होम आइसोलेसनमा के गर्ने ? के नगर्ने ?

A+ A A-

लक्षण नभएका कोरोना भाइरस (कोभिड–१९) संक्रमितलाई होम आइसोलसेनमा राखिएको छ । सोमबारको तथ्यांकअनुसार देशभर ७ हजार २ सय ७५ संक्रमित होम आइसोलेसनमा छन् । लक्षण भएका र जटिल बिरामीले अस्पतालको बेड भरिएपछि लक्षण नभएका संक्रमितलाई होम आइसोलेसनमा राख्न थालिएको हो । होम आइसोलेसनमा रहेका संक्रमितले स्वास्थ्यका मापदण्ड पालना गरेन भने कोरोना भाइरस परिवार/समुदायमा फैलिने उच्च जोखिम हुन्छ ।

शुक्रराज ट्रपिकल तथा सरुवा रोग अस्पताल टेकुका रिसर्च युनिटका प्रमुख डा. शेरबहादुर पुनलाई होम आइसोलेसनमा कसरी सुरक्षित बस्ने ? के गर्ने ? के नगर्ने ? भनेर सोधेका छौँ । डा. पुनको सुझाव यस्तो छ ।

कस्तो हुनुपर्छ होम आइसोलेसन ?

होम आइसोलेसन भनेको घर भएका संक्रमित व्यक्तिलाई राख्ने ठाउँ हो । जसको आफ्नो घर छ । जनस्वास्थ्यको मापदण्ड पालना गर्न सक्छ भने होम आइसोलेसनमा बस्दा उपयुक्त हुन्छ ।

महामारी फैलिएको समयमा सबैलाई अस्पतालमा राख्न सकिँदैन । अस्पतालमा ठाउँ नहुँदा स्वास्थ्यकर्मीको निगरानीमा घरमै राख्ने हो । जसलाई ठूलो समस्या छैन तर संक्रमित छ भने घरमै राखिन्छ । होम आइसोलेसनमा संक्रमितका लागि छुट्टै कोठा हुनुपर्छ । हावा र घाम छिर्ने कोठा हुनुपर्छ । संक्रमितले प्रयोग गर्ने ट्वाइलेट बाथरुम छुट्टै हुनुपर्छ । यदि सबैले एउटै प्रयोग गरेको छ भने समयसमयमा डिसइन्फेक्ट गर्नुपर्छ ।

मनोरञ्जनमा जोड

संक्रमितलाई एक्लो महसुस हुन नदिन रेडियो, टेलिभिजन, इन्टरनेट, किताबलगायत सामग्री प्रयोग गर्न दिइनुपर्छ । आइसोलेसनमा समय कसरी बिताउने भन्ने समस्या हुन्छ । यसले संक्रमितमा मानसिक समस्या ल्याउन सक्छ । मानसिक समस्या हुन नदिन फिल्म हेर्ने, रेडियो सुन्ने, टेलिभिजन हेर्ने, पत्रपत्रिका र किताब पढ्ने के रुचि छ, त्यो व्यवस्था गरिदिनुपर्छ । संक्रमितलाई एक्लो अनुभूति हुन दिनु हुँदैन ।

इन्टरनेटको प्रयोग गर्दा नकारात्मक कुरा धेरै आउन सक्छन् । सकेसम्म नकारात्मक कुराबाट टाढै बस्ने । स्वास्थ्यलाई कसरी स्वस्थ राख्ने ? के खाने ? सकारात्मक कुराहरू मात्र इन्टरनेटबाट हेर्नुपर्ने हुन्छ ।

खानपानमा ध्यान

होम आइसोलेसनमा बस्दा खानपानमा विशेष ध्यान दिनुपर्छ । इम्युनिटी पावर राम्रो भयो भने भाइरसलाई छिटो परास्त गर्न सकिन्छ । त्यसका लागि झोलिलो पदार्थ नियमित खाने गर्नुपर्छ । कसरी हुन्छ आफ्नो शरीरलाई स्वस्थ राख्ने कुरा मात्र खानुपर्छ ।

बिहानबेलुका ज्वरो नाप्ने, अक्सिजनको लेबल कस्तो छ भनेर अक्सिमेटर हेर्ने गर्नुपर्छ । अक्सिजन कम भएमा, सास फेर्न गाह्रो भएमा, छाती दुखेमा तत्काल अस्पताल जाने वातवरण पहिले नै बनाउनुपर्छ । अस्पताल र एम्बुलेन्ससँग समन्वय हुनुपर्छ ।

ब्यायाम गर्ने

शरीरलाई स्वस्थ राख्न बिहान ब्यायाम गर्न पनि सकिन्छ । बिहान केही समय ब्यायाम गर्ने हो भने मनोबल पनि बढ्छ । संक्रमित भएपछि मनमा डर र अनेक कुरा खेल्न सक्छन् । त्यसबाट जोगाउन परिवारको ठूलो भूमिका हुन्छ । परिवारका सदस्यले बेलाबेलामा के छ कस्तो छ भने सोध्नुपर्छ । संक्रमित छुट्टै कोठामा बस्ने भएकाले एक्लै छोड्ने होइन । नियमित सम्पर्कमा रहनुपर्छ । संक्रमितलाई परिवार साथमा छ भन्ने बनाउनुपर्छ ।

परिवार र समाजलाई जोगाउने

संक्रमित घरमै हुने भएकाले परिवारको अन्य सदस्यलाई भाइरस सर्नबाट जोगाउनुपर्छ । संक्रमित र परिवारका अन्य सदस्यले जनस्वास्थ्यको मापदण्ड पालना गर्नुपर्छ । दूरी कायम गर्ने, मास्क लगाउने, नियमित साबुनपानीले हात धुने गर्नुपर्छ ।

मापदण्ड पालना नगर्ने हो भने भाइरस परिवारमै फैलिन सक्छ । संक्रमित घरबाहिर निस्कने, परिवारसँग घुलमिल गर्ने भयो भने अर्को महामारी निम्तlन सक्छ । त्यसैले स्वास्थ्यका मापदण्ड पालना गरियाे भने होम आइसोलेसन पनि सफल हुन्छ ।

प्रकाशित मिति: मंगलबार, भदौ ३०, २०७७ २१:२०