'ट्रेण्डिङ गायिका' भन्दा खुसी समीक्षा

A+ A A-

कास्कीको लाहाचोक । जहाँ चलचित्र 'छक्का पञ्जा'को छायाङ्कन चलिरहेको थियो । चलचित्रको छायाङ्कन हेर्न स्थानीयको बाक्लो उपस्थिति थियो । दर्शकदीर्घाको अग्रपंक्तिमा थिइन्, समीक्षा अधिकारी ।

अग्रपंक्तिमा रहेकी समीक्षाले 'नाइँ नभन्नू ल २'मा समावेश 'फेरिफेरिफेरि नाइँ नभन्नू ल' बोलको गीत गुनगुनाइन् ।

समीक्षाको स्वर छायाँकार पुरुषोत्तम प्रधानको कानमा ठोकियो । पुरुषोत्तम समीक्षातिर फर्किए । समीक्षाको स्वरले पुरुषोत्तमको ध्यान तान्यो ।

छायाङ्कन सकिएपछि पुरुषोत्तमले समीक्षालाई बोलाए । विद्यालयको कक्षामा लगेर गीत गाउन लगाए र आफूले भिडियो रेकर्ड सुरु गरे । समीक्षाले निर्धक्क गाइन्- 'मर्ने कसैलाई रहर हुँदैन... ।'

पुरुषोत्तमसँगै रहेको 'छक्का पञ्जा' युनिटले पनि समीक्षाको तारिफ गर्‍यो । १४ वर्षीया समीक्षा मख्ख परिन् ।

समीक्षालाई गीत गाउने अवसर दिने आश्वासनसहित पुरुषोत्तमले समीक्षाको मोबाइल नम्बर पनि टिपे । समीक्षा उत्साहित थिइन्, 'कहिले होला मेरो सपना पूरा हुने ? कहिले होला गीत रेकर्ड गर्न पाउने ?'

०००

समीक्षालाई पुरुषोत्तमकै फोनको प्रतीक्षा थियो । उनको प्रतीक्षा धेरै लामो भएन । एक महिना नबित्दै उनलाई पुरुषोत्तम प्रधानले फोन गरे, 'नानी, तिमीले नाइँ नभन्नू ल ५ मा गीत गाउनुपर्छ । विकासराज आचार्य दाइले फोन गर्नुहुन्छ, उठाऊ है !'

'वाह, नाइँ नभन्नू ल ५ !', खुसी हुँदै समीक्षाले 'हस्' भनिन् ।

केही समयमा नै निर्देशक विकासराज आचार्यले समीक्षालाई फोन गरे । स्वरको तारिफ गरे ।

विकाससँगै रहेका सङ्गीतकार वसन्त सापकोटा बोले, 'नानु, तिम्रो २ दिनपछि गीत रेकर्डिङ छ । भोलि-पर्सिमा तयार भएर आउनू है !'

समीक्षामा खुसीको सीमा नै रहेन । भोलिपल्टै कपडा किन्न बजार झरिन् । त्यो पल सम्झिँदै समीक्षा भन्छिन्, 'घरमा बस्दा कपडामा केही मतलब हुँदैनथ्यो । अब काठमाडौं नै आउने भएपछि त राम्री हुनपर्‍यो नि भन्ने लागेर सपिङ नै गरेँ ।'

वसन्तको फोन आएको तेस्रो दिन । फुपूको साथ लागेर समीक्षा काठमाडौं आइन् । उनलाई हतार थियो, रेकर्डिङ स्टुडियो छिर्ने ।

समीक्षाले मेलिना राई, अन्जु पन्तलगायत गायिकाहरूले स्टुडियोमा गीत गाएको हेरेकी थिइन् । उनलाई स्टुडियो कस्तो हुन्छ भन्ने थाहा थियो । तर, त्यसको अनुभव गर्न चाहन्थिन्, समीक्षा ।

काठमाडौं आएकै दिन वसन्तले आफ्नो अफिसमा अभ्यासका लागि बोलाए । त्यो समय पनि समीक्षालाई रेकर्डिङ स्टुडियोमै पुग्ने हतार थियो ।

