सरकारको भ्रमको खेती र योद्धाको अपमान

A+ A A-

नेपाल कम्युनिस्ट पार्टी (नेकपा) ले जनताको एजेन्डाको नाममा झुटको खेती गरेर जनतालाई झुक्याएर बहुमत प्राप्त गर्ने खेल खेलेको छ ।

जनताले सत्य कुरा बुझिसकेका छन् । यो पार्टी जनतालाई भ्रममा पारेर मात्र स्थापित भएको हो ।

दुई ठूला दल एक भएर बनेको पार्टीले देशलाई निकास दिनेमा जनता विश्वस्त थिए । तर, यो विश्वास विस्तारै टुट्दै गएको छ । सरकारका कामकारबाहीले यो देखाइसकेको छ ।

सरकारले विश्वासको वातावरण बनाउन सकेन । जनताले दिएको मतलाई दुरुपयोग गरेकै कारण जनताबाट बहिष्कृत हुने खतरा बढेको छ ।

कोरोना भाइरसको विरुद्धमा सचेत हुँदै लड्दै अघि बढ्नुपर्ने बेलामा पार्टीभित्रको किचलोमा सरकार रुमल्लिएको छ । जब कि यो बेला विवाद गर्ने हुँदै होइन ।

जसरी विप्लव नेतृत्वको नेकपालाई सरकारले प्रतिबन्ध लगाएको छ । यो पनि लोकतान्त्रिक चरित्र होइन । अपराध गर्ने, गुण्डा नाइकेले खुल्लमखुल्ला समाजमा हिँड्न पाउने तर राजनीतिक गतिविधि गर्ने पार्टीको गतिविधिमा प्रतिबन्ध लगाउने सरकारको नियतमाथि जनताले प्रश्न गरेका छन् ।

उखान टुक्काको भरमा देशलाई कंगाल बनाउने बेला होइन यो । यस्तै अवस्था रहिरहने हो भने नेकपाको विकल्प जनताले खोज्नेछन् ।

हिजो गणतन्त्र प्राप्तिका लागि १७ हजार शहीद भए भने हजारौँ बेपत्ता भए । १३ हजार अंगभंग भए । ‘जनमुक्ति सेना’लाई अपमान गर्ने तर विदेशीसँग लम्पसार पर्ने दलले तिनै योद्धाको बलिदानको अहिले अपमान गरेका छन् । हामीजस्ता देशका लागि लडेकाको अपमान हेरेर पार्टी सत्तामा बसेको छ ।