तिनाउ र दानव कोरिडोर निर्माण सुरु, भएन ७ सय घरटहराकाे व्यवस्थापन

पाल्पाको नुवाकोट खिचिएको बुटवल बजार/तस्वीर : शिलापत्र

A+ A A-

रूपन्देहीमा तिनाउ र दानव कोरिडोर सडक निर्माण सुरु भएको छ । तिनाउ र दानव नदीको दीर्घकालीन व्यवस्थापन तथा पर्यटनको विकासका लागि महत्त्वकांक्षी तिनाउ र दानव कोरिडोर सडक निर्माण आजबाट सुरु भएको हो ।

काेरिडाेरको पहिलो चरणमा ५० किलोमिटर सडकको डीपीआर तयार भएको छ । सोमध्ये अहिले तिनाउतर्फ साढे आठ र दानव नदीतर्फ तीन किलोमिटर सडक निर्माण सुरु भएको हो ।

गत असोजमा ठेक्का स्वीकृत भएको उक्त काम तिनाउतर्फ बुटवल उपमहानगर बसपार्कपछाडिको जिरो प्वाइन्टबाट तिलोत्तमा नगरपालिकाको मगरघाटसम्म र दानवपट्टी बेलबासको झोलुङ्गे पुलदेखि नयाँ गाउँको पुलसम्म काम हुने डिभिजन सडक कार्यालय बुटवलका इञ्जिनियर कृष्ण कुँवरले जानकारी दिए ।

तिनाउ काेरिडाेर निर्माणमा ५२ करोड ४६ लाख रुपैयाँ लागत लाग्नेछ । सो काेरिडाेरको किराँतेश्वर मैनाचुली अविसा जेबिलेसँग ३६ महिनामा निर्माण सम्पन गर्ने सम्झौता भएको छ । त्यस्तै, दानव काेरिडाेर निर्माणका लागि १९ करोड ४२ लाख रुपैयाँमा २७ महिनामा सक्ने गरी लामा बानियाँ जेबीले ठेक्का सम्झौता गरेको छ ।

निर्माण सम्झौताअनुसार २२ मिटर चौडाइको सडक क्षेत्रमध्ये किनारतर्फको १० मिटर ग्रिनरी अर्थात् रूख रोपेर हरियाली बनाइने र बाँकीमा १२ मिटरमा सडक संरचना हुने इञ्जिनियर कुँवरले बताए ।

घरटहरा व्यवस्थापन गर्न बाँकी

तिनाउ र दानव नदी किनारमा काेरिडाेरको काम सुरु भए पनि काेरिडाेर क्षेत्रमा पर्ने घरटहरा भने व्यवस्थापन गर्न अझै बाँकी छ । काेरिडाेर निर्माणअघि सो क्षेत्रमा पर्ने घरटहरा व्यवस्थापन गर्ने स्थानीय तहहरूले बताए पनि अहिलेसम्म व्यवस्थापन भने गर्न सकेका छैनन् ।

काेरिडाेर क्षेत्रमा बुटवल उपमहानगरपालिका, तिलोत्तमा नगरपालिका तथा सैनामैना नगरपालिकाका ७ सय ५ घरटहरा रहेको डिभिजन सडक कार्यालय बुटवलले जनाएको छ ।

सडक डिभिजन कार्यालय बुटवलका इञ्जिनियर कृष्ण कुँवरले ती घरटहरालाई स्थानीय तहले व्यवस्था गर्नुपर्ने भए पनि अहिलेसम्म नगरिएको बताए । सडकले अधिकांश सुकुम्बासी बस्तीको क्षेत्र ओगट्ने भएकाले उक्त बस्ती व्यवस्थापन गर्नुपर्ने उनले बताए ।

निर्माण कार्य सुरु भएसँगै बुटवल उपमहानगरपालिकाले भने काेरिडाेरमा पर्ने घर टहराको विस्थापितको तथ्यांक निकाल्न लागेको छ । बुटवल उपमहानगरका मेयर शिवराज सुवेदीले घरधनीलाई खाली जग्गामा व्यवस्थापन गरेर काेरिडाेरको कामलाई नरोक्ने बताए ।

सैनामैना नगरपालिकाका मेयर चित्रबहादुर कार्कीले आफ्नो नगरक्षेत्रमा पर्ने काेरिडाेरमा खासै बस्ती नभएको हुँदा समस्या नहुने बताए । तिलोत्तमा नगरपालिकाले पनि आफ्नो क्षेत्रमा धेरै बस्ती नपर्ने भएकाले व्यवस्थापनमा समस्या नरहेको बताएको छ ।

५० किलोमिटरको काेरिडाेरका लागि ४ अर्ब लागत

तिनाउ र दानव नदीका दुवै किनरामा बन्ने यो सडकले बुटवलदेखि मर्चवारसम्मलाई जोड्नेछ । कोरिडोरअन्तर्गत ५० किलोमिटर सडक निर्माणको डीपीआर तयार भइसकेको छ । तिनाउ काेरिडाेरमा बुटवलबाट अमुवासम्म साढे १७ किलोमिटरका दरले दुवैतर्फ ३५ किलोमिटरको सडकको डीपीआर तयार भएको छ ।

त्यस्तै, दानव काेरिडाेरमा बुटवलबाट कर्शाघाटसम्म साढे ७ किलोमिटरका दरले दुवैतर्फको १५ किलोमिटरको लागि डीपीआर तयार भएको हो । डीपीआर भएका दुवै काेरिडाेरको ५० किलोमिटर सडकको लागि ४ अर्ब १३ करोड रुपैयाँ लागत अनुमान गरिएको छ । बजेट आएमा बाँकी ठाउँमा पनि ठेक्का प्रक्रियाअघि बढाउने इञ्जिनियर कुँवरले बताए ।

प्रकाशित मिति: बुधबार, मंसिर १०, २०७७ १५:२५