समीक्षा भन्छिन्, 'साँच्चिकै म त स्टुडियो छिर्नका लागि यति उत्साहित थिएँ कि, त्यसलाई म शब्दमा बयान गर्नै सक्दिनँ ।'

भोलिपल्ट बिहान । वसन्तले समीक्षालाई स्टुडियो लिएर गए । समीक्षा उत्साहित भएर स्टुडियो छिरिन् ।

'आहा ! कस्तो आनन्द', समीक्षा भन्छिन्, 'त्यहाँ एसी चलेको रहेछ । चिसो भएको थियो । मैले त त्यहाँ स्वर्गीय आनन्द महसुस गरेकी थिएँ ।'

माइक समक्ष पुगेर समीक्षाले नडराई गाइन्, 'फेरि कहाँ आउँछ र घुमेर, यो बालापनको उमेर... ।'

गीत रेकर्डिङ सकियो । त्यहाँ उपस्थित सबैले समीक्षाको तारिफ गरे । समीक्षा झनै मख्ख परिन् ।

रेकर्डिङ सकेर गाउँ फर्किएपछि समीक्षाले राम्रै फुर्ती लगाइन् । उनले साथीहरूलाई जम्मा गरेर भन्न थालिन्, 'हेर, स्टुडियो त यस्तो हुँदो रहेछ । उस्तो हुने रहेछ । म त त्यहीँ ढलेको... ।' साथीहरूले पत्याइरहेकाले पनि समीक्षा उत्साहित हुँदै थप गफहरू लगाइरहेकी थिइन् ।

तर, सबैको प्रतीक्षा एउटै थियो- समीक्षाको स्वरमा रेकर्ड भएको पहिलो गीत 'बालापनको उमेर ।'

०००

आज गीत रिलिज हुँदै छ भन्ने जानकारी समीक्षालाई थियो । घरमा नेट थिएन । त्यसैले बुबाले किनिदिएको 'ट्याब' बोकेर उनी स्कुल पुगिन् । स्कुलकै 'वाईफाई'बाट गीत 'सेभ' गर्ने उनको सोच थियो ।

तर, स्कुलको नियमले विद्यार्थीलाई मोबाइल बोक्न दिँदैनथ्यो । कोही साथीले समीक्षाले 'ट्याब' ल्याएको कुरा शिक्षकलाई सुनाइदिए । गीत हेर्न/सुन्न नपाउँदै समीक्षाको ट्याब खोसियो । समीक्षाले आफूले गाएको गीत सुन्न ल्याएको वृत्तान्त बताइन् । तर, शिक्षकले उनको कुरा सुनेनन् ।

समीक्षा भन्छिन्, 'गीत हेर्नका लागि म निकै आतुर थिएँ तर मैले गीत आउनेवित्तिकै हेर्न पाइनँ । म दिनभर स्कुलमा रोएर नै बसेकी थिएँ ।'

घर फर्किने समयमा पनि समीक्षाले आफ्नो ट्याब फिर्ता पाइनन् । उनी आँसुसँगै घर फर्किएकी थिइन् ।

घर फर्किएपछि समीक्षाले एक जना चिनजानको दाइलाई डाटा ‍तानेर नै गीत देखाइदिन आग्रह गरिन् । ती दाइले नै समीक्षालाई गीत सुनाइदिए, भिडियो देखाइदिए ।

समीक्षा भन्छिन्, 'आफ्नो पहिलो गीत सुन्दा कसको मन खुसी नहोला र ! म पनि निकै खुसी भएकी थिएँ ।'

त्यो समय समीक्षालाई युट्युबमा कमेन्ट आउँछ भन्ने पत्तै थिएन । त्यसैले उनले कुनै प्रतिक्रिया हेरिनन् । धेरैले उनको स्वरको तारिफ गरेका थिए । तर, उक्त कुरा समीक्षाले देख्नै पाइनन् ।

समीक्षालाई एउटै चाहना थियो- 'मेरो गीत कार्यक्रमहरूमा बजोस्, सबैतिर सुनियोस् ।'

