बागमतीका २८ स्थानीय तहको बजेट अझै आएन

A+ A A-

बागमती प्रदेशका २८ वटा स्थानीय तहले अझै बजेट नल्याएको संघीय मामिला तथा सामान्य प्रशासन मन्त्रालयले जनाएको छ ।

प्रदेशमा काठमाडौं उपत्यकाभित्रका ५ सहित २८ वटा पालिकाले आर्थिक वर्ष २०७७/०७८ को बजेट र नीति तथा कार्यक्रम मन्त्रालयमा अझै पेस गरेका छैनन् । काठमाडौंको दक्षिणकाली नगरपालिका, बूढानीलकण्ठ नगरपालिका, शंखरापुर नगरपालिका, भक्तपुरको भक्तपुर नगरपालिका, मध्यपुरथिमि नगरपालिकाले बजेट ल्याउन असफल भएको मन्त्रालयले जनाएको छ ।

अन्तरसरकारी वित्त व्यवस्थापन ऐन २०७४ अनुसार १० असार गाउँ वा नगरसभामा पेस गरी असार मसान्तसम्म बजेट पारित १ साउनबाट बजेट कार्यान्वयन सुरु गर्नुपर्नेमा प्रदेशका २८ स्थानीय तहले साउन दोस्रो साता भइसक्दा पनि बजेट र नीति तथा कार्यक्रम पास गरेका छैनन् ।

सिन्धुलीको ३ पाटन गाउँपालिका, हरिहरपुरगढी गाउँपालिका, रामेछापको मन्थली नगरपालिका, खाँडादेवी गाउँपालिका, लिखु तामाकोसी गाउँपालिका, दोलखाको शैलुङ गाउँपालिका, रसुवाको आमाछोदिङमो गाउँपालिका, धादिङको खनियाबास गाउँपालिका र गजुरी गाउँपालिकाले बजेट ल्याउन असफल भएको मन्त्रालयले जनाएको छ ।

धादिङकै त्रिपुरासुन्दरी गाउँपालिका, नुवाकोटको ककनी गाउँपालिका, काभ्रेपलाञ्चोकको खानीखोला गाउँपालिका, चौँरीदेउराली गाउँपालिका, तेमाल गाउँपालिका, भुम्लु गाउँपालिका र चितवनको रत्ननगर नगरपालिकाले पनि बजेट ल्याइनसकेको बताइएको छ । यसैगरी मकवानपुरको ३ वटा स्थानीय तहले पनि बजेट ल्याएका छैनन् ।

मकवानपुरको भीमफेदी गाउँपालिका, बकैया गाउँपालिका र बागमती गाउँपालिकाले बजेट नल्याएका हुन् । बजेट पारित भए पनि गाउँपालिका अध्यक्षले प्रमाणीकरण नगरिसकेकाले संघीय मामिला मन्त्रालयमा रिपोर्ट पठाइनसकिएको भीमफेदी गाउँपालिकाका प्रमुख प्रशासकीय अधिकृत जीवन कुवँरले जानकारी दिए ।

पारित भइसकेको बजेट नेपाल सरकारको सूत्र नामको प्राविधिमा अपडेट नगरिसकिएकाले मन्त्रालयको रेकर्डमा नदेखिएको उनको भनाइ छ । गाउँपालिकाले २५ असार नै बजेट पारित गरेको उनले बताए । बकैया गाउँपालिकाले पनि २६ असार बजेट पारित गरिसकेको तर, प्राविधिक काम बाँकी रहेको बताएको छ । गाउँपालिकाका प्रमुख प्रशासकीय अधिकृत लक्ष्मण पुडासैनीले गाउँसभाबाट बजेट पारित भएपछि आफूहरूले सूत्रमा अपडेट गरिरहेको र अबको केही दिनमा सकिने बताए ।

बागमती गाउँपालिकाले भने असार २० गते मात्रै गाउँसभा गरी बजेट र नीति तथा कार्यक्रम पेस गरेको थियो । त्यसपछि गाउँसभा नै नबसेको र बजेटसमेत पारित हुन नसकेको गाउँ कार्यपालिकाका १ सदस्यले जानकारी दिए । बजेट पारित भएपछि मात्रै स्थानीय तहलाई खर्च गर्ने बाटो खुल्छ । बजेट ल्याउन नसक्दा पालिकाको विकास निर्माणसहित पुँजीगत काममा समस्या देखिन्छ ।

प्रकाशित मिति: शुक्रबार, साउन १६, २०७७ ००:२१