आइसोलेसनमा सफाइका कर्मचारीले जाँच्छन् संक्रमितको स्वास्थ्य

A+ A A-

धनुषाको नगराइन नगरपालिकास्थित मिथिला आयुर्वेद मेडिकल कलेज तथा अनुसन्धान केन्द्रमा सञ्चालित आइसोलेसनमा सरसरफाइका कर्मचारीले कोरोना संक्रमितको जाँच गर्ने गरेको पाइएको छ ।

कोरोना संक्रमित व्यक्तिहरूले स्वास्थ्य समस्या आएको भन्दै पटकपटक स्वास्थ्यकर्मीलाई बोलाइरहेपछि शरीरको तापक्रम जाँचका लागि शनिबार उनीहरूले स्वीपरलाई पठाएका थिए ।

पीपीई लगाएर तापक्रम जाँच गर्ने क्रममा संक्रमित एक जना जनकपुरका संचारकर्मीले ती कर्मचारीलाई चिनेपछि उनीसित कुराकानी गर्दै भिडियो खिचेका थिए । सो भिडियो हिजैदेखि सामाजिक सञ्जालमा भाइरल बनेको छ ।

भिडियोमा ती संचारकर्मीले सोध्छन्–
‘तपाईं त सरसफाइ गर्ने कर्मचारी होइन ?’

जवाफमा उनले ‘हो’ भन्छन् ।

‘थर्मल गनमा तापक्रम कति देखिएको छ ?’ संक्रमित युवकको प्रश्नमा उनी भन्छन्– मलाई के थाहा ?

फेरि उनले प्रश्न गर्छन्, ‘तपाईँलाई टेम्परेचर नाप्न कसले भन्यो ?

‘डाक्टरले भन्नुभएको छ,’ ती सरसफाइ कर्मचारीले भन्छन् ।

आइसोलेसनमा बस्दै आएका संक्रमितहरूले स्वास्थ्यमा समस्या देखिएपछि स्वास्थ्यकर्मीलाई घण्टौँ बोलाउँदासमेत नआएको गुनासो गर्दै आएका छन् ।

यता भाइरल भएको भिडियोबारे गम्भीर ध्यानाकर्षण भएको भन्दै कोभिड– १९, धनुषाका संयोजक डा.जामुनप्रसाद सिंहले त्यसबारे सत्यतथ्य छानबिन गरी २४ घण्टाभित्र विवरण सार्वजनिक गर्ने बताएका छन् ।

‘क्वारेन्टाइनमा ड्युटीमा रहेका स्वास्थ्यकर्मीको टिमलाई प्रादेशिक अस्पताल जनकपुरमा झिकाइएको छ ।

सोका बारेमा छानबिन गरी सत्यतथ्य विवरण २४ घण्टाभित्र सार्वजनिक गरिनेछ ।

साथै, रिक्त भएको स्वास्थ्यकर्मीकाे टिमको ठाउँमा नयाँ टिम ७ भदाैदेखि खटाइनेछ,’ डा.सिंहद्वारा जारी विज्ञप्तिमा भनिएको छ । साथै, उनले स्वीपरले थर्मोगन प्रयोग गरी लिएको तापक्रमबारे अन्यथा नबुझ्नसमेत आग्रह गरेका छन् ।

‘अस्पतालको गेटदेखि सार्वजनिक सबै ठाउँमा गैरस्वास्थ्यकर्मीहरूले नै तापक्रम लिने गरेका छन् । स्वीपरले बिरामी जाँचेको होइन । नियमित रूपले चिकित्सक तथा हेल्थ असिस्टेन्टले तापक्रम र अन्य भाइटल लिने गरेका छन् । यद्यपि यस सम्बन्धमा अनुसन्धान गर्न ड्युटीमा रहेको स्वास्थ्य टोलीलाई फिर्ता बोलाइएको छ,’ उनले भने ।

प्रकाशित मिति: आइतबार, भदौ ७, २०७७ १८:०५