प्रचण्डलाई ओलीले भने: ‘अबको प्रधानमन्त्री तपाईं’

A+ A A-

अहिले सत्तारुढ नेपाल कम्युनिस्ट पार्टी (नेकपा) विवादको भुङ्ग्रोमा छ । पार्टीका २ अध्यक्ष २ तिर मुन्टो बटारेर बसेका छन् । स्थायी कमिटी नामको समूह एक ठाउँ बस्न सक्ने अवस्था छैन ।

२ ठूला कम्युनिस्ट घटक तत्कालीन नेकपा एमाले र माओवादी केन्द्र मिलेर २ वर्षअघि मात्र बनेको हो नेकपा । त्यसयता यसभित्रको उतारचढाव हेर्दा बडो मज्जा लाग्छ ।

नवसंयोजित नेकपाको अवस्था देख्दा चर्केको हाँडी जस्तो लाग्छ, जुन टालिएजस्तो त देखिन्छ तर जोडिन सक्दैन ।

यसैबीच नेकपाभित्रका मतभेद र मनभेद निकै धेरै बाहिर आइसकेका छन् । विशेषगरी २ अध्यक्ष विवादका केन्द्रमा छन् भने अन्यले उनीहरूलाई उत्प्रेरित गरिरहेका छन् । त्यसमा सबैका आआफ्ना स्वार्थ हुन सक्लान् ।

पटक पटक बैठक बस्दा पनि समस्या अथवा विवाद र मतभेदको निरूपण हुन नसकेपछि अहिले पछिल्लो समय २ अध्यक्ष पुष्पकमल दाहाल (प्रचण्ड) र केपी शर्मा ओली ‘वान टु वान’ वार्तामा बसिरहेका छन् ।

वार्तामा घम्साघम्सी पनि हुन्छ, गर्नुपर्छ भने सहमतिका कुरा वा मिलनका कुरा पनि । यो कुरा दुवै जनालाई राम्ररी थाहा छ ।

यही भएर यी दुवै अवस्थाको आँकलन गर्दै ‘वान टु वान’ वार्तामा उनीहरूले कहिले ग्रीन टी त कहिले मिठाईका परिकार खाँदै आएका छन् ।

उनीहरू निकट स्रोतका अनुसार ग्रीन टीले वार्ताका समयमा उत्पन्न हुनसक्ने अस्ति भर्खरको स्थायी कमिटीमा घनश्याम भुसाल, बेदुराम भुसाल, रघुजी पन्तलगायतका बीच भएको ‘हात हालाहाल’ जस्तो अवस्थामा ‘कुल’ गराउन सहयोग गर्छ ग्रीन टीले भने वार्ता सकारात्मक बनाउन ‘जस्तो खान्की, उस्तै बान्की’ भनेझैँ मीठा मिठाईका परिकारले वार्तालाई मीठो र आनन्ददायी बनाउँछन् ।

यसै क्रममा ओली-प्रचण्डबीचको वान टु वान वार्ताको भिडियो टेप फेलापरेको छ ।

उक्त भिडियो टेपमा सुनिएको कुरा यहाँ जस्ताको तस्तै राखिएको छ पाठकका निम्ति । किनभने, हाम्रा मुलुकका नेता, हाम्रा अभिभावकले केके गर्दै छन्, केके भन्दै छन् भनेर जान्न पाउने हाम्रो अधिकार हो ।

(यो टेप अत्यन्त गोप्य ढंगले रेकर्ड गरिएको भएकाले टेप दिने स्रोतको गोपनीयतालाई कायम गरिएको छ ।)

ओली-प्रचण्ड संवाद यस्तो छ:

ओली: (निहुरिएर चस्माको माथिपट्टिबाट प्रचण्डतिर हेर्दै) भन्नुस् प्रचण्ड काम्रेड, के हो खास तपाईंको असन्तुष्टि ?

प्रचण्ड: (बाउँटिएझैँ गरेर) केही छैन ।

ओली: (गजक्क पर्दै) तब किन बटारिनुहुन्छ सधैँ ?

प्रचण्ड: (दङ्ग्याउँदै) काँ बटारिएको छु ?

