लिदी पहिरो : आमा, श्रीमती र छोरा गुमाएका दोङले यसरी जोगाए ज्यान

A+ A A-

शुक्रबार बिहानै सिन्धुपाल्चोकको लिदीगाँउ पहिरोले पुर्‍यो । तामाङ सयुदायको बस्ती रहेको लिदीमा १ सय ७२ घरधुरी छन् । त्यसमध्ये ५ देखि १० वटाघर पहिरोेले पूरै पुर्‍यो । बाँकी विस्थापित भएका छन् । घर पुरिनेमध्येका १ नेमाङछिरिङ दोङ हुन् । उनको घर मात्रै पहिरोले पुरेन उनकी ७२ वर्षीया आमा, ३३ वर्षीया श्रीमती र ५ महिनाको छोरासमेत पहिराले पुरेर बेपत्ता बनाएको छ ।

उनी पहिरोले पुरेको घर रुँघेर छटपटाइरहेका छन् । कहिले,‘आमा भन्दै रुन्छन् । कहिले श्रीमती धनमाया भन्दै चिच्याउँछन् । कहिले छोरा रेमिस भन्दै छटपटिन्छन् ।’ तर, नेमाङछिरिङलाई अब आमा, श्रीमती र छोरा जीवित छन् भन्ने आस मरिसकेको छ । मन भारी बनाएर जबरजस्ती बोल्न खोजिरहेका छन् ।

उनी भन्छन्, ‘न यहाँका स्थानीय नेताले सुने । न सरकारले सुने । म आफैँ गाँउ पहिरोको उच्च जोखिममा छ, हामीलाई केही व्यवस्थापन गर्दिनुहोस् भनेर कतिपल्ट सीडीयोलाई भेट्न गएँ । हाम्रो पुकार कसैले सुन्नु भएन । आज प्रकिृतिले पनि सुनेन् । हामीमाथि बज्रपात भयो । घरबारविहीन मात्रै होइन परिवारका सबै सदस्य गुमाउँनु पर्‍यो ।’

लिदीगाँउका उनी मात्रै होइन् उनी जस्तै परिवारनै गुमाउनेहरूमा अन्य पनि छन् । ५ देखि १० घर पुरिँदा ४० देखि ४५ जना वेपत्ता भएको उनको भनाइ छ । जसमध्ये ३ जनाको शव मात्रै भेटिएको छ । अन्यको खोजीकार्य जारी छ ।

केही घाइतेलाई नेपाली सेनाको हेलिकोप्टरमार्फत उपचारका लागि काठमाडौं ल्याइएको छ । अन्यको उद्धार जारी रहेको जुगल गाउँपालिका अध्यक्ष होमनारायण श्रेष्ठकोे भनाइ छ । पहिरो गएका क्षेत्रमा सभामुख अग्निप्रसाद सापकोटालगायतको टोली पुगेका छ ।

यसरी बाँचे दोङ

आमा, श्रीमती र छोरी गुमाएका नेमाङछिरिङ दोङ भने आफू भागेर बाँचेको बताउँछन् । उनी भन्छन्, ‘बिहानको ६ बजेर ४२ मिनेट भएको हुनुपर्छ म भर्खर उठेको थिएँ । रातभरी पानी परेको थियो । गाँउको वरीपरी खहरे खोला सुसाइ रहेको थिए । गाँउकै माथिबाट यसरी पहिरो आउँछ भन्ने सोचेको थिएनँ । एक्कै छिनमा आवाज आयो । त्यति नै बेला घर पुरिन पुग्यो । म आँखा चिम्लेर भागेँ । घर परिवारका सदस्यलाई सम्झेर पनि केही गर्न सकिने अवस्था थिएन । आफैँ पनि कसरी बाँचेँ ? पत्तो छैन म घाइते छुँ । १ मिटेन मात्रै ढीलो गरेको भए पनि बाँच्ने थिएन ।’

दोङका अनुसार २६ मेगावाटको बलेफी ए हाइड्रोपावरको सुरुङ निर्माणका क्रममा विस्फोटन गर्दा जमिन हल्लिएका कारण पनि यसरी पहिरो गरेको उनुको गुनासो छ । यसअघि सिन्धुपाल्चाेकै जम्बुमा आएकाे बाढीले पनि २० जना बेपत्ता बनाएकाे थियाे भने ५ जनकाे शव भेटिएकाे थियाे ।

प्रकाशित मिति: शुक्रबार, साउन ३०, २०७७ १९:४६