घूससहित रंगेहात पक्राउ परेका ६ प्रहरी निलम्बित

A+ A A-

सेवाग्राहीसँग घूस रकम लिँदालिँलै रंगेहात पक्राउ परेका ६ जना प्रहरी निलम्बनमा परेका छन् ।

बागमती प्रदेश प्रहरी कार्यालय, हेटौँडाले मंगलबार आर्थिक प्रलोभनमा परी जिम्मेवारी इमान्दारिताका साथ निर्वाह नगर्ने प्रहरीलाई निलम्बन गरेको हो ।

कार्यालयबाट खटिएको प्रहरीको विशेष टोलीले ६ जना प्रहरीलाई विभिन्न स्थानबाट २१ साउनमा घूस रकमसहित रंगेहात पक्राउ गरेको कार्यालयका सूचना समन्वय अधिकृत प्रहरी निरीक्षक रोशन थापाले जानकारी दिए ।

घूस रकमसहित पक्राउ पर्ने सिन्धुलीका मात्रै ५ जना प्रहरी छन् । अर्का प्रहरी काभ्रेमा कार्यरत् रहेको प्रहरी निरीक्षक थापाले शिलापत्रलाई जानकारी दिए । उनीहरूले सवारी चालकसँग विभिन्न बहाना बनाएर घूस रकम लिएको थापाले बताए । घूससहित पक्राउ परेका उनीहरूलाई प्रदेश प्रहरी कार्यालय, हेटौँडा कारबाहीको लागि ल्याइएको थियो ।

निलम्बनमा पर्ने २ जना प्रहरी हवल्दार र ४ जना जवान रहेका छन् । जिल्ला प्रहरी कार्यालय सिन्धुलीमा कार्यरत् हवल्दार राजकुमार श्रेष्ठ, डोरबहादुर कार्की, जवान कुमार बाबु सिंह, धिरेन्द्र साह, राम कुमार थापा र जिल्ला प्रहरी कार्यालय काभ्रेअन्तर्गत इलाका प्रहरी मंगलटारमा कार्यरत् जवान नवीनबहादुर थापालाई निलम्बर गरिएको सूचना समन्वय अधिकृत थापाले जानकारी दिए ।

निलम्बित प्रहरीमाथि थप छानबिन गर्न प्रदेश प्रहरी कार्यालयले प्रहरी नायव उपरीक्षक विज्ञान बस्नेतको संयोजकत्वमा ३ सदस्यीय छानबिन समिति पनि गठन गरेको छ । कार्यलयले ड्ययुटीमा खटिएर इमान्दारी प्रदर्शन गर्ने प्रहरीलाई पुरस्कृत र गलत क्रियाकलापमा संलग्न प्रहरीलाई कारबाही गर्ने अभियान चलाएको छ ।

कार्यालयले सेवाग्राहीसँग घूस रकम लिने मकवानपुरका कार्यरत् १ प्रहरी निरीक्षकसहित ११ जना प्रहरीलाई निलम्बन गरिसकेको छ । उत्कृष्ट कार्य गर्ने २५ जना प्रहरीलाई पुरस्कृत गरिएको कार्यालयले जनाएको छ । कार्यालयले मंगलबार मात्रै १ जना प्रहरीलाई घूस रकम दिन खोज्ने सेवाग्राहीलाई नियन्त्रणमा लिएको भन्दै पुरस्कृत पनि गरेको छ ।

अस्थायी ट्राफिक प्रहरी पोष्ट भीमान, सिन्धुलीमा कार्यरत प्रहरी हवल्दार ओम नारायण महतोलाई पुरस्कृत गरिएको कार्यालयले जनाएको छ । महतोले सवारीसाधनको बिलबुकभित्र ३ सय रुपैयाँ राखी आर्थिक प्रलोभनमा पार्न खोजेको भन्दै एक बोलेरो चालकलाई नियन्त्रणमा लिएका थिए । उक्त चालकलाई नियमानुसार जरिमाना गरी छोडिएको जनाइएको छ ।

प्रकाशित मिति: बुधबार, साउन २८, २०७७ ०१:५६