जब उद्योग वाणिज्य संघका अध्यक्षको घरमा डाेजर चल्यो (तस्वीरसहित)

A+ A A-

बुटवल उपमहानगरपालिकाले बुटवल उद्योग वाणिज्य संघका अध्यक्ष खिमबहादुर हमालको घर भत्काएको छ ।

बुटवल-११, योगिकुटीदेखि ६ वडाको कृषि थोक उपजकेन्द्रसम्म रहेको कालिकापथ विस्तारको क्रममा सडक सीमाभित्र रहेको भन्दै ११ वडाकाे कालिकापथमा रहेको उक्त घर भत्काइएको हो ।

बुटवलको उज्यालो क्षेत्र र रात्रिकालीन समयमा समेत व्यवसायको प्रमुख केन्द्र बनाउने उद्देश्यका साथ विस्तार सुरु गरिएको कालिका पथ सडक निर्माण कार्य बुटवल उद्योग वाणिज्य संघकै अध्यक्षका कारण अवरुद्ध भएको थियो ।

बुटवल उपमहानगरपालिकाको नाली बिस्तारका लागि बिनियोजित बजेट र प्रदेश सरकारको ६ लेनमा चौडा गर्नका लागि विनियोजन गरेको बजेटबाट निर्माण सम्पन्न गर्ने लक्ष्यका साथ सुरु गरिएको उक्त निर्माण कार्य रोक्न भन्दै बुटवल उद्योग वाणिज्य संघका अध्यक्षले अदालतमा गएपछि निर्माण कार्य रोकिने अवस्थामा पुगेको हो ।

बुटवल उपमहानगरपालिकाको ९ र ११ वडा भएर उत्तर दक्षिण निर्माण हुने उक्त सडक विस्तारमा वडा ९ मा रहेका सडक किनारका सबै बासिन्दाले घर टहरा तथा पर्खाल भत्काएको भए पनि बुटवल उद्योग वाणिज्य संघका अध्यक्ष खिमबहादुर हमालले अटेर गर्दै आएका थिए ।

बिहानै ठूलो संख्यामा प्रहरीसहित पुगेको बुटवल उपमहानगरपालिकाको डोजरले उक्त घर भत्काएको हो । हमालले सडकमा पर्ने आफ्नो घर नभत्काएका कारण उनकै घरछेउमा आएर नाली निर्माण कार्य अवरुद्ध भएको थियो ।

हमाल अहिले सडक निर्माण रोक्ने उदेश्यले सर्वोच्च अदालत गएका छन् । उनले बुटवल उपमहानगरपालिकामा कालिका पथ सडक किनारमा घर बनाउँदा ५० फिटमा घर बनाउने अनुमति पाएको र सोहीबमोजिम नक्सा पास गरेकाले नगरपालिकाले ८२ फुट सडक बनाउँदा आफ्नो निजी सम्पत्ति नोक्सानी हुने भन्दै उक्त कार्य रोक्न न्तरिम आदेश माग गरेका थिए । तर, अदालतले हमालको मागबमोजिमको आदेश भने दिएन ।

यसअघि २०५४ मा यो सडकलाई ८२ फुटको कायम गर्ने गरी तत्कालीन बुटवल नगरपालिकाले तयारी गरे पनि केही घरधनीले सडक विस्तारमा अवरोध सिर्जना गरेकाले काम सुरु हुन सकेको थिएन ।