थोक बजारमा भीडभाड, तर हाटबजार बन्द गराउँदै स्थानीय सरकार

A+ A A-

समुदायस्तरमा कोरोना भाइरस फैलिएको भन्दै पुनः लकडाउन गर्नुपर्ने आवाज उठिरहेको छ । अहिले पनि शैलुन, सभा समारोह, विद्यालय, सिनेमा हल सञ्चालन गर्न सरकारले अनुमति दिएको छैन । तर, पछिल्लो समय खुल्ला भएका किराना पसल, थोक बजारमा भने मानिसहरूको भीडभाड अस्भाविक रूपमा बढ्न थालेको छ ।

बुटवलको थोक बजार केन्द्रमा कोरोना संक्रमणको जिखिम हराएको भान हुने गरी भीडभाड हुन्छ । यो थोक बजारमा आउनेहरूले सरकारले तोकेको स्वास्थ्यका मापदण्ड पनि पालना गरेको देखिँदैन । यता भारतबाट तरकारी तथा फलफूल लिएर आउने सवारी साधनका कारण पनि जोखिम बढेको स्थानीयको गुनासो छ ।

स्थानीय तहले समेत बढी भीडभाड हुने भन्दै हाटबजार, शैलुनलगायतका केही व्यवसाय बन्द गरे पनि कृषिउपज तथा थोक बजार केन्द्रको यो दृश्यले बुटवल उपमहानगरपालिकाले गरेको निर्णयलाई मजाक बनाइरहेको छ ।

गत साता हाटबजारको सपिङ कम्प्लेक्समा व्यवसाय गर्ने २ भारतीय व्यापारीमा कोरोना देखिएपछि उनीहरू सम्पर्कमा छैनन् । यस्तोमा बुटवल उपमहानगरपालिकाले हाटबजारमा व्यवसाय गर्नेलाई कोरोना लागेको अवाह फैलाएपछि अहिले हाटबजार पनि बन्द गर्ने निर्णय गरेको छ । ठूला-ठूला सपिङ महल र कृषि थोक बजार, किराना पसलमा भीडभाड हुँदा बुटवल उपमहानगरपालिकाले नियन्त्रणमा चासो नदेखाउने भन्दै व्यवसायी विरोधमा उत्रिएका छन् ।

तर, स्थानीय तलले भीडभाड बढी हुने थोक बजार खोल्न दिएर हाट बजार बन्द गर्ने निर्णय गरेको छ । स्थानीय सरकारले थोक बजार बन्द नगरी हाटबजार बन्द गर्दा स्थानीय गरी खाने वर्ग भने अप्ठयारोमा परेका छन् । व्यवसायीले पनि थोक बजार बन्द नगरी हाटबजार मात्र बन्द गरेर कोरोना नियन्त्रण नहुने बताउँदै आएका छन् ।

हाटबजार व्यवसायी संघका अध्यक्ष टेक बहादुर थापाले स्थानीय प्रशासनले हाटबजार मात्र बन्द गरेर कोरोना संक्रमण नियन्त्रण हुन्छ भन्नु मुर्खता भएको बताए । उनले बढी भीडभाड हुने थोक बजार नै बन्द गर्नुपर्ने बताए । हाटबजारमा अहिले पनि करिब ३ हजार साना व्यवसायहरू रहेका छन् । साँझ-बिहान तरकारी बिक्री गरेर दैनिक गुजारा गर्नेहरू हाटबजार बन्द हुँदा सबैभन्दा बढी मारमा परेको व्यवसायीको भनाइ छ ।

केही सीमित व्यक्तिलाई हाट लगाउने गरी आलोपालो, सदस्याका नम्बरका आधारमा जोर-बिजोर प्रणालीसँगै स्वास्थ्य सावधानी अपनाएर हाटबजार सञ्चालन गर्न सकिने विकल्प व्यवसायीले स्थानीय तहलाई दिएका छन् । व्यवसायीले दिएको विकल्प स्थानीय तहले लागू गरेमा सर्प पनि मर्ने, लौरो पनि नभाचिने भने जस्तै हुँदा खाने र हुने खाने वर्ग सबैले हाटबजारबाट तरकारी खरिद बिक्री गर्न सहज अर्थ जानकार मनिकार कार्की बताउँछन् । स्थानीय सरकारले बजार बन्द गरेर मात्र समस्याको समधान नसोची विकल्पतर्फ ध्यान दिनुपर्ने उनको भनाइ ।

'सरकारको लकडाउन नीति असफल साबित भइसक्यो । अब फेरि त्यही नीति अवलम्बन गर्नु हुँदैन । गरिखाने मान्छेको चुलो निभ्ने नीतिको के अर्थ ? त्यसैले अब कोभिड अस्पतालको संख्या बढाउने, परीक्षण बढाउने अनि स्वास्थ्य सेवा र उपचार बढाएर सतर्कतापूर्वक बन्द व्यापार, इलम उद्यम गर्न दिनुपर्छ, बन्द विकल्प हैन' उनले भने ।

प्रकाशित मिति: शनिबार, साउन २४, २०७७ २१:३४