ओली: ऐना हेर्नुस् त, अहिले पनि मसँग कुरा गर्दा बाटारिइरहनुभएको छ ।

प्रचण्ड: (केहीबेर मौन रहेर) मलाई फसाउनुभयो तपाईंले ।

ओली: (आश्चर्य मानेझैँ गर्दै) कसरी फसाएँ मैले तपाईंलाई ?

प्रचण्ड: (हल्का कुम हल्लाउँदै) दाजु-भाइ मिलेर खाऔँला, आउनुस् मिलौँ भनेर ।

ओली: (थाहा नपाएझैँ) के खाने भनेको थिएँ र ?

प्रचण्ड: (निन्याउरो अनुहार बनाउँदै) हामी सर्वहारी हौँ, हाम्रो वर्गले जे भेटे पनि पचाउन सक्नुपर्छ भन्नुभएको थियो त !

ओली: त्यो त हो त । गरिब, मजदुर, विपन्न, श्रमजीवी, धनी, महाजन सबैका जेजे भेटे पनि पचाउनुपर्छ हामीले ।

प्रचण्ड: (ठुस्किँदै) अनि पहिला खान पाउनुपर्दैन पचाउन ?

ओली: भागशान्ति दिएकै छु त, मिलाएर खानू ।

प्रचण्ड: (रिसाउँदै) अरूले खाएको हेरेर अर्काको पेट अघाउँछ काम्रेड ?

(ओलीले प्रचण्डको अनुहारको राप पढे, फेरि आँखा चस्मामाथिबाट तन्काएर, मुन्टो निहुर्‍याएर)

ओली: ए, भनेपछि भान्से तपाईंलाई बनाउनुपर्‍यो ?

(ओठ चप्प पारेर आँखा झिमिक्क पार्दै प्रचण्डले मुन्टो तलमाथि पारे)

(एकछिन गम्भीर भएर प्रचण्डतिर हेरे ओलीले)

ओली: पार्टीमा त तपाईंलाई नै मूलभान्से भनिदिएकै छु त !

प्रचण्ड: (झोकिँदै) रित्तो भकारीको मालिक बनाएर मेरो जीवन चल्छ काम्रेड ?

ओली: ए, श्रम नगरी खान भनेको छ हाम्रो सिद्धान्तले ? भकारी दिएको छु, अन्न भर्नतिर लाग्नुपर्‍यो नि काम्रेड !

प्रचण्ड: (आँखा राताराता बनाउँदै) सिद्धान्तको पछि लागेर जीवन चल्छ ?

ओली: हेर्नुस् काम्रेड ! हामी कम्युनिस्ट भनेका सिद्धान्तका दास हुनुपर्छ, सिद्धान्त र विधि अनि पद्धतिभन्दा एक इन्च बाहिर जान मिल्दैन ।

(प्रचण्ड खुट्टाले भुइँ कोट्याउँदै चुप रहे एकछिन । सायद यो सम्झिए- ‘मैले ज्यान बाजी थापेर आन्दोलन र सशस्त्र युद्ध गर्दा गोरु गाडा चढेर अमेरिका पुगिँदैन भन्थ्यौ, आज बडो सिद्धान्त, विचार र दर्शन सिकाउँछौ ?’)

प्रचण्ड: मैले त्यही भनेको, जुन काम्रेडले भन्दै हुनुहुन्छ ।

ओली: तब हाम्रो पार्टीको विधान, देशको संविधान सबै राम्ररी अध्ययन गर्नुस् ।

प्रचण्ड: (गिज्याउने हाँसो खिसिक्क हाँस्दै) काम्रेड ! म यति बेबकुफ छु जस्तो लाग्छ, जसले देशको संविधान र पार्टीको विधान पढेको छैन ?

ओली: मैले तपाईंलाई कहिले बेबकुफ भनेको छु ? के जंगलमा बसेर १० वर्ष हत्या, हिंसाको राजनीति गर्दा बेबकुफ भनेको थिएँ, जबकि मलाई राम्ररी थाहा थियो कि यस्ता युद्धले कुनै फाइदा गर्दैन ।

अनि त्यति चम्किएको पार्टी माओवादी तपाईंकै नालायकीका कारण टुक्राटुक्रा हुँदा पनि मैले तपाईंलाई बेबकुफ भनेको सुन्नुभयो कहिल्यै ?

