प्रस्तावित न्यायाधीशविरुद्ध तीन उजुरी

A+ A A-

न्यायपरिषद्ले सर्वोच्च अदालतमा गरेको न्यायाधीश सिफारिस न्यायालयको मर्मविपरीत रहेको भन्दै संघीय संसद्को सुनुवाइ समितिमा तीनवटा उजुरी परेका छन् । ती उजुरी विशेषगरी प्रस्तावित न्यायाधीश मनोज शर्मा र प्रकाशकुमार ढुंगानाविरुद्ध छन् ।

नेपाल बार एसोसिएसनका पूर्वअध्यक्ष एवं वरिष्ठ अधिवक्ता शम्भु थापाले सर्वोच्चका न्यायाधीश सिफारिसमा संविधानले गरेको व्यवस्था, न्यायपरिषद्ले खेल्नुपर्ने भूमिका, न्यायाधीश नियुक्तिमा परिषदको उत्तरदायित्वलगायत बुँदा समावेश गरेर ७ पृष्ठ लामो उजुरी दर्ता गरेका छन् । उनले उजुरीमा विशेषगरी शर्माबारे उल्लेख गरेका छन् । ‘सुनुवाइसम्म पर्खनुहोस्, सबै कुरा बाहिर आउँछ,’ थापाले कान्तिपुरसँग भने, ‘यसअघिका उजुरी बेनामे हुन्थे, मैले नाम र मोबाइल नम्बरसहित उजुरीमा उल्लेख गरेको छु ।’

ढुंगानाविरुद्ध पनि उजुरी दर्ता भएको छ । ‘उजुरीबारे भन्न मिल्दैन,’ समितिका एक कर्मचारीले भने, ‘दर्ता गर्ने म्याद अझै छ, सार्वजनिक नगरौं ।’ उजुरी दर्ता गराउन वैशाख २ सम्म समयसीमा तोकिएको छ । उजुरीमाथि वैशाख ३ गते छलफल हुनेछ । यस पटकको सिफारिसमा सबभन्दा विवादित मनोज शर्मा देखिएका छन् । उनी पूर्वप्रधानन्यायाधीश दामोदर शर्माका भतिज हुन् ।

शर्मा प्रधानन्यायाधीश भएका बेला उनी फुनरावेदनको अतिरिक्त न्यायाधीश नियुत्त भएका थिए । पछि ऊच्च अदालत गठनका क्रममा अतिरित्त न्यायाधीशहरू पदमुक्त हुँदा उनी फालिएका थिए । प्रधानन्यायाधीश चोलेन्द्रशमशेर जबराको शपथग्रहण समारोहमा पुगेका शर्माले त्यसपछि लगातार बालुवाटारस्थित प्रधानन्यायाधीश निवास र कानुनी पृष्ठभूमिका केही नेकपा निकट नेतासँग हिमचिम बढाएको एक अधिवक्ताले आरोप लगाए ।

न्यायाधीश विवेक पुर्‍याएर स्वतन्त्र फैसला गर्ने पद भए पनि शर्मा आफैं स्वतन्त्र नभएको उनले जनाए । ‘म रेगुलर २२ वर्ष न्यायालयमा छु तर शर्माजी कहिल्यै इजलासमा देखिएका छैनन्, अब उनीबाट हामीले कस्तो न्यायसम्पादनको आशा गरौंला रु’ ती अधिवक्ताले भने, ‘सिफारिस गर्ने र नियुक्ति गर्नेले जानुन् ।’

यस पटक परिषद्ले सर्वोच्चको न्यायाधीशमा उच्च अदालतबाट दुई र कानुन व्यवसायीबाट तीन नाम सिफारिस गरेको छ । प्रस्तावित पाँचै जनाले सुनुवाइ समितिबाट अनुमोदन भएपछि माक्रै नियुत्ति पाउनेछन् । उच्च अदालत पाटनका मुख्य न्यायाधीश ढुंगाना र न्यायाधीश सूक्ष्मलता माथेमा सिफारिसमा परेका छन् । यसअघि उच्च अदालतको मुख्य न्यायाधीशका दाबेदार माथेमालाई तत्कालीन प्रधानन्यायाधीश गोपाल पराजुलीले रोकेका थिए ।

प्रकाशित मिति: आइतबार, वैशाख १, २०७६ १७:११