प्रदेश २ मा थप २ कोरोना संक्रमितको मृत्यु

A+ A A-

वीरगञ्ज र राजविराजमा थप २ काेराेना संक्रमितकाे मृत्यु भएको छ । रौतहटका राजपुर नगरपालिकाका ४० वर्षीय पुरुष र राजविराज नगरपालिका- २ की ६५ वर्षीया महिलाको संक्रमणबाट मृत्यु भएको हो ।

नारायणी अस्पताल मातहात रहेको अस्थायी कोभिड विशेष अस्पताल गण्डक अस्पतालमा ४० वर्षीय पुरुषको आइतबार बिहान मृत्यु भएको जिल्ला प्रशासन कार्यालय पर्साले जनाएको छ ।

संक्रमण पुष्टि भइसकेपछि १२ भदौमा उनलाई अस्पताल भर्ना गरिएको थियो । उनलाई निमोनिया र श्वासप्रश्वासमा समस्या भएको बताइएको छ । यस्तै गजेन्द्र नारायाण सिंह सगरमाथा अस्पताल राजविराजमा परीक्षण गर्दा कोरोना पोजिटिभ आएकी महिलाको समेत मृत्यु भएको छ ।

अस्पतालको इमर्जेन्सी कक्षमा उपचार भइरहेको ती महिलालाई शनिबार राति सास फेर्न गाह्रो भएपछि थप उपचारका लागि बीपी कोइराला स्वास्थ्य विज्ञान प्रतिष्ठान धरान रेफर गरिएको थियो । तर, धरानतर्फ लग्ने क्रममा बाटोमै उनको मृत्यु भएको जिल्ला जनस्वास्थ्य कार्यालयका प्रमुख दुनियालाल यादवले जानकारी दिए ।

थप ७९ जनामा कोरोना पुष्टि

वीरगञ्जस्थित नरायणी अस्पतालमा शनिबार राति विभिन्न स्थानबाट आएका व्यक्तिहरूको स्वाब परिक्षण गर्दा थप ७९ जनामा कोरोना पुष्टि भएको छ । संक्रमण देखिएका व्यक्तिहरू पर्सा, बारा, मोरङ र काठमाडौंका रहेको जिल्ला प्रशासन कार्यालय पर्साले जनाएको छ ।

प्रशासकीय अधिकृत विनयप्रसाद श्रीवास्तवका अनुसार सङ्क्रमण पुष्टि भएकामध्ये पर्साको विभिन्न पालिकाका ४७ जना, बाराका ३० जना र मोरङ र काठमाडौंका १/१ जना रहेका छन् । थपिएका सङ्क्रमित ६ महिनाको शिशुदेखि ९७ वर्षको वृद्ध पनि छन् । ४ सय ४२ जनाको स्वाबलाई परीक्षण गर्दा ७९ जनाको नतिजा पोजिटिभ आएको उनले बताए ।

प्रकाशित मिति: आइतबार, भदौ १४, २०७७ १६:४३