनभने म ऋणमुक्त भएँ भने मलाई कसैको मतलब हुँदैन । त्यसैले उहाँहरूको ऋण तिर्नलाई भन्दा पनि उहाँको विश्वास जित्नलाई काम गर्नेछु ।'

प्रविण गीत छनोटमा निकै सतर्क छन् । आफूलाई सुहाउँदो गीत भए मात्र उनी गाउन सुरिन्छन् । नत्र विकल्पसहित उनी नाइँ भनिदिन्छन् । उनैलाई रोजे उनी कम्पोज आफूलाई सुहाउने गराउन आग्रह गर्छन् ।

प्रविण भन्छन्, 'आफूलाई नसुहाउने गीत गायो भने न यताको न उताको भइन्छ । त्यसैले म त गीत छनोटमा निकै सतर्क छु ।'

०००

सानै उमेरदेखि प्रविणको इच्छा पूरा गर्न हजुरआमा परिवारसँग लडिन् । आज प्रविणले हजुरआमा सत्य भएको प्रमाणित गरिदिएका छन् ।

त्यस्तै, नेपाल आइडलको यात्रामा प्रविणलाई जिताउन ठूलै जमात लडिरह्याे । उनीहरूलाई पनि अब सांगीतिक कोसेलीबाट सत्य सावित गर्न प्रविण निकै मिहिनेत गरिरहेका छन् ।

आफ्ना शुभचिन्तकलाई उनी विश्वास दिलाउँदै भन्छन्, 'एक दिन यहाँहरूले मेरो गीत गाडी चढ्दासमेत सुन्न पाउनुहुनेछ ।'

प्रकाशित मिति: शनिबार, असोज ३, २०७७ १२:५०