बागमती प्रदेशका ४ प्रहरी घूससहित पक्राउ

A+ A A-

बागमती प्रदेश प्रहरी कार्यालय हेटौँडाले घूस रकम लिँदालिँदै ४ जना प्रहरीलाई पक्राउ गरेको छ । कार्यालयले सेवाग्राहीको भेषमा विशेष टोली पठाएर मकवानपुर र चितवनमा कार्यरत २/२ जना प्रहरीलाई सोमबार घूस रकमसहित रंगेहात पक्राउ गरेको हो ।

पक्राउ परको प्रहरीलाई प्रदेश प्रहरी कार्यालय हेटौँडा झिकाइएको छ । आर्थिक प्रलोभनमा पर्ने १ हवल्दारसहित ३ जना प्रहरी जवानलाई नियन्त्रणमा लिइएको प्रहरी प्रवक्ता प्रहरी वरिष्ठ उपरीक्षक सुदीप गिरीले जानकारी दिए ।

उनीहरूलाई आवश्यक कारबाहीको प्रक्रिया अगाडि बढाएको गिरीले बताए । ‘हामीले सेवाग्राही बनाएर विशेष प्रहरी टोली पठाएर घुस रकम लिँदालिँदै ४ जनालाई पक्राउ गरेका हौँ । उनीहरुलाई कारबाही सुरु गरिसकेका छौँ’, गिरीले शिलापत्रसँग भने । सवारी चालकसँग बारम्बार घुस रकम मागेको गुनासे आएपछि टोली पठाइएको उनले बताए ।

कारबाहीमा परेका २ जना प्रहरी ट्राफिक प्रहरी कार्यालय मकवानपुरको रातोमाटे र ट्राफिक प्रहरी कार्यालय रामनगर चितवनमा कार्यरत थिए । उनीहरूलाई प्रहरी नियमावलीअनुसार कानूनी कारबाही गरिने गिरीले जनाएका छन् ।

यसैगरी बागमती प्रदेश प्रहरी कार्यालयले प्रहरीलाई घूस रकम दिन खोज्ने सेवाग्राहीलाई पनि कारबाही गरेको छ । सिन्धुलीका ९ जना र मकवानपुरका १ जनालाई कारबाही गरिएको प्रवक्ता गिरीले जानकारी दिए । सिन्धुली र मकवानपुरमा कार्यरत ७ जना प्रहरीलाई पुरस्कृत पनि गरिएको छ ।

प्रदेश प्रहरी कार्यालयले इमान्दार प्रहरीलाई पुस्कृत गर्ने र गैरव्यावसायिक कार्यमा संलग्न प्रहरीलाई कारबाही गर्न विशेष अभियान सञ्चालन गरिएको गिरीको भनाइ छ । कार्यालयले गत आर्थिक वर्ष २०७६/०७७ मा प्रदेशका २ सय २९ जना प्रहरीलाई कारबाही गरेको छ ।

प्रकाशित मिति: मंगलबार, साउन १३, २०७७ १९:३८