कक्षा ११ को नयाँ पाठ्यक्रम तत्काल लागू

A+ A A-

सरकारले कक्षा ११ को नयाँ पाठ्यक्रम तत्काल लागू गर्दैछ । नयाँ शैक्षिक सत्र अब तत्काल सुुरु हुने भएकाले त्यसका लागि आवश्यक तयारी गर्न विद्यालय तथा शिक्षकहरूलाई आग्रह गरिएको छ ।

विद्यालय शिक्षा परीक्षा (एसईई) को नतिजा आउनसाथ कक्षा ११ को नयाँ शैक्षिक सत्र कार्यान्वयनमा आउनेछ । एसईईको नतिजा अन्तिम अवस्थामा पुुगिसकेको छ ।

विगत तीस वर्षदेखि कक्षा ११ मा धेरै विषयको पाठ्यक्रम परिमार्जन हुन नसकेको अवस्थामा नयाँ पाठ्यक्रम लागू गर्ने सरकारको निर्णयमा पुनः विचार नहुने र ढुक्क भएर यसको तयारी थाल्न पाठ्यक्रम विकास केन्द्रका अधिकारीहरूले आह्वान गरेका छन् ।

केन्द्रका निर्देशक गणेश भट्टराईले सानातिना समस्या भए पनि आफ्नो निर्णयबाट सरकारपछि नहट्ने बताए । राजनीतिक प्रणाली परिवर्तन भए पनि पाठ्यक्रममा परिमार्जन हुन नसकेको उल्लेख गर्दै नयाँ पाठ्यक्रम लागू गर्ने अवसरबाट पछि हट्न नहुने र सरकार यसमा अडिग रहेको उनले बताए ।

कक्षा ११ को नेपाली, अङ्ग्रेजी र सामाजिक तथा जीवन उयोगी शिक्षा गरी ३ वटा अनिवार्य विषयका पुस्तक सरकारले नै उपलब्ध गराउने जानकारी उनले दिए । केन्द्रले हालसम्म ७५ वटा विषयको नयाँ पाठ्यक्रम तयार पारेको जनाएको छ ।

पाठ्यक्रममा भएका कमी कमजोरीलाई बर्सेनि परिमार्जन गर्न सकिने उल्लेख गर्दै उनले शिक्षकको तालिम, अभिमुखीकरण लगायतमा सरकारले विशेष ध्यान दिने विश्वास व्यक्त गरे ।

हाल विद्यालय तहमा कार्यरत शिक्षकबाटै कक्षा ११ को नयाँ पाठ्यक्रम लागू गर्न सकिने उनले विश्वास व्यक्त गरे ।

विद्यालयका प्रधानाध्यापक तथा सरोकारवालाले भने नयाँ पाठ्यक्रम लागू गर्न तयारी सुरु गरेको उल्लेख गर्दै यसको कार्यान्वयनका लागि सरकारबाट विशेष सहयोग हुनुपर्ने अवस्था रहेको जनाएका छन् ।

सामुदायिक विद्यालय व्यवस्थापन समिति महासङ्घ नेपालका अध्यक्ष कृष्ण थापाले नयाँ पाठ्यक्रम लागू गर्न ढिला भइसकेको उल्लेख गर्दै राजनीतिक व्यवस्थाको जग बसाल्न पनि नयाँ पाठ्यक्रम लागू गरिनुपर्ने विचार व्यक्त गरे ।

राजनीतिक प्रणाली परिवर्तन भए पनि त्यसबारे विद्यार्थीलाई जानकारी दिन नसकिएको अवस्थामा नयाँ पाठ्यक्रम लागू गरिने कुरामा विलम्ब हुन नहुने उनको भनाइ छ ।

विश्व निकेतन माध्यमिक विद्यालयका प्रधानाध्यापक हेरम्ब कँडेलले धेरै ठूलो धनराशि खर्च गरेर नयाँ पाठ्यक्रम निर्माण गरिएकाले यसको कार्यान्वयन यसै वर्षबाट गरिनुपर्नेमा जोड दिए ।

प्रकाशित मिति: मंगलबार, साउन १३, २०७७ ०६:५६