कोरोनाको कारखाना बन्ने जोखिममा वित्तीय संस्था, त्रासमा ड्युटी गर्दै बैंकका कर्मचारी

कोरोनाको कारखाना बन्ने जोखिममा वित्तीय संस्था, त्रासमा ड्युटी गर्दै बैंकका कर्मचारी

A+ A A-

परीक्षणको दायरा बढाइएसँगै प्रदेश-२ मा कोरोना भाइरस संक्रमितको संख्या पछिल्लो समय उकालो लाग्दै गएको छ । धनुषासहित विभिन्न जिल्लामा भेटिएका संक्रमितको ट्राभल हिस्ट्रीसमेत नभेटिएकाले संक्रमितको संख्या उकालो लाग्दै गएको हो ।

स्थानीय प्रशासनले अत्यावश्यक सेवा सञ्चालनबाहेक कतै निषेधाज्ञा जारी गरेको छ भने कतै लकडाउन घोषणा गरेको छ । तर, अत्यावश्यक सेवामा पर्ने वित्तीय संस्था निरन्तर सञ्चालनमा रहेकाले कर्मचारी त्रसित छन् । २ साता यता मात्र जनकपुरमा करिब २ दर्जन बढी बैंकका कर्मचारीमा कोरोना संक्रमण पुष्टि भएको छ भने अझै धेरैको रिपोर्ट आउन बाँकी छ । त्यसमध्ये कुनै बैंकका सबै संक्रमित भएका छन् भने केहीका आंशिक कर्मचारीमा संक्रमण पुष्टि भएको छ ।

संक्रमित कर्मचारीबाट धेरै सेवाग्राहीले लाभ लिएकाले तिनीहरूमा समेत संक्रमण फैलिएको हुन सक्ने अनुमान गरिएको छ । प्रशासनले निषेधाज्ञा जारी गर्दा समेत ग्रामीण क्षेत्रका साथै सहरी क्षेत्रमा समेत बैंकमा भीडभाड कायमै देखिन्छन् । यस्तै अवस्था रहे वित्तीय संस्था कोरोनाको कारखाना नै बन्ने सम्भावना बढेको छ ।

संक्रमण पुष्टि भएपछि नेपाल राष्ट्र बैंक, ग्लोबल आइएमई बैंक, नेपाल बंगलादेश बैंक, मुक्तिनाथ विकास बैंक, माछापुछ्रे बैंक लगायतका वित्तीय संस्था केही दिनयता बन्द छन् भने केही बैंक अझै सञ्चालनमै छन् । कर्मचारीमा संक्रमण पुष्टि हुँदासमेत बैंक बन्द नभएपछि कर्मचारी त्रासमय वातावरणमा काम गर्न बाध्य भएका छन् ।

‘सेवाग्राहीको चाप उत्तिकै छ । ज्वरो नाप्ने र स्यानिटाइजरकै भरमा हामीले ज्यानको बाजी लगाएर काम गर्नु परेको छ । सँगै काम गर्ने साथीमा कोरोना पोजिटिभ पुष्टि भएदेखि हामी एकदमै डराएका छौँ,’ एभरेष्ट बैंकको जनकपुर शाखामा कार्यरत एक कर्मचारीले भने, ‘अन्य ४/५ जना साथीहरू पनि ज्वरो र रुघाखोकी लागेर विदामा छन् । तर, हामीलाई काम गर्न बाध्य बनाइएको छ । हाम्रो कुरा सुन्ने कोही छैनन् ।’

एभरेष्ट बैंकको जनकपुर शाखामा कार्यरत एक २७ वर्षीय कर्मचारीको गत २७ साउनमा पीसीआर रिपोर्ट पोजिटिभ आएको थियो । त्यसपछि बैंकले २ दिनसम्म आफ्नो सेवा बन्द गरेको थियो । ती कर्मचारीमा संक्रमण पुष्टि भएपछि गएको ३० साउनमा बैंकका सबै कर्मचारीको स्वाब संकलन गरिएको थियो । तर, रिपोर्ट नआउँदै बैंकले सबै कर्मचारीलाई काममा लगाएपछि कर्मचारी थप त्रसित बनेका हुन् ।

