जनप्रतिनिधिले वास्ता गर्न छाडेपछि संस्थासँग सहयोग माग्दै आइसोलेसनका संक्रमित

जनप्रतिनिधिले वास्ता गर्न छाडेपछि संस्थासँग सहयोग माग्दै आइसोलेसनका संक्रमित

A+ A A-

बुटवल उपमहानगरपालिकाले निर्माण गरेको बुटवल देवीनगरस्थित एन्फा एकेडेमीको आइसोलेसनमा रहेका कोरोना संक्रमितले पर्याप्त सुविधा नभएको गुनासो छन् ।

घरमै होम आइसोलेसन बसेकाहरूलाई नगरपालिकाका जनप्रतिनिधिले झुक्काउँदै आइसोलेसनमा ल्याएपछि सेवा सुविधा नभएको भन्दै उनीहरूले गुनासो गरेका हुन् ।

४० बेड भनिएको उक्त आइसोलेसनमा अहिले पनि प्रयाप्त पङ्खा छैनन् । तातो पानी खान कित्ली समेत नभएको र शारिरीक व्यायम गर्नसमेत म्याट्रेस नभएपछि संक्रमित रहेकाले आफै सहयोग माग्नसमेत थालेका छन् ।

बुटवल जीतगढीका कोरोना संक्रमित एक युवकले आइसोलेसनमा पर्याप्त सुविधा नभएकाले संघसंस्थाको सहयोगमा आवश्यक सामग्री ल्याउनका लागि पहल गरिएको बताए ।

शुक्रबार मात्र उक्त आइसोलेसनमा लायन्स क्लब अफ बुटवल देउराली र लायन्स क्लव अफ बुटवल चौतारी म्याट, इलेक्ट्रिक कित्ली, बाल्टी, मग सहयोग गरेको थियो । ‘यहाँ म आउँदा केही पनि थिएन । बारम्बार बुटवल उपमहानगरपालिकालाई भनेको भए पनि सुनुवाई नभएपछि मैले संस्थाका साथीलाई गुहार मागेर सामान ल्याउन लगाए,’ उनले भने ।

सुगर फ्री भएकाहरू समेत आइसोलेसनमा भए पनि ६ दिनसम्म नास्ता नै नपाएको समेत उनले गुनासो गरे । ‘६ दिनसम्म नास्ता केही नभएपछि मैले आफैले किशन ज्ञवालीलाई फोन गरेर गुनासो गरेपछि बल्ल ४ पत्ता ब्रेड र दूध आयो,’ ती संक्रमितले भने ।

बुटवल-४ का वडाध्यक्ष टंक पराजुली, वडा नं. ११ का वडाध्यक्ष रामचन्द्र खनालको सहितको समूहले घरमै होम आइसोलेसनमा बसेकाहरूलाई झुक्याएर ल्याउने गरेको समेत उनले बताए ।

यता बुटवल उपमहानगरपालिका-११ का अध्यक्ष रामचन्द्र खनालले घरमा जस्तो सुविधा आइसोलेसनमा भने नहुने बताए । उनले अरू सबै मापदण्ड आइसोलेसनमा भने पुगेको बताए ।
कन्ट्रयाक्ट ट्रेसिङ नै गरिएन

२१ साउनमा आफै लुम्बिनी प्रादेशिक अस्पतालमा गएर कोरोनाका परीक्षणका लागि स्वाब दिएका जीतगढीका ती युवकको रिपोर्ट २४ गते पोजिटिभ आएको थियो । तर, उनले आफ्नो कन्ट्रयाक्ट ट्रे ङमा रहेका १ सय ३२ जनाको नाम दिँदासमेत १५ जनाको मात्र कोरोना परीक्षण गरिएको बताए ।

उनले आफ्नो भाउजुको उपचारका क्रममा भरतपुरमा मृत्यु भएको र त्यो बेला पीसीआर चेक नगरी साउन १८ गते मैनाबगर रामघाटमा दाहासंस्कार गरेको बताए । त्यही मलामीमा गएका १ सय ३२ जनाको नाम दिँदा पनि उपमहानगरपालिकाले आफ्ना परिवारका १५ जनाको मात्र पीसीआर परीक्षण गरेको उनले बताए ।

५ दिन बित्दासमेत उनीहरूको रिपोर्ट पनि अहिलेसम्म नआएको उनले बताए । ‘५ दिनसम्म परिवार सबै घरभित्र छन् । बाहिर धारामा पानी भर्नसमेत पाएका छैनन्,’ ती युवकले भने, ‘२६ गते निकालेको स्वाबको रिपोर्टसमेत अहिलेसम्म आएको छैन ।’

प्रकाशित मिति: शनिबार, साउन ३१, २०७७ १६:१०