रूपन्देहीमा घुम्ती कक्षा सञ्चालन

A+ A A-

कोरोना त्रासका कारण अझै पनि विद्यालयमा पठनपाठन सुरु हुन सकेको छैन । सरकारले १ भदौबाट मात्र भर्ना अभियान सुरु गर्ने बताएको छ । अधिकांश विद्यालय अहिले पनि क्वारेन्टाइन बनेका छन् ।

संक्रमितको संख्या घट्दै गएपछि क्वारेन्टाइन पनि खाली हुँदै गएका छन् । कोरोनाका कारण लामो समयसम्म पठनपाठन नै ठप्प भएपछि रूपन्देहीका कतिपय विद्यालयले घुम्ती कक्षा नै सुरु गरेका छन् ।

सरकारले गत १८ जेठमा वैकल्पिक प्रणालीबाट विद्यार्थीको सिकाइ सहजीकरण निर्देशिका २०७७ जारी गरी १ असारदेखि केही स्थानीय तहले घुम्ती कक्षा सञ्चालन गरेका हुन् ।

रूपन्देहीको तिलोत्तमा नगरपालिका-२ स्थित दुर्गादत्त माविले घुम्ती कक्षा चलाएर विद्यार्थीलाई अध्यापन गराउँदै आएको छ ।

विद्यालयका ३० भन्दा बढी शिक्षक पालैपालो विभिन्न टोलमा पुगेर विद्यार्थीलाई अध्यापन गराउँदै आएका छन् ।

कक्षा १ देखि १० सम्म अध्ययनरत करिब साढे ८ सय विद्यार्थीलाई बुद्धविहार, क्लबकाभवन, मन्दिर, चौतारी, खुल्लाचौर, व्यक्तिका घरका आँगन लगायतका स्थानमा सामाजिक दूरी कायम गरी अध्याउप गराइरहेका विद्यालयका प्राचार्य चण्डीप्रसाद पाण्डेयले जानकारी दिए ।

अनलाईन कक्षा सञ्चालन गर्दा सबै विद्यार्थीसामु इन्टरनेट, मोबाइल, कम्प्युटर तथा ल्यापटपको उपलब्धता नहुने भएकाले टोलटोलमा पुगेर पढाइरहेका उनले बताए ।

उनले वैकल्पिक प्रणालीबाट विद्यार्थीको सिकाइ सहजीकरण निर्देशिका २०७७ ले निर्देशित गरेअनुसार ८ देखि १० जनाको समूह रहने गरी भौतिक दूरी कायम गरेर घुम्ती कक्षा सञ्चालन गरिएको बताए ।

लामो समयसम्म घरमै रहेका विद्यार्थी पार्टीपौवा, चौतारामा अध्ययन गर्न पाउँदा खुसी देखिएका छन् । ‘स्कुलमा भन्दा बाहिरी वातावरणमा पढ्दा अर्कै आनन्द हुँदो रहेछ,’ शंकरनगर दुर्गादत्त माध्यमिक विद्यालय कक्षा ९ की विद्यार्थी अनुश्का ढकालले भनिन् ।

त्यस्तै, सैनामैना नगरपालिकाले पनि लकडाउनको समयमा शिक्षण सिकाई प्रभावकारी बनाउने परियोजना कार्य सञ्चालन गरेको छ । अनलाइन कक्षाभन्दा यो परियोजना कार्य प्रभावकारी भएको सैनामैना नगरपालिकाका नगरप्रमुख चित्रबहादुर कार्कीले बताए ।

परियोजना कार्य अन्तर्गत शिक्षकले पाठ्यसामग्री सम्बन्धी प्रश्नपत्र तयार गर्ने र १५ दिनको गृहकार्य विद्यार्थीलाई दिइने गरिन्छ ।

सबै विषयको गृहकार्य एउटै प्रश्नपत्रमा तयार गरी गृहकार्य दिइने र उक्त गृहकार्य विद्यार्थीले घरमै बसेर १५ दिनपछि विद्यालयमा बुझाउने गरी व्यवस्था मिलाइएको छ । यसले विद्यार्थीलाई कक्षा कोठामा बसेर पढे जस्तै हुने र सबै विद्यालयलाई एकै पटक परिचालन गर्न सकिएको उनले बताए । हाल यो परियोजना निजी तथा सामुदायिक सबै विद्यालयले गरिरहेको उनको भनाई छ ।

यस्तै, गैडहवा गाँउपालिकाले पनि घुम्ती कक्षा सुरु गरेको छ । २२ वटा सामुदायिक विद्यालय ११ वटा मदरसा तथा १२ वटा निजी विद्यालयमा कक्षा १ देखि कक्षा १० सम्मका विद्यार्थीलाई घरघरमा गई घुम्ती पढाई सुरु गरिएको गाँउपालिकाका अध्यक्ष बच्चुलाल केवटले जानकारी दिए ।

मायादेवी गाउँपालिकाले पनि घरदैलोमा पुगेर पठनपाठन गराउन सुरु गरेको छ । कोभिड-१९ का कारण बालबालिकाको पठनपाठनमा पुगेको क्षतिलाई कम गर्नका लागि गाउँपालिकाको पहलमा सिकाई सहजीकरण गरिएको गाउँपालिकाले जनाएको छ ।

गाउँपालिकाका प्रमुख धु्रवनारायण चौधरीले बैकल्पिक सिकाई सहजीकरणले विद्यार्थी धेरै खुसी भएको बताए । उनले गाउँपालिकाका ६ वटा विद्यालयले अहिले घुम्ती कक्षा सञ्चालन गरिसेकेको बताए ।

प्रकाशित मिति: शनिबार, साउन १०, २०७७ ११:२२