मानव तस्करीको जालो: कलाकारदेखि जनप्रतिनिधिसम्म

A+ A A-

उदयपुर त्रियुगा नगरपालिका–१२ का नारायणकुमार बस्नेत २५ फागुन २०७५ मा पक्राउ परे । २२ वर्षीया एक युवतीलाई भारतको बाटो हुँदै इराक पु¥याएको अभियोग प्रहरीको केन्द्रीय अनुसन्धान ब्युरो (सीआईबी)ले उनलाई उदयपुरबाट पक्राउ गर्यो ।

इरानबाट फर्किएर युवतीले १३ फागुनमा उजुरी दिएपछि उनी पक्राउ परे । हाल उनी मानव बेचबिखन मुद्दामा जिल्ला अदालत काठमाडौंको आदेशले थुनामा छन् ।

मानव तस्करीको अभियोगमा सीआईबीले नेपाली चलचित्रका चर्चित द्वन्द्व निर्देशक राजेन्द्र खड्गीलाई २५ माघ २०७४ मा काठमाडौंको ठमेलबाट पक्राउ गरेको थियो ।

फिल्म सुटिङका नाममा ११ जनालाई दक्षिण कोरिया लगेको र प्रतिव्यक्ति १० देखि १५ लाख रुपैयाँ लिएर उतै छाडेको अभियोग उनीमाथि लागेको थियो । उनी जिल्ला अदालत काठमाडौंको आदेशअनुसार ५ लाख रुपैयाँ धरौटीमा छुटे । जिल्ला अदालतको आदेशबिरुद्ध उनको मुद्दा पाटन उच्च अदालतमा विचाराधीन छ ।

नुवाकोटका कांग्रेस नेता सुनबहादुर तामाङ पनि मानव तस्करीको अभियोगमा पक्राउ परे । सीआईबीको टोलीले ४ पुस २०७४ मा उनलाई पक्राउ गरेको हो ।

नुवाकोट दुप्चेश्वर गाउँपालिका–१ का निर्वाचित अध्यक्ष तामाङबिरुद्ध गाउँका युवतीलाई भारतका कोठीमा बेचेको अभियोग छ ।उनको मुद्दा जिल्ला अदालत नुवाकोटमा विचाराधीन छ । उनी नुवाकोट कारागारमा छन् ।

यसरी मानव तस्करीको अभियोगमा सीआईबीले तीन आर्थिक वर्षको अवधिमा दुई विदेशी नागरिकसहित ५५ जनालाई पक्राउ गरिसकेको छ । यसमध्ये ६ जना महिलासमेत छन् ।

सीआईबीका अनुसार भारतको बाटो हुँदै तेस्रो मुलुक र भारतकै कोठीमा समेत नेपाली युवती बेचिने गरेका छन् । अधिकांश युवायुवती युरोप, अमेरिकाको सपना देखेर दलालमार्फत अवैध तरिकाले विदेश जान खोज्दा अप्ठ्यारोमा पर्ने र बेचिने गरेको सीआईबीका प्रवक्ता प्रहरी उपरीक्षक (एसपी) उमा चतुर्वेदीको भनाइ छ । सीआईबीबाहेक अन्य प्रहरी कार्यालयमा समेत मानव बेचबिखनको उजुरी पर्ने गरेका छन् ।

४४ अपरेसन, ५५ पक्राउ

आर्थिक बर्ष २०७३/०७४ मा सीआईबीले मानव बेचबिखन तथा ओसारपसारविरुद्ध सातवटा अपरेसन चलायो । जसमध्ये थुप्रै नेपाली महिलाको उद्धार गरिएको छ । त्यसबेला सीआईबीले दुई विदेशी नागरिकसहित १० दलाललाई पक्राउ गरेको थियो ।

आव. २०७४÷०७५ मा मानव बेचबिखन तथा आसोरपसारविरुद्ध ३२ वटा ठूला अपरेसन भए । यो अवधिमा विभिन्न मुलुकमा बेच्न लगिएका सयौं महिलालाई भारत र विभिन्न खाडी मुलुकबाट सीआइर्बीले उद्धार गरेको थियो । चालू आवमा सीआईबीले तीन महिलासहित ३७ जना दलाललाई पक्राउ गरेको थियो ।

यो बर्षको बितेका सात महिनामा सीआईबीले पाँच अपरेसन माफृत तीन महिलासहित ८ जना पक्राउ गरेको जनाएको छ । यसरी सीआईबीले तीन आर्थिक वर्षयता मानव तस्करीका ३९ वटा अपरेसन चलाएर दुई जना विदेशीसहित ५५ जना मानव तस्करलाई पक्राउ गरेको छ ।

पीडित नै मान्दैनन् उजुरी दिन

सीआईबीले तीन आवमा ५५ जना मानव तस्करलाई पक्राउ गरेको छ । तर, मानव तस्करी गरेको अभियोगमा पक्राउ परेका सबैविरुद्ध मानव बेचबिखनको उजुरी नआउने सीआईबीको भनाइ छ ।

कति युवायुवती सामजिक प्रतिष्ठा गुम्ने डरले उजुरी नै दिन नआउने एसपी उमा चतुर्वेदीको भनाइ छ । यस्तै, कतिपय पीडित आफ्नो पैसा असुल गर्न मानव तस्करसँगै मिलेर काम गर्ने गरेको पाइएको सीआईबीकाे दाबी छ ।

प्रकाशित मिति: मंगलबार, वैशाख ३, २०७६ २३:४८