प्रदेशसभा सचिवालयकाे खर्च : १ वर्षभित्र गाडी मर्मतमै ४५ लाख

A+ A A-

प्रदेश ५ प्रदेशसभा सचिवालयले एक वर्षको अवधिमा गाडी मर्मतका लागि मात्रै ४५ लाख बढी रकम खर्च गरेको छ । आर्थिक वर्ष २०७६/०७७ मा मोटरसाईकल, स्कुटर र ४ पाङ्ग्रे सवारी ममर्तका लागि सचिवालयले ४५ लाख १६ हजार ९ सय ९३ रुपैयाँँ खर्च गरेको हाे ।

आर्थिक वर्ष ०७४/०७५ मा २ लाख ९९ हजार ९ सय ४ रुपैयाँ सवारी मर्मतमा खर्च गरेको सचिवालयले आर्थिक वर्ष ०७५/०७६ मा १५ लाख ८६ हजार ६ सय २६ रुपैयाँ र आर्थिक वर्ष २०७६/०७७ मा ४५ लाख १६ हजार ९ सय ९३ रुपैयाँ खर्च गरेको हो ।

आर्थिक वर्ष ०७४/०७५ मा २ लाख ९९ हजार ९ सय ४ रुपैयाँ ५ वटा गाडी मर्मतका लागि खर्च भएको थियो । यस्तै आर्थिक वर्ष ०७५/०७६ मा १५ लाख ८६ हजार ६ सय २६ रुपैयाँ कार जिप, मोटरसाईकल, स्कुटर गरी २३ वटा सवारी साधन मर्मतमा खर्च भएको थियो ।

गत आर्थिक वर्षमा नेकपाका सचेतक भुमिश्वर ढकालले चढ्ने लु१झ ४५६ नम्बरकाे टाटा स्टोर्मको मर्मतमा झन्डै ८ लाख रुपैयाँ बढी खर्च भएकाे देखिन्छ ।

१४ मंसिर ०७५ मा खरिद गरिएकाे उक्त जिप मर्मत गर्दा ७ लाख ८२ हजार १ सय २८ रुपैयाँ खर्च भएको हाे । अघिल्लो आर्थिक वर्ष ०७५/०७६ मा उक्त जिपका लागि ३७ हजार ५ सय ९३ रुपैयाँ खर्च भएको थियो । सांसद ढकालले गाडीमाथि अज्ञात समूहले बम हान्दा धेरै क्षति भएकाले मर्मतमा रकम धेरै लागेको बताए ।

'बम हान्दा भित्र सबै जलेको थियो । ढोका, छत र सबै फेर्दा धेरै खर्च भयाे', उनले भने, 'अरु गाडीको तुलनामा मैले प्रयाेग गरिररहेकाे गाडी धेरै गुडेको छ । बनाउँदा २ महिना ग्यारेजमा राख्दासमेत अहिलेसम्म ७२ हजार किलाेमिटरभन्दा बढी गुडिसकेको छ ।'

नेता ढकालले हालै मात्र ४ वटै टायर पनि फेर्नुपरेकाले मर्मतमा रकम बढी देखिएको बताए ।

त्यस्तै कृषि वन तथा वातावरणका सभापति विजयबहादुर यादवले प्रयोग गर्दै आएको लु१झ ४४२ नम्बरकाे टाटा सफारी स्टोर्म जिप मर्मतका लागि गत आर्थिक वर्षमा ३ लाखभन्दा बढी रकम खर्च गरिएको छ । १४ मंसिर ०७५ मै खरिद गरिएकाे यो जिप मर्मतका लागि आर्थिक वर्ष २०७५/०७६ मा १ लाख ४७ हजार २९ रुपैयाँ खर्च भएको थियो । गत आर्थिक वर्षमा मात्र याे जिप मर्मतका लागि ३ लाख ८ हजार ९ सय ३६ रुपैयाँ खर्च गरिएको छ । यसरी हेर्दा जिप खरिद भएको १७ महिनामा ४ लाख ५५ हजार ९ सय ६५ खर्च भएको देखिन्छ ।

