कोरोना संक्रमणबाट वीरगञ्जमा थप ३ जनाको मृत्यु

A+ A A-

कोरोना संक्रमणबाट वीरगञ्जमा थप ३ जनाको मृत्यु भएकाे छ । बुधबार रातिदेखि बिहीबार दिउँसोसम्म संक्रमणबाट थप ३ जनाको मृत्यु भएको जिल्ला प्रशासन कार्यालय पर्साले जनाएकाे छ ।

मृत्यु हुनेमा वीरगञ्ज महानगरपालिका- १४ का ६२ वर्षीय पुरुष, धोवनी गाउँपालिका-३, गुलरियाका ७२ बर्षीय पुरुष र बाराको सुवर्ण गाँउपालिका- ४, हर्दिया गाउँकी २३ वर्षीया गर्भवती महिला छन् ।

वीरगञ्जका ६२ वर्षीय पुरुषको वीरगन्ज हेल्थ केयर कोभिड अस्पतालमा बिहीबार बिहान मृत्यु भएको हो । ३० साउनमा संक्रमण पुष्टि भएपछि सोही दिनदेखि उनलाई सो अस्पतालमा भर्ना गरिएको थियो ।

मिर्गौला रोगी ती पुरुषमा निमोनियाको पनि समस्या रहेको बताइएको छ । उपचारका क्रममा आज बिहान उनको मृत्यु भएको जिल्ला प्रशासन कार्यालका प्रशासकीय अधिकृत विनयप्रसाद श्रीवास्तवले जानकारी दिए ।

यस्तै, नारायणी अस्पतालमा उपचाररत बाराको सुवर्ण गाउँपालिकाकी गर्भवती महिला श्वासप्रश्वासलगायतका स्वास्थ्य समस्या देखिएपछि ८ भदाैमा नारायणी अस्पतालमा भर्ना भएकी थिइन् ।

स्वाब परीक्षण गर्दा बुधबार उनको काेराेना रिपोर्ट पोजिटिभ आएको प्रशासकीय अधिकृत श्रीवास्तवले जानकारी दिए ।

यसैगरी, नारायणी अस्पतालको आइसाेलेसन वार्डमा उपचाररत पर्साको धोवनी गाउँपालिकाका ७२ वर्षीय वृद्धकाे बुधबार राति मृत्यु भएको श्रीवास्तवले बताए । उनका अनुसार ती वृद्धलाई ज्वरो आउनुका साथै श्वासप्रश्वासकाे समस्या पनि थियाे ।

प्रकाशित मिति: बिहीबार, भदौ ११, २०७७ १९:२१