भुपरिवेष्ठित तर विविधताको चिडियाघर जिम्बावे

A+ A A-

जिम्बावे प्रकृतिप्रदत्त स्रोतसाधन र जीव तथा वनस्पतिका हिसाबले विश्वको पहिलो श्रेणीको देशमा पर्छ । सिंगो अफ्रिकालाई विश्वको प्राकृतिक चिडिया घर भनिए पनि त्यसमा सबैभन्दा बढी आकर्षक भाग जिम्बावेमा पर्छ ।

यसको सीमा रेखाका हिसाबले जिम्बावे आफैमा भूपरिवेष्ठित देश हो । तर देशको लगभग बिच भागमा पर्ने जिम्बावेयी नदीका कारणले यो आफैमा भूपरिवेष्ठित हुँदाहुँदै पनि प्राकृतिक विविधताको स्वर्ग बन्न पुगेको छ ।

विविध प्रकार र प्रजातिका जन्तु जनावर तथा रुख बिरुवाका साथै प्राकृतिक दृश्यावलोकनका हिसाबले जिम्बावे संसारकै पहिलो श्रेणीको पर्यटकीय देश हो । यो देशको बीचमा पर्ने भिक्टोरिया झरना यसको श्रेष्ठ लौकिक वरदान हो ।

यसका कारणले अतुलनीय तथा निकै आकर्षक दृश्यहरु यहाँ सिर्जना हुन पुगेका छन् । यही प्राकृतिक सौन्दर्य र सन्तुलनका कारण विश्वका मानिसहरु जिम्बावे भ्रमणलाई जीवनमा एकपटक पुग्नै पर्ने गन्तव्यका रुपमा डायरीमा लेखेर राखेको पाइन्छ । पश्चिमाहरुको लागि यो एक स्वर्गका रुपमा लिइन्छ ।

जिम्बावे शब्दले बहुमूल्य पत्थरहरु भएको घर भन्ने अर्थ दिन्छ । पश्चिमा पर्यटकहरुले यसलाई निकै नजिकबाट चिन्ने गरेका छन् । जिम्बावे कुनै समय बेलायती उपनिवेशअन्तर्गत थियो ।

सन् १८९० देखि १९६५ सम्म बेलायती शासनअन्तर्गत रहेको जिम्बावेले १९८० पछि मात्र पूर्ण रुपमा स्वतन्त्रता पाएको थियो ।

जिम्बावेमा जन्तु प्रजातिमा ब्वाँसो, चितुवा, सिंह, हात्ती, गैंडा, अर्ना तथा जरायोहरु पाइन्छन् । जिराफलगायतका अति लोपोन्मुख जनावरहरु पनि यहाँ पाइन्छन् । अन्य प्रजातिका जनावरहरु त यहाँ सामान्य जस्तै पाइन्छन् ।

यहाँको असीम आनन्द भनेको भिक्टोरिया झरनाको दृश्य हो । यो यति धेरै मनमोहक छ । पर्यटकहरु तथा खोजकर्ता र अन्वेषकहरु महिनौ दिन यसका विविध पक्षहरु हेर्न र अवलोकन गर्न बिताउँछन् । उत्तर पश्चिमबीचमा पर्ने यो अद्वितीय उपहार संसारमा कतै पनि छैन ।

यहाँको सबैभन्दा सौन्दर्यको भाग ह्वांगे राष्ट्रिय निकुञ्जमा समेटिएको छ । यो निकै खुल्ला र आकर्षक छ ।

ठूलाठूला खुला तथा समथर परेका घाँसे मैदानहरु भएकाले पनि पर्यटकहरु निकै सुरक्षितसाथ आफ्ना यातायातका साधन लिएर निकै नजिक गई अध्ययन तथा अवलोकन गर्ने अवसर पाएका छन् । त्यसैले पनि यो विश्वको एक नम्बरको गन्तव्य बन्न गएको हो ।

जिम्बावेका ठूला भागहरु जंगलले भरिएका छन् । यी जंगलहरुमा जन्तु जनावरहरु निकै विविधता र प्रजातिका रहेका पाइन्छन् । यहाँको विविधतामा जति जनावरहरु पाइन्छन्, ती अन्यत्र कहीं पनि पाइँदैनन् ।

१०७ प्रजातिका जनावर र ४०० प्रजातिका चराहरु पाइन्छन् । यी सबै प्रकारका जन्तु जनावर र चराहरु बुलावायो र भिक्टोरिया झरनाको बीचमा रहेको जंगलमा पाइन्छन् ।

जिम्बावे अफ्रिकाको सबैभन्दा बढी साक्षरता दर भएको देश हो । तर यहाँको मानिसको आयु निकै कम छ । यहाँको जनसंख्याको आधाभन्दा बढी मानिसहरु २१ वर्षमुनिका रहेका छन् । भनिन्छ, महिला तथा पुरुषको सरदर आयु ४० देखि ४५ वर्षसम्मको मानिन्छ ।
जिम्बावेको अर्को एउटा आश्चर्य पनि रहेको छ । त्यो हो यहाँ मानिसले बनाएको संसारको सबैभन्दा ठूलो पानीको ताल रहेको छ । यसले जीव जनावरलाई पानी आपूर्ति गर्नुका साथै प्रकृतिले दिएको विविधतामा थप सौन्दर्यता पनि थपेको छ ।

यहाँ आश्चर्यलाग्दा चट्टानहरु पनि पाइन्छन् । पत्थरको घर भनिने जिम्बावे आफैमा पनि बहुमूल्य पत्थरको खानी हो । यहाँका जनताको आर्थिक जीवनस्तर केही राम्रो र उच्च पनि छ । यहाँ सुन, स्टिल, सिमेन्ट, काठ तथा केही रसायन उत्पादन र वितरण गरिन्छ ।

प्रकाशित मिति: बिहीबार, भदौ २५, २०७७ १८:४८