बेपरवाह जनकपुर : घोषणामै सीमित निषेधाज्ञा

फाइल तस्वीर

A+ A A-

चिल्लो सडकमा पैदलयात्रीसँगै मोटरसाइकल र ई-रिक्साको लर्को छ । सडकको दुबै छेउतिरर फलफूल र तरकारीको ठेला । ग्राहक तान्न व्यापारीबीच प्रतिस्पर्धा चलिरहेको छ । ग्राहकको भीड पनि उत्तिकै छ । तर, यी भीडमा मास्क लगाउने बिरलै देखिन्छन् । लगाउनेहरू केहीले नाकको टुप्पो छोप्नुपर्ने मास्क पनि चिउँडोमुनि पुर्‍याएका छन् ।

प्रहरीको भ्यान देख्दा उनीहरूमध्ये केही सर्तक भएकोजस्तो हाउभाउ देखाउँछन् । र, प्रहरी हिँडिसकेपछि फेरि सबैको उस्तै सुरताल ।

औषधि पसलसँगै कपडा, किराना र फेन्सी पसलका सटरसमेत खुलेकै छन् । रामानन्द चोक, पिडारी चोकलगायतका स्थानमा होटेलसमेत खुलेकै छ । हल्का मात्र सटर उठाएर खोलिएको होटेलभित्र खाना र खाजा खानेको भीड पनि उस्तै छ । यस्तै दृष्य देखिन्छ जनकपुरमा जहाँ गत २९ साउनदेखि नै जिल्ला प्रशासन कार्यालयले निषेधाज्ञा जारी गरेको छ ।

प्रदेश-२ का अधिकांश जिल्ला तथा स्थानीय तहमा समेत कोरोना भाइरसको संक्रमण फैलिन नदिन निषेधाज्ञा लागू गरिएको छ । निषेधाज्ञा अवधिभर औषधि पसल, खाद्यान्न, फलफूल तथा तरकारी, अस्पताल तथा स्वास्थ्य केन्द्र सञ्चालनसम्बन्धी सेवा, सञ्चार सेवा, बैंकिङ्ग सेवा, खानेपानी, इन्धन, विद्युत सेवालगायतका बाहेक अन्य सवारी साधन सञ्चालनमा रोक रहेको भनिएको छ । तर, स्थानीय प्रशासनले तोकेका बाहेक सवारी साधन निर्वाध रूपमा हिँडिरहे पनि कसैले रोकताेक गरेको छैन ।

निषेधाज्ञा लागू भएको १/२ दिन केही हदसम्म कडाइ गरिए पनि त्यसपछि भने अधिकांश पसल खुलेपछि बजारमा भीडभाड बढेको छ । निषेधाज्ञाकै अवधिमा तरकारी पसलदेखि बैंक र सडकहरूमा भीडभाड भइरहे पनि कडाइ गर्ने निकायको उपस्थिति शून्य प्रायः भइसकेको स्थानीयको भनाइ छ ।

‘यहाँ सबथोक खुलेकै छ । बजारमा भीडभाड देखिएकै छ । यहाँ त प्रशासन नै चाहन्छन् कि कोरोना फैलियोस् नभए यो के गर्न खोजिएको हो ? प्रशासनले कि त कडाइकासाथ निषेधाज्ञा पालना गराउनुपर्‍याे कि त नाममात्रको निषेधाज्ञा हटाउनपर्‍याे,’ स्थानीय विनोद मण्डलले भने ।

जनकपुर लगायतका अधिकांश स्थानमा समुदायस्तरमा कोरोना संक्रमण फैलिसकेको भन्दै औषधि व्यवसायी प्रमोद यादवले स्थानीय सरकारले कडाइकासाथ निषेधाज्ञा पालना नगराए भयावह अवस्था आउने दाबी गरे ।

यसअघि निषेधाज्ञा आदेश पालन गराउन चोकचोकमा खटिइने सुरक्षाकर्मीहरूको संख्यामा पनि कमी देखिन थालेको छ । ड्युटीमा खटिएकाहरू पनि भीडभाड हुन नदिन मतलब गरेका छैनन् । जनकपुर लगायत भीडभाड हुने अन्य स्थानमा प्रहरी भने भूमिकाविहीन बनेको स्थानीय रितेश पाठकले गुनासो गरे ।

‘दिनभरी सडकमा बिरलै प्रहरीको गाडी हिँडेको देख्छु । ढल्केवर-जनकपुर सडकखण्ड हुँदै सधैँ जनकपुर आउँछु । बजारमा भीडभाड देखिरहेको हुन्छु तर प्रहरी कतै देख्दिनँ । यस्तै रह्यो भने अब कोरोनाको नियन्त्रण सम्भव छैन्,’ स्वास्थ्यकर्मी अरबिन्द साहले भने, ‘मान्छेले कोरोनाको खतराबारे लागेपछि मात्र बुझ्दो रहेछ । जतिभन्दा पनि बुझ्दैन तर प्रहरी प्रशासन के गरी बसेको छ ? कडाई गर्नु पर्दैन ।’

धनुषाका प्रमुख जिल्ला अधिकारी प्रेमप्रसाद भट्टराईले निषेधाज्ञा कडाइकासाथ पालना गराउन प्रहरीलाई निर्देशन दिइसकेको बताए । ‘हामीले प्रहरी परिचालन गराइसकेका छौँ । कहाँ भीडभाड छ ? मलाई थाहा भएन । मलाई भन्नुस् म प्रहरी पठाइदिन्छु,’ उनले भने ।

प्रकाशित मिति: मंगलबार, भदौ ९, २०७७ १४:२१