काभ्रेको क्वारेन्टाइनमा युवतीद्वारा आत्महत्या, स्वास्थ्य चौकी र पालिका अध्यक्षको घरमा तोडफोड

काभ्रेको क्वारेन्टाइनमा युवतीद्वारा आत्महत्या, स्वास्थ्य चौकी र पालिका अध्यक्षको घरमा तोडफोड

A+ A A-

काभ्रेको बेथानचोक गाउँपालिकास्थित ढुङ्खर्क स्वास्थ्य चौकीमा रहेको क्वारेन्टाइनमा युवतीले आत्महत्या गरेकी छन् ।

करिब १ हप्ताअघि दुवईबाट स्वदेश फर्किएकी बेथानचोक गाउँपालिका–४ की २१ वर्षीया युवतीले शुक्रबार दिउँसो ३ बजे २ नम्बर वडाको गेलढुङ बजारस्थित क्वारेन्टाइनमा झुण्डिएर आत्महत्या गरेकी हुन् । गाउँपालिकाले सञ्चालन गरेको क्वारेन्टाइनमा उनी एक्लै रहेको बेथानचोक गाउँपालिका अध्यक्ष प्रेम बहादुर तिमल्सिनाले जानकारी दिए ।

‘स्वदेश फर्किएसँगै उनलाई क्वारेन्टाइनमा राखिएको थियो । क्वारेन्टाइनमा बसेको अन्य सबै घर फर्किएका थिए । उनी एक्लै बस्दै आएकी थिइन्’, अध्यक्ष तिमल्सिनाले शिलापत्रसँग फोनमा भने । उनका अनुसार युवतीले क्वारेन्टाइनस्थित उनी बस्ने कोठाको ढोका लगाएर डोरीमा पासो लगाएकी थिइन् ।

ढोका खोलेर हेर्दा उनी झुण्डिएको अवस्थामा मृत फेला परेको स्थानीय पत्रकार मोहनकृष्ण तिमल्सिनाले जानकारी दिए । युवतीको आफन्तले स्वास्थ्यचौकी तोडफोड गरेका छन् । गाउँपालिका अध्यक्ष तिमल्सिनाको घरमा पनि युवतीको आफन्तले तोडफोड भएको छ । क्वारेन्टाइन र अध्यक्षको घर करिब ५ मिनेटको दूरीमा छ ।

‘स्वास्थ्य चौकी तोडफोड गरेर ध्वस्त बनाए । मेरो घरको झ्यालमा ढुंगाले हानेर तोडफोड गरेका छन्’, अध्यक्ष तिमल्सिनाले भने । उनी राति ९ बजेसम्म पनि घर गएका छैनन् । युवतीले आत्महत्या गरेपछि अध्यक्ष तिमल्सिना स्वयं घटनास्थलमा पुगेका थिए । उनी घटनास्थलबाट बाहिरिने बित्तिकै स्थिति तनावग्रस्त बनेको थियो ।

‘युवतीको आफन्त उग्र भएर सरकारी संरचनादेखि मेरो घर पनि तोडफोड गरे । मेरो घर जलाउने तयारीमा थिए । सशस्त्र प्रहरी आएपछि मेरो घर आगलागीबाट बचेको छ’ अध्यक्ष तिमल्सिनाले भने । उनका अनुसार सशस्त्र र जनपथ प्रहरीले स्थिति नियन्त्रणमा लिएका थिए ।

प्रकाशित मिति: शनिबार, साउन २४, २०७७ ०३:०६