पीसीआर मेसिनमा फेरि प्रश्न : काठमाडौंमा नेगेटिभ, जनकपुरमा पोजिटिभ

A+ A A-

गत १० भदौमा महोत्तरीको मनरा सिसवा नगरपालिका- ४ का ४० वर्षीय स्वास्थ्यकर्मीको कोरोना भाइरस (कोभिड- १९) संक्रमणबाट मृत्यु भयो । लगतै ती स्वास्थ्यकर्मीको सम्पर्कमा आएकाको खोजी कार्य सुरु गरियो ।

कन्ट्याक्ट ट्रेसिङको आधारमा १२ भदौमा ७८ जनाको स्वाब संकलन गरी पीसीआर परीक्षणका लागि प्रादेशिक जनस्वास्थ्य प्रयोगशाला जनकपुरधाम पठाइयो । जसमध्ये पाँचजनाको कोरोना रिपोर्ट पोजिटिभ आयो । तर, संक्रमणको कुनै लक्षण नदेखिएपछि पोजिटिभ देखिएका मध्ये ३१ वर्षीय पुरुषले जनकपुरको प्रयोगशालाको रिपोर्ट आउनुअघि नै ललितपुरस्थित स्टार हस्पिटलमा स्वाब संकलन गराएका थिए । त्यहाँ गरिएको परीक्षणमा भने उनको रिपोर्ट नेगेटिभ आयो ।

कन्ट्याक्ट ट्रेसिङकै आधारमा गरिएको पीसीआर परीक्षणमा पोजिटिभ रिपोर्ट आएका अर्का पुरुषलाई समेत रिपोर्टमाथि शंका लाग्यो । मनरा सिस्वा नगरपालिका- ४ का ५० वर्षीय ती पुरुषसमेत ललितपुरस्थित स्टार हस्पिटलमा कोरोना परीक्षण गराए । त्यहाँ परीक्षण गराउँदा बिहीबार उनको रिपोर्ट पनि नेगेटिभ आयो । फरक रिपोर्ट आएपछि अहिले दुवैजना तनावमा परेका छन् । यद्यपि, कन्ट्याक्ट ट्रेसिङ गरिएका ७८ जनामध्ये अन्य ६२ जनाको पीसीआर रिपोर्ट आउन बाँकी छ ।

प्रादेशिक जनस्वास्थय प्रयोगशाला जनकपुरमा फरक रिपोर्ट देखाएको यो पहिलो घटना भने होइन । त्यहाँ गलत रिपोर्ट देखाएको भन्दै स्वास्थ्य तथा जनसंख्या मन्त्रालयको निर्देशनमा दुई पटक मेसिन फेरबदल गरिसकेको छ । यहाँबाट अहिले तेस्रोपटक जडान गरिएको आरटी-पीसीआर मेसिनबाट स्वाब परीक्षण हुँदै आएको छ । तर, फेरि पनि फरक नतिजा देखिएपछि प्रयोगशालाको रिपोर्टमाथि प्रश्न उठ्न थालेको छ ।

प्रादेशिक जनस्वास्थ्य प्रयोगशाला जनकपुरका निर्देशक डा. श्रवणकुमार मिश्रले १/२ दिनको फरकमा परीक्षण गराउँदा रिपोर्ट फरक आउन सक्ने बताउँछन् । कोभिड- १९ को विभिन्न पाटा हुने भन्दै एकजना संक्रमितमा करिब तीन महिनासम्म शरीरका भागमा भाइरस रहन सक्ने भएकाले रिपोर्ट फरक-फरक आएको हुनसक्ने डा. मिश्रले बताए ।

‘स्वाब संकलन पनि राम्रोसँग गरेन भने नतिजा नेगेटिभ आउन सक्छ,' उनले भने, ‘यहीको पोजिटिभ मानिसको जाँच गर्ने व्यक्तिले डराइडराइ स्वाब संकलन गर्‍यो भने उसको रिपोर्ट नेगेटिभ आउँछ ।’ जनकपुर प्रयोगशालाको रिपोर्ट गलत नरहेको उनको दाबी छ ।

प्रकाशित मिति: शनिबार, भदौ २०, २०७७ १६:२७