प्रदेश २ मा सरकार फेरिने चर्चा : संसदीय दलको नेताका लागि मुख्यमन्त्रीसहित ६ सांसदको दौडधुप

प्रदेश २ मा सरकार फेरिने चर्चा : संसदीय दलको नेताका लागि मुख्यमन्त्रीसहित ६ सांसदको दौडधुप

फाइल तस्वीर

A+ A A-

जनता समाजवादी पार्टी (जसपा) को समायोजन र पदाधिकारीको कार्यविभाजनबारे छलफल सुरु भएसँगै प्रदेश २ मा संसदीय दलको नेताको अनुहारको विषयमा बहस सुरु भएको छ ।

तत्कालीन राष्ट्रिय जनता पार्टी (राजपा) र संघीय समाजवादी फोरमको संयुक्त सरकार बनेको प्रदेश २ मा पार्टी एकीकरण पश्चात दलको नेता बन्न प्रदेशसभा सांसदले केन्द्रीय नेतृत्वपंक्तिमा लबिङ थालेका छन् ।

यसअघि तत्कालीन फोरमबाट लालबाबु राउत र राजपाबाट जितेन्द्र सोनल दलको नेता चुनिएका थिए । जसमध्येबाट दलीय भागबण्डा अनुसार तत्कालीन फोरमका संसदीय दलका नेता राउत मुख्यमन्त्री र राजपाका दलका नेता सोनल भौतिक पूर्वाधार तथा विकासमन्त्री बनेका थिए । तर, पार्टी एकीकरण पश्चात जसपाको संसदीय दलका नेताका लागि यी दुइ नेता बाहेक अन्य ४ जना सांसदले समेत पार्टीको शिर्ष नेतृत्वमा लबिङ गरिरहेका छन् । उनीहरू समर्थनका लागि जसपाका प्रदेशसभा सदस्यहरूलाई आआफ्नोतर्फ तान्ने प्रयासमा जुटेका छन् ।

काठमाडौंमा पार्टी अध्यक्ष उपेन्द्र यादव, महन्थ ठाकुर, वरिष्ठ नेता राजेन्द्र महतो, अशोक राई र डा. बाबुराम भट्टराईलाई भेट्ने सांसदहरूको लर्को लागेको छ । मुख्यन्त्री राउतसहित प्रदेशका मन्त्री आ-आफ्ना पद जोगाउनका लागि समेत पछिल्लो समय निरन्तर काठमाडौं पुगेर आफ्ना निकट शिर्ष नेताहरूसँगको छलफलमा व्यस्त छन् ।

दलका नेताका लागि तत्कालीन फोरमबाट मुख्यमन्त्री बनेका राउतका साथै आर्थिक मामिला तथा योजनामन्त्री विजय कुमार यादव र रामअशिष यादव निरन्तर शिर्ष नेतृत्वसमक्ष दौडधुप गरिरहेको जसपा नेताहरू बताउँछन् ।

यस्तै, तत्कालीन राजपाबाट भौतिक पूर्वाधार विकासमन्त्री सोनल, उपेन्द्र महतो र मनिष सुमनले समेत दलको नेताका लागि दाबी गर्दै आएका छन् । संसदीय दलको नेता चुनिने सांसद मुख्यमन्त्री बन्ने छन् । जसपामा एकातिर फेरि दलको नेताको रुपमा लालबाबु राउतलाई नै दोहोर्‍याएर मुख्यमन्त्रीको रूपमा निरन्तरता दिनुपर्ने मत छ भने अर्कोतिर उनको विकल्प खोज्नुपर्ने अडान लिएका छन् ।

मुख्यमन्त्री राउतले मधेस आन्दोलनको मर्म र जनभावना अनुरुप काम गर्न नसकेकाले सरकारका साथै पार्टीको समेत व्यापक आलोचना भइरहेको भन्दै भन्दै सरकारको नेतृत्व र अनुहार परिवर्तनको मागसहित जसपाको केन्द्रीय कार्यकारिणी समितीको बैठक बस्नुअघि करिब डेढ दर्जन सांसदले शीर्ष नेतृत्वलाई ज्ञापनपत्र बुझाएका थिए । तर, शीर्ष नेतृत्वसमक्ष मुख्यमन्त्री राउतसहित अन्य मन्त्रीहरूलाई समेत हेरफेर गर्नुपर्ने सांसदले माग गरेको यो पहिलो पटक होइन । यसअघि समेत केन्द्रिय नेताहरूसँगको छलफलको क्रममा सरकार अनुहार हेरफेरको विषयमा व्यापक चर्चा भएको थियो ।

मधेस आन्दोलनको जगमा बनेको सरकारको नेतृत्व गरिरहेका मुख्यमन्त्री राउत सहित मन्त्रीहरुले अढाई वर्षको कर्यकालमा जनभावना अनुसार काम गर्न नसकेको भन्दै आफ्नै पार्टीका धेरैजसो सांसद उनको विरोधमा छन् । केही सांसद प्रदेशसभासँगै सार्वजनिक रुपमै मुख्यमन्त्रीसहित प्रदेशका मन्त्रीहरुको विरुद्ध अभिव्यक्ति दिइराखेका छन् भने केहीले आन्तरिक रुपमै आफ्ना असन्तुष्टि पोखिराखेका छन् ।