सांसद यादवले टाटा गाडीकाे सर्भिस नै महँगो भएको र अनुगमनमा जाँदा बढी बिग्रेका कारण मर्मतमा धेरै खर्च भएको बताए । उनले बुटवल–नेपालगञ्ज, नेपालगञ्ज बुटवल गर्नुपर्ने भएकाले अहिलेसम्म गाडी ७० हजार किलोमिटर गुडिसकेकाे बताए । 'म अनुगमनमा पनि जान्छु । प्रदेशका १२ जिल्लामा पुगेको छु । हामीले अनुगमनमा जाँदा अरु भाडाको गाडी पनि लिएका छौँ', उनले भने, 'यो गाडी एक पटक सर्भिसमा राख्दा मात्र १८ देखि २० हजार रुपैयाँ खर्च आउँछ ।'

उनका अनुसार गाडीका ४ वटै टायर फेरिएकाे छ ।

त्यस्तै गत आर्थिक वर्षमा लु१झ ४४५ नम्बरको टाटा स्टोर्म जिपका लागि २ लाख ४ हजार ३ सय १३ रुपैयाँ खर्च गरिएको छ । आर्थिक वर्ष ०७५/०७६ मा यो जिप मर्मतका लागि ५० हजार ९ सय ५७ रुपैयाँ खर्च भएको थियो । प्रदेश सभाको सामाजिक विकास समितिका सभापति दीर्घनारायण पाण्डेले प्रयोग गर्ने यो जिप पनि मंसिर ०७५ मा नै खरिद गरिएको थियो । तर जिप खरिद गरेको १७ महिनामा मर्मतका लागि मात्र २ लाख ५० हजारभन्दा बढी रकम खर्च भएको छ ।

प्रदेश सभामुख पुर्णबहादुर घर्तीले प्रयोग गर्ने बा१झ ९७२९ नम्बरको फोर्ड गाडी मर्मतका लागि गत आर्थिक वर्षमा ४ लाख ६८ हजार रुपैयाँ खर्च भएको छ । आर्थिक वर्ष ०७५/०७६ मा यो गाडी मर्मतका लागि २ लाख ३७ हजार ५ सय ८ रुपैयाँ खर्च भएको थियो ।

उनले नै प्रयोग गर्दै आएको अर्को बा१झ १९४८ नम्बरको टाटा स्टोर्म गाडीका लागि पनि गत आर्थिक वर्षमा २ लाख ४५ हजार १ सय १९ रुपैयाँ खर्च भएको छ । आर्थिक वर्ष ०७५/०७६ मा यही गाडी मर्मतका लागि २ लाख १३ हजार ४ सय ८७ रुपैयाँँ खर्च भएको थियो ।

प्रदेशसभाका कर्मचारीहरूले प्रयोग गर्ने बा१झ ७१९७ नम्बरको गाडी मर्मतका लागि गत आर्थिक वर्षमा ६ लाख ४९ हजार ९ सय ३३ रुपैयाँ खर्च भएको छ । यो गाडी जिल्ला समन्वय समिति, रुकुमपूर्वले प्रदेशसभा सचिवालयलाई हस्तान्तरण गरेको थियो । ७ महिनाअघि मात्र प्रदेशसभा सचिवालयलाई प्राप्त यो गाडीको बिल बुकसमेत छैन । संसद सचिवालययका एक कर्मचारीले मर्मत र त्यसको भुक्तानीमा लापरवाही हुँदा लाखौँ रुपैयाँ मर्मतमा खर्च हुने गरेको बताए । नयाँ गाडी भए पनि सबैमा खर्चको रकम धेरै आएको ती कर्मचारीको भनाइ छ ।

त्यस्तै लु१झ ४५२ नम्बरकाे महिन्द्रा स्कर्पियाे मर्मतका लागि गत आर्थिक वर्षमा ३ लाख १४ हजार ७ सय ५३ रुपैयाँ खर्च भएको छ ।

प्रकाशित मिति: आइतबार, साउन २५, २०७७ १७:४४