नेकपा केन्द्रीय तहको विवाद मकवानपुर आइपुग्यो, ओली र नेपाल पक्षधरको जुहारी

A+ A A-

सत्तारुढ दल नेपाल कम्युनिस्ट पार्टी (नेकपा)को केन्द्रीय तहको विवाद मकवानपुर पनि आइपुगेको छ ।

प्रधानमन्त्री एवं नेकपा अध्यक्ष केपी शर्मा ओली र उनलाई हटाउने प्रयासमा रहेका अर्का अध्यक्ष पुष्पकमल दाहाल प्रचण्ड, माधव नेपाल, झलनाथ खनालसहितको खेमाबीच बढिरहेको विवाद जिल्ला तहसम्म आइपुगेको हो । नेकपा मकवानपुरमा पनि ओली पक्षधर र दाहाल, नेपाल खेमाका नेता, कार्यकर्ताबीच जुहारी नै चलेको छ ।

पार्टीको केन्द्रीय तहमा नेकपा अध्यक्षद्वय ओली र प्रचण्ड, नेपालबीच शक्ति संघर्ष चलिरहेको समयमा मकवानपुरमा पनि उक्त अवस्था सिर्जना भएको हो । मकवानपुरमा पछिल्लो समय नेकपाको आन्तरिक कार्यक्रममा एउटा पक्षले अर्को पक्षलाई वेवास्ता गर्दै कार्यक्रमहरू सञ्चालन हुन थालेका छन् । ओली पक्षका नेताले नेपाल खेमाका नेतालाई गुटबन्दी गरेर पार्टी गतिविधि सञ्चालन गरिरहेको आरोप सार्वजनिक रूपमै लगाउन थालेका छन् ।

केही समयअगाडि ओलीको पक्षमा हेटौँडामा कार्यकर्ताहरूले नाराबाजी गरेका थिए । त्यसको भोलिपल्ट काउण्टरमा प्रचण्ड र माधवकुमार नेपाल पक्षले हेटौँडा–५ स्थित पार्टी कार्यालयमा ब्यानरसहित प्रदर्शन गरे । त्यहाँबाट सुरु भएको नेकपा मकवानपुरभित्र विवाद बहिष्कारसम्मको अवस्थामा पुगेको हो ।

‘तत्कालीन एमाले हुँदा केपी ओली र माधव नेपाल पक्षबीच विवाद कायमै थियो । अहिले तत्कालीन नेकपा माओवादी पनि मिस्सिएपछि विवाद अझै बढेको हो’, नेकपा मकवानपुरका एक नेताले शिलापत्रसँगको कुराकानीमा भने । हाल तत्कालीन माओवादी पक्षको बहुमत सदस्यहरू माधव नेपाल पक्षमा गएपछि विवाद झन् बढेको उनले बताए ।

सोमबार हेटौँडामा पुष्पलाल मित्रता केन्द्रको केन्द्रीय कमिटीले जिल्ला भेला आयोजना गरेको थियो । भेलामा ओली पक्षका नेताहरूले कार्यक्रमबारे जानकारी नै नदिई गुटबन्दीको रूपमा भेला गरेर जिल्ला कमिटी गठन गरेको आरोप लगाएका छन् ।

सामाजिक सञ्जालमा नेकपा मकवानपुरकी अध्यक्ष मुनु सिग्देल, नेकपा केन्द्रीय सदस्य विरोध खतिवडालगायतलाई ओली पक्षका नेताहरूले गुट भेला गरेको आरोप लगाएका हुन् । नेकपाभित्र पटक/पटक शक्ति संघर्ष चलिरहेको भए पनि सामाजिक सञ्जाल तथा फिल्डमै एकआपसमा अन्तरविरोध भएको भने यो पहिलो पटक हो ।

राक्सिराङ गाउँपालिकाका परेवाभिरमा सडक बनाउने विषयलाई लिएर पनि नेकपाभित्र विवादको अवस्था सिर्जना भएको छ । मुख्यमन्त्री डोरमणि पौडेलले परेवाभीरबाट सडक बन्दैन भन्दै कार्यक्रममा बोलेपछि नेकपा नेताहरू त्यसको विरोधमा उत्रिएका थिए । पौडेलको भनाइलाई नेकपा जिल्ला इन्चार्ज तथा प्रतिनिधिसभा सदस्य खतिवडाले विकासको नाममा राजनीति गर्न नहुने भन्दै आफ्नो नेतृत्वमा उक्त स्थानबाटै बाटो निर्माण गर्ने घोषणा गरेका थिए ।

खतिवडाले परेवाभीरबाट बाटो निर्माण गर्ने प्रतिवद्धता जनाएपछि त्यसको काउण्टरमा ओली पक्षका मकवानपुरका नेता तथा संविधानसभा सदस्य अनन्त पौडेलले चारपटक मकवानपुरबाट निर्वाचित भइसकेको सांसद् खतिवडाप्रति लक्षित गर्दै फेसबुकमा यस्तो लेखेका छन्, ‘आफैँलाई भोट हालेका जनता भीरको अक्करबाट हिँडिरहेको त्यो बाटो बनाउनुपर्ने दिव्य ज्ञान चार पटके माननीय ज्यूलाई भर्खर पो प्राप्त भएछ ।’

यसैगरी, शनिबार हटौँडा–१७, राजदेवीमा बालकुमारी थापाको श्रद्धाञ्जली सभालाई लिएरसमेत नेकपाभित्र विवाद भएको थियो । नेकपा मकवानपुरकी आमा, कम्युनिष्टहरूको सेल्टर दाताको रूपमा परिचित बालकुमारी थापाको १३औँ दिनमा आयोजित श्रद्धाञ्जली सभामा माधव नेपाल र प्रचण्ड खेमाले ओली टिमलाई बेवास्ता गर्दै कार्यक्रम गरेको भन्दै सामाजिक सञ्जालमा टीका-टिप्पणी भइरहेको छ ।

तत्कालीन नेकपा माओवादीका जिल्ला अध्यक्ष तथा हाल नेकपा मकवानपुरका सचिव प्रेमबहादुर पुलामी ‘छिन्तु’ले सञ्चालन गरेको कार्यक्रममा नेकपाका नेता मुकुन्द न्यौपानेको प्रमुख आतिथ्यता थियो । ‘श्रद्धाञ्जलिसभाको प्रमुख अतिथिको रूपमा पोलिटब्यूरो सदस्य काशिनाथ अधिकारी रहने बताइएको थियो । तर, रातारात मुकुन्द न्यौपानेलाई प्रमुख अतिथि बनाइएछि विवाद भएको हो ।’ एक नेताले भने ।

अतिथि आसन ग्रहणमा समेत गुटबन्दी देखिएको उनले टिप्पणी गरे । केन्द्रीय सदस्य रहेका बागमती प्रदेशका मुख्यमन्त्री पौडेललाई अर्का केन्द्रीय सदस्य खतिवडाभन्दा पछि मात्रै आसन ग्रहण गराइएको भन्दै नेकपाभित्र टीका-टिप्पणी भइरहेको छ । कार्यक्रममा ओली पक्षधर मानिने नेताहरूलाई मन्तव्यसमेत राख्न नदिएको सभामा सहभागी नेताहरूले बताएका छन् ।

प्रकाशित मिति: मंगलबार, साउन १३, २०७७ १६:०४