आन्दोलनको मर्म र पार्टीको घोषणापत्र अनुहार काम नगरेको र व्यापक भ्रष्टार गरेको आरोप खेपिरहेकाले स्वच्छ छविका नयाँ अनुहारलाई सरकारमा सहभागी गराउनु पर्ने सरकार विरोधी सांसदहरुले माग गर्दै आएका छन् ।

‘मुख्यमन्त्रीजी भिजनलेस र हार्मलेस छन् । प्रदेशको विकासकालागि कुनै भिजन नै छैनन् । भ्रष्टाचार बढेको बढ्यै छन् । यो टिमले अगामी निर्वाचनमा पार्टीको प्रष्ठिैै जोगाउन मुस्किल पर्छ । त्यसैले प्रदेशमा युवा नेतृत्व आवश्यक छ,’ सांसद उपेन्द्र महतोले भने ।

राजेन्द्र महतो निकट रहेका उनी पछिल्लो समय तत्कालीन फोरम खेमाका समेत करिब आधा दर्जन सांसदलाई आफ्नो पक्षमा तान्न सफल भएको उनको दाबी छ । अहिलेको अवस्थामा सरकारबाट असुन्तुष्ट सांसदहरूको संख्या धेरै भएकाले निर्वाचन भए दलको नेताको रूपमा आफू नै चुनिनेमा उनी विश्वस्त छन् ।

अथक प्रयासका बाबजुद पार्टीको भागण्डामा नपरेर मुख्यमन्त्री बन्न नसकी मन्त्री पदमै चित्त बुझाएका सोनल यसपटक जसरी पनि दलको नेता चुनिएर मुख्यमन्त्री बन्ने दाउमा छन् । पूर्वजसपाबाट मुख्यमन्त्री राउतले अढाई वर्ष नेतृत्व गरेर असफल सावित भइसकेकाले यसपटक उनी नै दलको नेता चुनिएर मुख्यमन्त्री बन्नुपर्ने सोनल निकट सांसदको तर्क छ । उनी निकटका अनुसार सोनलको स्वच्छ छवि, योगदान, वरिष्ठा दलको नेता बन्नुपर्ने आधार हुन् ।

उनी पार्टी अध्यक्ष महन्थ ठाकुरको अत्यन्त निकट र विश्वासपात्र हुन् । तर, पार्टी अध्यक्ष उपेन्द्र यादव प्रदेश २ सरकारको नेतृत्व जसरी पनि आफु निकटलाई दिने जानकार बताउँछन् । उनी निकट दलका नेताको दौडमा आर्थिक मामिला तथा योजनामन्त्री विजय यादव रहेका छन् ।

अढाई वर्षको अवधिमा पटक पटक विवादमा तानिएका मन्त्री यादवको जनस्तरमा राम्रो छवि नभएकाले नेतृत्वपंक्ति अगामी निर्वाचनमा पार्टीलाई क्षति नहुनेलाई दलको नेता बनाउने राजनीतिक वृतमा चर्चा छ । उनी अघिल्लो पटक समेत मुख्यमन्त्री बन्न सारा शक्ति खर्चिएका थिए ।

दलका नेताकालागि लालबाबु राउत, जितेन्द्र सोनल र विजय यादव बाहेका सांसदहरुले मन्त्री पदको बार्गेनिङका लागि दाबेदारी प्रस्तुत गरेको एकथरी बुझाई छ । अर्का दाबेदार रामअशिष यादव उपेन्द्र यादव निकट मानिए पनि पछिल्लो समय उनी मुख्यमन्त्री राउसँगै निकटता बढाएका छन् । त्यसैले मुख्मन्त्री राउत दलको नेताको उम्मेदवारी दिए उनी पछि हट्ने उनी निकटहरु बताउँछन् । उनी तत्कालीन फोरमका उपनेता समेत हुन् ।

सांसद मनिष सुमनले दलको नेताका लागि दाबेदारी प्रस्तुत गरी मन्त्री पदको बार्गेनिङ गर्ने उनी निकट एक सांसदले बताए । राउत नेतृत्वको सरकामा मन्त्री बन्न नपाएका उनी सुरुदेखि नै आफ्नै पार्टीको सरकारविरुद्ध आक्रमक देखिन्छन् ।

प्रदेशमा जनता समाजवादी ५५ प्रदेशसभा सदस्यमध्ये २९ जना तत्कालीन समाजवादी र २५ जना राजपाबाट निर्वाचित भएका छन् । एक स्वातन्त्र निर्वाचित भएका प्रदेशसभा सदस्य समेत गरी जसपाको पक्षमा ५५ जना सांसद रहेका छन् । जसमध्ये सभामुख र उपसभामुख गरी २ जना दलको नेताको निर्वाचनमा भाग लिन पाउने छैन् ।

प्रकाशित मिति: सोमबार, भदौ १, २०७७ ०१:२५