कर्णालीका मुख्यमन्त्रीसँग मन्त्रीहरूले गरे कार्यसम्पादन सम्झौता

A+ A A-

कर्णाली प्रदेश सरकारका मुख्यमन्त्री महेन्द्रबहादुर शाहीले प्रदेशका मन्त्रीहरूसँग कार्यसम्पादन तथा मूल्यांकन करार सम्झौता गरेका छन् । कर्णाली प्रदेश सरकारको आर्थिक वर्ष २०७६/७७ को वार्षिक प्रगति समीक्षा गर्दै योजना कार्यान्वयन तथा बजेट खर्चको बृद्धि गर्नका लागि कार्यसम्झौता तथा मुल्याङ्कन करार सम्झौता गरेका हुन् ।

चालु आर्थिक वर्षको बजेट कार्यान्वयनलाई प्रभावकारी बनाउन मुख्यमन्त्री शाहीले अन्य मन्त्रीसँग, मन्त्रीहरुले मन्त्रालयका सचिवसँग र सचिवले कार्यालय प्रमुखहरू कार्यसम्पादन करार सम्झौता भएको मुख्यमन्त्री शाहीलले बताए । ‘कर्णाली प्रदेशमा बजेटको कार्यान्वयन पक्षको कार्यप्रगतिको साप्ताहिक रुपमा रिपोर्टीङ्ग गर्ने र अनुगमनलाई कडाई गर्ने व्यवस्था मिलाएको छ’ उनले भने,‘बजेट कार्यन्वयनमा आत्मसमिक्षाको जरुरी भएको बताउँदै नागरिकस्तरबाट सरकारका पदाधिकारीहरुको योग्यता र नियतको प्रश्न उठिरहेकोतर्फ गम्भीर बन्न आवश्यक रहेको छ ।’

भौगोलिक विकटता, कर्मचारी अभाव र कोभिडले निम्त्याएका समस्याका बीच प्रदेश सरकारले उपलब्धि हासिल गर्नका लागि सबैसँग करार कार्य सम्झौता आवश्यक रहेको मुख्यमन्त्री शाहीले बताए ।

गत आर्थिक वर्षमा ४७ प्रतिशत बजेट मात्र खर्च

कर्णाली प्रदेश सरकारको आर्थिक वर्ष २०७६÷७७ को वार्षिक बजेट प्रगतिको अवस्था मुख्यमन्त्री शाहीले सार्वजनिक गरेका छन् । प्रदेश सरकारको कुल बिनियोजित बजेटमा खर्चको समग्र स्थिति ४७.६५ प्रतिशत खर्च रहेको मुख्यमन्त्री शाहीले जानकारी दिए ।

जसअन्तर्गत प्रदेश ब्यवस्थापिका ६४.८७ प्रतिशत, मुख्य न्यायाधिवक्ता ५७.७९ प्रतिशत, मुख्यमन्त्री तथा मन्त्रिपरिषदको कार्यालय २३.१४ प्रतिशत, आर्थिक मामिला तथा योजना मन्त्रालय ४२ प्रतिशत, उद्योग पर्यटन तथा वातावरण मन्त्रालय ५१.४० प्रतिशत, भूमि ब्यवस्था कृषि तथा सहकारी मन्त्रालय ७७.२६ प्रतिशत, आन्तरिक मामिला तथा कानून मन्त्रालय ६१.१४ प्रतिशत, भौतिक पूर्वाधार विकास मन्त्रालय ४३.७७ प्रतिशत, सामाजिक बिकास मन्त्रालय ६१.६९ प्रतिशत, कर्णाली प्रदेश योजना आयोग २४.४८ प्रतिशत खर्च प्रगती रहेको मुख्यमन्त्री शाहीले बताए ।

चालु खर्च बढाउन कार्यसम्पादन सम्झौता

कर्णाली प्रदेश सरकारका मुख्यमन्त्री शाहीले चालु आर्थिक वर्षको बजेट कार्यान्वयन र सरकारको समग्र कामको प्रभावकारीता बृद्धि गर्न प्रदेश सरकारले कार्यसम्पादन करार सम्झौता गरेको बताए । ‘मन्त्रीहरुसँग मैले करार सम्झौता गरेको छु ।’ उनले भने,‘अबको ७ दिन भित्र तालुक सचिवहरुले मन्त्रीसँग सम्झौता हुनेछ ।’