समीक्षाले देखेको सपना केही दिनमा नै पूरा भयो । उनले जताततै आफ्नो गीत सुन्न थालिन् । कार्यक्रमहरूमा पनि आफ्नो गीत बजेको सुनिन् ।

रमाइलो प्रसङ्ग त के छ भने, जुन दिन गीत रिलिज थियो, त्यस दिन गीत हेर्नका लागि स्कुल लगेको ट्याब खोस्ने शिक्षकले पनि समीक्षाको प्रशंसा गरे- 'राम्रो गाएकी रहिछ्यौ । अझै राम्रो गर्नू है' भनेर ।

समीक्षा पहिलो गीतबाट नै दर्शक/श्रोताको नजरमा परिन् । पहिलो गीतबाट नै समीक्षाले राम्रो फ्यान/फलोअर्स कमाइन् ।

समीक्षाको दोस्रो गीत पनि वसन्त सापकोटासँगै थियो । 'बा' बोलको उक्त गीतमा समीक्षा आफैँ फिचर पनि भइन् । उक्त गीतले समीक्षालाई थप उचाइ दियो ।

०००

यसबीचमा समीक्षाले धेरै गीत रेकर्ड गराइन् । केही गीतहरू हिट भए, केही गीतहरू औसत रहे ।

लकडाउनकै बीचमा समीक्षाको एउटा नयाँ गीत आयो- 'माया मारेर ।'

लोकलयमा तयार भएको यस गीतलाई धेरैले रुचाए । २ महिनामा नै यस गीतले युट्युबमा १ करोड भ्युज पार गरिसकेको छ ।

समीक्षा यस गीतलाई आफ्नो अर्को 'टर्निङ प्वाइन्ट' मान्छिन् । यस गीतपश्चात् आफू झनै व्यस्त भएको समीक्षा बताउँछिन् । उनले भनिन्, 'मैले लोकगीत गाएकी थिइनँ । राम्रो गीत भएकाले गाइदिएँ । यही गीतले मलाई व्यस्त बनाइदियो ।'

अहिले समीक्षा निकै व्यस्त छन् । हरेक दिन उनलाई रेकर्डिङमा भ्याई नभ्याई छ । तर, एक दिनमा एउटा गीतभन्दा बढी रेकर्ड गर्दिनन् ।

समीक्षा भन्छिन्, 'अफर त धेरै आउँछन् तर मैले छानेर मात्र गीत रेकर्ड गर्ने गरेकी छु । घाँटीमा समस्या भएका कारण पनि दिनमा एउटाभन्दा गाउन सक्दिनँ ।'

'लो बिट'का गीतहरू भए दिनमा २ वटासम्म रेकर्ड गर्ने समीक्षाले सुनाइनन् ।

०००

समीक्षा उमेरले १५ पुगिन् । तर, उनको स्वरको परिपक्वता २५ वर्षभन्दा माथिका गायिकाहरूको जस्तै छ । हरेकले समीक्षालाई दिने प्रतिक्रिया यही हो ।

समीक्षा भन्छिन्, 'धेरैले मेरो परिपक्व स्वर भएको भन्दै तारिफ गर्नुहुन्छ । भविष्यमा झनै राम्रो गर्छौ भन्दै हौसला दिनुहुन्छ । दर्शक/श्रोता तथा शुभचिन्तकको हौसलाले पनि काम गर्न ऊर्जा थपिन्छ ।'

उनका धेरै गीतहरूले ट्रेण्डिङमा स्थान बनाएका छन् । त्यसैले समीक्षालाई धेरैले 'ट्रेण्डिङ गायिका'को ट्याग दिन्छन् । समीक्षा यस कुरालाई सहर्ष स्वीकार्छिन् ।

'ट्रेण्डिङ गायिका भन्नु नराम्रो हो र ?', समीक्षा भन्छिन्, 'मलाई त ट्रेण्डिङ गायिका भनेको राम्रो लाग्छ । गीत ट्रेण्डिङमा आयो भने म त धेरै खुसी हुन्छु । मलाई ट्रेण्डिङ विशेष लाग्छ ।'

प्रकाशित मिति: शनिबार, साउन २४, २०७७ १४:००