कोल्ड स्टोर निर्माणमा अनियमितता : २२ लाखको काम, ७२ लाख भुक्तानी

A+ A A-

सरकारी अनुदानबाट निर्माण हुन लागेको रुपन्देहीको एक चिस्यान केन्द्र निर्माणमा अनियमितता भएको पाइएको छ ।

प्रदेश ५ सरकारको भूमि व्यवस्था कृषि तथा सहकारी मन्त्रालयले क्रमागत अनुदानका लागि प्रदान गरेको चिस्यान केन्द्र निर्माणमा अनियमितता भएको पाइएको हो ।

रुपन्देहीको सम्मरीमाई गाउँपालिकामा निर्माण भइरहेको चिस्यान केन्द्र निर्माणमा काम गरेको भन्दा तेब्बर बढी रकम भुक्तानी भएको छ ।

भूमि व्यवस्था कृषि तथा सहकारी मन्त्रालयले प्रदेशका विभिन्न ८ जिल्लामा १६ वटा चिस्यान केन्द्र निर्माणको अवस्थामा छन् । जसमध्ये रुपन्देहीको सम्मरीमाई गाउँपालिकामा सहकारीले बनाउँदै गरेको चिस्यान केन्द्रमा काम गरेको भन्दा तेब्बर बढी भुक्तानी भएको हो ।

सम्झौता भएको भवानी स्वावलम्बन बहुउद्देश्यीय सहकारीले २२ लाखको काम गरेर मन्त्रालयबाट ७१ लाख ९७ हजार रुपैयाँ भुक्तानी पाएको छ ।

प्रदेश सरकारका इञ्जिनियरले अनुगमन गर्दा २२ लाखको मात्र काम भएको रिपोर्ट मन्त्रालयमा पेस गरेका थिए । चिस्यान केन्द्रको जग, बीमा र पिल्लर ढलान हुँदासम्म प्राविधिकहरूले २२ लाख रूपैयाँको अनुमानित लागत निकालेका थिए ।

गत वर्ष जेठमा रुपन्देहीको सम्मरीमाई गाउँपालिकामा नौवटा सहकारीलाई चिस्यान केन्द्र निर्माणका लागि प्रदेश सरकारले अनुदान दिने निर्णय गरेको थियो ।

सोहीअनुसार मन्त्रालयकै पहलमा सवै सहकारीको साझेदारी हुने गरी भवानी स्वावलम्बन बहुउद्देस्यीय सहकारीमार्फत रकम भुक्तानी हुने गरी सम्झौता गरी काम अगाडि बढाइएको थियो ।

भवानीबाहेक अन्य सबै बचत तथा ऋणको कारोबार गर्ने भएकाले उनीहरूलाई साझेदार मात्र बनाइएको थियो ।

प्रदेश सरकारले परामर्शदाताको रूपमा नियुक्त गरेका इञ्जिनियर सुगम कोइरालाले चिस्यान केन्द्र निर्माणको ठेक्का पाएका छन् । परामर्श दाताको रूपमा मन्त्रालयमा रहेका कोइराला र सहकारीका व्यवस्थापक अशोक तिवारीको संलग्नतामा बढी मूल्य भुक्तानी भएको मन्त्रालयले पनि स्वीकार गरेको छ ।

कृषि मन्त्रालयका करार कर्मचारी तथा परामर्शदाता कोइरालालाई अहिले सरकारले कारबाहीसमेत गरेको बताएको छ । मन्त्रालयका प्रवक्ता विनोद घिमिरेले अनुदानको रकम भुक्तानीमा गल्ती भएको स्वीकार गर्दै कोइरालालाई कारबाही गरिएको बताए ।

‘परामर्शदाता कोइरालाले आफैँ चिस्यान केन्द्र निर्माणको ठेक्का लिएर बढी रकम लिइसकेको प्रमाणित भएपछि हामीले कारबाहीस्वरुप उहाँलाई हटाएका छौँ,’ उनले भने । कोइरालालाई प्रदेश सरकारले एक वर्षअघि करारमा नियुक्त गरेको थियो ।

चिस्यान केन्द्र निर्माण समितिका अध्यक्ष ओमप्रकाश गुप्ताले सहकारीले आफैँ समिति बनाएर चिस्यान केन्द्रको पैसा बुझेको बताए ।

उनले भवानी स्वावलम्बन सहकारीले खाता चलाउने सहमति भएको भए पनि भवानीले आफ्नै नेतृत्वको उपभोक्ता समिति बनाएको र आफूले मन्त्रालयमा आउँदा मात्र भुक्तानी भएको थाहा पाएको बताए ।

हाल मन्त्रालयले बढी रकम लगेको सहकारीलाई रकम फिर्ताका लागि पत्रचार समेत गरेको बताएको छ । प्रवक्ता घिमिरेले कामभन्दा बढी भुक्तानी गरेर लगेको रकम फिर्ता गर्न सहकारी र उपभोक्ता समितिलाई पत्रचार गरिएको जानकारी दिए ।

स्थानीय राजाराम तिवारीको ३ कट्ठा २ धुर जग्गा २० वर्षका लागि लिजमा लिएर सो चिस्यान केन्द्र निर्माण गर्न थालिएको हो । ५ करोड ४३ लाख रूपैयाँको स्टिमेटअनुसार १ करोड ३५ लाख (२५ प्रतिशत) र बाँकी ७५ प्रतिशत प्रदेश सरकारले अनुदानमा निर्माण हुन लागेको छ ।

यता भवानी स्वावलम्बन बहुउद्देश्यीय सहकारीका व्यवस्थापक अशोक तिवारीले अहिलेसम्म निर्माणको काम कोटेसनमा उल्लेख भए अनुसार नै भएको बताएका छन् ।

योसँगै कपिलवस्तुका विभिन्न स्थानमा ४, रूपन्देहीमा ३, बर्दियामा २, रोल्पामा २, अर्घाखाँची, गुल्मी र पश्चिम नवलपरासीमा १÷१ वटा कोल्ड स्टोर बनाउने योजनामा उल्लेख छ ।

प्रकाशित मिति: सोमबार, साउन १२, २०७७ ११:०७