‘हामीले महामारी रहुन्जेल बैंक बन्द होउन भन्ने चाहेका होइनौँ । तर, कम्तीमा रिपोर्ट नआउन्जेल बन्द गर्नुपथ्यो नि । हामीबाट सेवाग्राहीलाई कोरोना सर्‍याे भने के हुन्छ ? त्यसको जिम्मेवारी कसले लिने ?,’ ती कर्मचारीले प्रश्न गरे ।

पीसीआरको नतिजा नआउँदै यसरी ग्राहकको स्वास्थ्यमा खेलबाड गरिएको भन्दै सञ्चालनमा रहेका बैंकका कर्मचारी असन्तुष्ट छन् । तर, जागिर गुम्ने डरले कसैले पनि बैंकको निर्णयविरुद्ध बोल्न सकेका छैनन् ।

कोरोना महामारी नियन्त्रणको जिम्मेवारी स्थानीय प्रशासनको रहेकाले वित्तीय संस्था बन्द गर्ने सम्बन्धमा जिल्ला प्रशासनले कुनै निर्णय नगरिदिएकाले समस्या भएको एभरेष्ट बैंक जनकपुर शाखाका म्यानेजर बिनय प्रसाद उपाध्यायले बताए । बैंकको मुख्यालयबाट समेत केही सर्कुलर नआएकाले सेवा सञ्चालन गरिरहेको उनको भनाइ छ ।

‘सम्बन्धित निकाय र स्थानीय प्रशासनले समन्वय गरेर सम्पूर्ण वित्तीय संस्था बन्द गर्ने वातावरण भइदिए राम्रो हुन्थ्यो । किनभने वित्तीय संस्थाबाट महामारी फैलिने खतरा देखिएको छ,’ उनले भने, ‘धेरै नभए कम्तीमा १ साता बन्द गरिदिँदा राम्रो हुन्थ्यो तर सम्बन्धित निकायबाट कुनै पनि पहल नभएपछि हामी वित्तीय संस्था बन्द गर्न सक्दैनौँ । कर्मचारीलाई डर त छँदैछ तर बिरामी परेकालाई हामीले घरमै उपचार गराएर निको भएपछि मात्र काममा फर्किन भनेका छौँ ।’

धनुषाका प्रमुख जिल्ला अधिकारी प्रेम प्रसाद भट्टराईले वित्तीय संस्था बन्द राख्ने, खोल्ने वा खोले पनि कुन हिसाबले सञ्चालन गर्ने विषयमा संकट व्यवस्थापन समितिले निर्णय गर्ने बताए । मुक्तिनाथ विकास बैंक जनकपुर शाखामा कार्यरत १२ जना कर्मचारीमा संक्रमण पुष्टि भएपछि करिब १ सातादेखि बैंक बन्द छ । तर, प्रशासनले वित्तीय संस्था बन्द गर्ने विषयमा कुनै निर्णय गरिनसकेकाले फेरि संक्रमित निको भइसकेपछि बैंक सञ्चालनको तयारी गरिरहेका बैंकका क्षेत्रिय म्यानेजर अभिनाश झाले बताए ।

‘बैंकका सबै कर्मचारीलाई संक्रमण पुष्टि भइसकेको छ । पर्सी १४ दिनपछि फेरि सबैको स्वाब टेष्ट हुनेछ । त्यसपछि कहिलेदेखि बैंक खोल्ने निर्णय गछौँ,’ उनले भने ।

बैंकको परिधिभित्र स्वास्थ्य मन्त्रालयको मापदण्ड पालना गर्दासमेत संक्रमित हुने अवस्था रहेकाले बैंक सञ्चालन गर्ने वा बन्द गर्ने विषयमा ठोस निर्णय नभए कर्मचारीमा त्रास र जोखिम बढ्दै जाने उनको भनाई छ । ‘बैंकर्स साथीहरूको ग्रुपमा १ साता चेन ब्रेक हुनुपर्‍याे भनेर कुरा उठाएका छन् । संक्रमित गराएर बैंक बन्द गर्नुभन्दा संक्रमित हुन नै नदिने उपाय खोजिनुपर्छ,’ म्यानेजर झाले भने ।

प्रकाशित मिति: मंगलबार, भदौ २, २०७७ १६:३१