त्यति मात्र होइन, प्रचण्ड नामकै इतिहास मेटिन लागेका बेला आउनुस् म तपाईंको अस्तित्व केही समय जोगाइदिन्छु भन्दा सरक्क आँखा चिम्लेर एमालेमा हामफाल्दा पनि मैले तपाईंलाई बेबकुफ भनेँ र !

प्रचण्ड: (अक्क न बक्क बन्दै) हुनत गल्ती मेरै भयो होला कि तपाईं जस्तालाई विश्वास गरेँ, भर परेँ ।

ओली: (तीखा आँखाले हेर्दै) धन्न भन्नुस् कि मलाई विश्वास गर्न पाउनुभयो । अहिलेसम्म तपाईंलाई राजनीतिक जीवनदान मिलेको छ- मसँग भएकाले ।

प्रचण्ड: (बाउँटिँदै) अरू कुरा थाहा छैन काम्रेड ! मलाई तपाईंले साह्रै हेप्नुभयो ।

ओली: कसरी हेपेँ ?

प्रचण्ड: सहमति के थियो हाम्रो ? बाँडेर खाने भनेको होइन ऊबेला ?

ओली: हो त ! हिजो, अस्ति, अझ अस्ति अथवा जहिले भेटे पनि तपाईं र मैले खानेकुरा नबाँडी खाएका छौँ र ?

प्रचण्ड: (जनयुद्धकालीन जोस निकाल्दै) म ठट्टा गर्न आएको होइन काम्रेड ! सिरियस भन्दै छु ।

ओली: ए, मैलेचैँ ठट्टा गर्दै छु ? (बिस्कुटका टुक्रा राखेको प्लेट अगाडि सार्दै) लिनुस्, ४ वटा रहेछन्, आधाआधा लिऔँ । २ वटा तपाईं लिनुस् ।

(कालो चियाको कप उठाउँदै) के यो पनि बाँडौँ ? बाँडीचुँडी खाने बानी नै हो मेरो । चिन्ता नगर्नुस् ।

प्रचण्ड: नबुझेझैँ नगर्नुस् काम्रेड । हामी मिल्नुअघिको सहमति सम्झिनुस् । दुनियाँलाई थाहा छ ।

ओली: अब पार्टीमा कार्यकारी अध्यक्ष तपाईं नै हो भन्दिएकै छु, सत्तारुढ दलको कार्यकारी अध्यक्ष बन्न पाउनुभएकै छ । तपाईंले नै भनेको एक व्यक्ति एक पद दिएकै हुँ । अब के चाहियो त ?

प्रचण्ड: तपाईं चैँ किन २ पदमा त ? एउटा छाड्नुस् ।

ओली: तपाईं कार्यकारी अध्यक्ष भनेपछि म त झुम्राको पुतली जस्तै त हो ।

प्रचण्ड: हुँदैन । कि प्रधानमन्त्री छाड्नुस् कि अध्यक्ष ।

ओली: म दुवै छाड्ने मुडमा छु, ढुक्क हुनुस् ।

प्रचण्ड: (अनुहार उज्यालो बनाउँदै, कुम हल्लाउँदै) कहिले छाड्ने त ?

ओली: चाँडै ।

प्रचण्ड: तत्काल छाड्नुपर्छ ।

ओली: (उठेर प्रचण्ड छेउ आएर धाप मार्दै) काम्रेड ! अबको प्रधानमन्त्री पक्का तपाईं हो ।

प्रचण्ड: कहिले ?

ओली: आगामी आमनिर्वाचनमा मैले हारेँ, तपाईंले जित्नुभयो । नेकपाले झुक्किएर भए पनि बहुमत ल्यायो र तपाईंलाई नै संसदीय दलको नेता चुने भने तपाई पक्का प्रधानमन्त्री हो, ढुक्क हुनुस् ।

(प्रचण्ड खुसीले पुलकित भएर बसेकै ठाउँमा निदाए ।)

(यो सामग्री आज परेको ‘गाईजात्रा’ विशेष सन्दर्भका लागि तयार पारिएको हो । यसमा सत्य, तथ्यको मात्रा शून्य प्रतिशतभन्दा बढी छैन ।)

प्रकाशित मिति: मंगलबार, साउन २०, २०७७ १८:३६