डा. केसी जुम्ला पुगेर दिए अनशन बस्ने चेतावनी

A+ A A-

हाडजोर्नीका बिरामीको निःशुल्क उपचार गर्न जुम्ला पुगेका डा. गोविन्द केसीले कर्णाली स्वास्थ्य विज्ञान प्रतिष्ठान जुम्लामा एमबीबीएस तहकाे कक्षा संचालन गर्न माग गरेका छन् ।

प्रतिष्ठानको सातौँ सिनेटले प्रस्तावित शैक्षिक कार्यक्रमहरू स्नातकोत्तर तहको एमबीबीएस, एमडीजीपी, एमडीतर्फ अर्थोपेडिक, एनेस्थेसियोलोजी, पेडियट्रिस, गाइनोकोलोजी तथा अब्स्टेट्रिक्स, एमएससी इपिडिमियोलोजी, स्नातक तहको न्युट्रिसियन, फार्मेसी तहको अध्ययन गराउने निर्णय कार्यान्वयन गर्न माग गरेका हुन् ।

गत १४ पुस २०७६ मा कर्णाली स्वास्थ्य विज्ञान प्रतिष्ठानका कुलपति तथा प्रधानमन्त्री केपी शर्मा ओलीको अध्यक्षतामा बालुवाटारमा बसेको शैक्षिक कार्यक्रमका कक्षा संचालनका लागि सहमति प्रदान गर्ने निर्णय गरेको त्यसको कार्यान्वयन हुनुपर्ने डा.केसीको माग छ । ‘तत्काल पूर्वाधार र जनशक्ति पुर्‍याएर एमबीबीएस सञ्चालन गर्नुपर्छ,’ उनले भने, ‘यदी यी कक्षा जुम्लामा संचालन भएन भने आन्दोलन जरुरी भएको छ ।’

डा. केसीले गेटा मेडिकल, राप्ति स्वास्थ्य विज्ञान प्रतिष्ठानमा तत्काल पूर्वाधार र जनशक्ति व्यवस्था गरेर पठनपाठन सुरु गरिनुपर्ने बताए । ‘सरकारले २०७५ साल साउन १० गते भएको सम्झौताअनुसार चिकित्सा शिक्षा ऐनमा संशोधन गरिनुपर्ने, शिक्षा नियमावली सच्याउँदै स्नातकोत्तर तहमा खुलातर्फ ७० प्रतिशत सिट कायम गर्नुपर्छ,’ उनले भने । आफ्ना माग पूरा नभए अनशन बस्ने चेतावनी डा. केसीले दिए ।

कर्णाली प्रदेश सरकारले चालू आर्थिक वर्षको नीति तथा कार्यक्रममा प्रदेश सरकारले कर्णाली स्वास्थ्य विज्ञान प्रतिष्ठानमा स्नातकोत्तर तहको शैक्षिक कार्यक्रम संचालन गर्ने जनाएको छ ।