के गर्दै छन् साना कम्युनिस्ट घटक ?

A+ A A-

केपी शर्मा ओली र पुष्पकमल दाहाल नेतृत्वको नेकपाले सोमबार राजधानीको प्रज्ञा प्रतिष्ठानमा भव्य कार्यक्रमको तयारी गरिरहँदा अन्य केही कम्युनिस्ट घटकहरु भने पार्टी स्थापना दिवस ‘सर्वहारा शैली’मा मनाउने चाँजोपाँजो मिलाउँदैछन् ।

कम्युनिस्ट पार्टी स्थानपनाको ७० औं वार्षिकोत्सव मनाउँदै गर्दा दुई तिहाइ मतसहित सत्तामा रहेको नेकपाले विभिन्न कालखण्डमा विभाजित पार्टी र आन्दोलनलाई एकताबद्ध गरेको दाबी गर्दै आएको छ । उसको यो दबीसँग असहमति राख्ने झण्डै आधार दर्जन कम्युनिस्ट घटकहरु अस्तित्वमा छन् । त्यसैले कम्युनिस्ट पार्टी स्थापनाको ७० औं वर्षको कार्यक्रम उनीहरु आफ्नै कार्यालयमा मनाउँदैछन् ।

एकातिर दुई तिहाइ नेतृत्वको सरकारसहितको कम्युनिस्ट पार्टी छ, अर्कोतर्फ आफूलाई सच्चा ‘क्रान्तिकारी’ देखाउन खोज्ने साना कम्युनिस्ट घटकहरु छन् । उनीहरु विचारको राजनीति भन्दै पार्टीको छुट्टै अस्तित्व जोगाउन संघर्षरत छन् ।

अझै साम्यवाद ल्याउन सकिने सैद्धान्तिक विश्वासले मोहन वैद्यलाई छाडेको छैन । त्यसैले तत्कालीन माओवादीबाट विद्रोह गरी हाल नेकपा क्रान्तिकारीको नेतृत्व गरिरहेका छन् । रजधानीमा हालै विरोध प्रदर्शन गरेका वैद्यले देशभक्त गणतान्त्रिक मोर्चा भनेर अन्य केही समूहलाई पनि जोडेका छन् ।

वैद्य समूहबाट फुटेको अर्को घटकको नेतृत्व नेत्रविक्रम चन्चले गरेका छन् । नेपाल कम्युनिस्ट पार्टीकै नामबाट सञ्चालिच चन्द समूहले भने अरु कम्युनिस्टभन्दा अलिक भिन्न बाटो रोजेको छ ।