गिरिजाबाबुको स्कर्टिङको त्यो दुर्घटना

A+ A A-

केही समयअघि एउटा भनाइ चर्चामा थियो, ‘जहाँ जाम, त्यहाँ सीताराम' अर्थात् प्रहरी निरीक्षक सीताराम हाछेथु ।’

२ वर्षदेखि भने सीतारामको दैनिकी फेरिएको छ । उनी विभिन्न स्कुलहरूमा ट्राफिक कक्षा दिन जान्छन् । सेमिनारहरूमा सहभागी हुन्छन् । नीलो ड्रेसमा सेतो क्याप लगाउन छाडेर टाई सुटमा ठाँटिएका देखिन्छन् ।

२ वर्ष पहिला जस्तो उनी सिटी फुक्दै सडकको जाम हटाउन निस्किँदैनन् । त्यसैले कहिलेकाहीँ कोटेश्वर, थापाथलीको अव्यवस्थित जामले सीतारामलाई मिस’ गरिरहेको हुन्छ ।

सीतारामलाई सडकमा सिटी फुक्दै ट्राफिक व्यवस्थापनमा यसअघि खटिएर काम गरेको देख्नेहरूले उनको नाम लिन्छन्, यस्तो जाम हटाउन त सीताराम नै ठीक थिए ।’

तर, सीतारामले प्रहरी नियमावलीमा भएको ३० वर्षे सेवा अवधिपछि अनिवार्य अवकासका कारण ६ मंसिर २०७५ मा अवकाश पाएका हुन् । यसबीचमा सीतारामले पनि आफूले गरेको काम 'मिस’ गरेको बताउँछन् ।

उनी भन्छन्, म प्रहरी सेवामा रहेसम्म उपत्यकाको ट्राफिक व्यवस्थापनमा मात्र खटिएँ । यति लामो समय ट्राफिक व्यवस्थापनमा खटिएर काम गर्ने म मात्र हुँ । अवकास प्राप्त जीवनपछि पनि आफूले गरेको कामको सम्झना आउँदो नै रहेछ ।’

त्यसैले अहिले पनि सीतारामलाई ट्राफिक महाशाखाले ट्राफिक व्यवस्थापनको सदस्यमा राखेको छ । ट्राफिक बढी जाम हुने स्थानहरूमा कसरी जाम कम गर्न सकिन्छ भनेर उक्त समितिले काम गर्ने गरेको छ ।

सीतारामले प्रहरी सेवाको पूरै करियर ट्राफिक व्यवस्थापनमा मात्र देखेका कारण उनको अहिलेसमेत चर्चा हुने गरेको हो ।
उनले २९ वर्ष ट्राफिक प्रहरीमा मात्र कार्यरत रहेर काम गरेका थिए ।

नेपाल प्रहरीमा यसरी लामो समय एउटै फिल्डमा रहेर काम गर्ने एक मात्र प्रहरी निरीक्षक आफू भएको उनको दाबी छ ।

सीतारामले २०४६ सालबाट नेपाल प्रहरीको सहायक निरीक्षक (असई)बाट सेवा सुरु गरेका थिए । त्यसको एक वर्षपछि २०४७ सालदेखि २०७५ सालसम्म ट्राफिक प्रहरीकै रूपमा कार्यरत रहे ।

उसो त प्रहरी सेवामा रहँदा हाछेथुले ट्राफिक जामको व्यवस्थापन मात्र गरेर आफू बसेका सबै ठाउँका ट्राफिक कार्यालयहरूको भवनसमेत स्थानीयलाई आग्रह गरेर निःशुल्क निर्माण गरे ।

ललितपुर महानगरीय ट्राफिक भवन सातदोबाटो र कोटेश्वरको भवनसमेत उनैले निर्माण गरेका नमुना भवन हुन् ।

उपत्यकाका कुनै पनि कार्यक्रममा नेपाल प्रहरीका पूर्वप्रमुख आईजीपीहरू बोल्दा सीतारामको नाम लिएर अरू प्रहरी कर्मचारीलाई अनुशासनको पाठ सिकाउँथे ।

दुर्घटनामा जेजे देखे

प्रहरी सेवाको २९ वर्ष ट्राफिक सेवामा बिताएका हाछेथुले सडक दुर्घटनाका हजारौैँ हृदय विदारक दृश्य देखेका छन् । कतिपय भीआईपीहरूको सडक दुर्घटनाका साक्षी हाछुथु बनेका छन् ।

तीमध्ये कति भुले । कयौँ घटना हाछेथुको स्मृतिमा ताजै छन् । हाछेथु भन्छन्, ‘२९ वर्ष सडकमा सवारी साधनसँगै बिताउँदा कति दुर्घटना देखे हुँला ? तपाईं आफैँ अनुमान गर्न सक्नुहुन्छ । यसमध्ये कति भूलिसकेँ, केही अझै मेरा स्मृतिमा झल्झली आई नै रहन्छन् ।’

यसरी अझै झल्झली आउने दुर्घटनाहरूमा पूर्वयुवराज पारस शाहको दुर्घटना पनि एक हो । सीताराम ट्राफिक प्रहरी कार्यालय गौशालाको प्रमुख हुँदा २०६२ सालमा पारसले चलाएको कार गोपीकृष्ण हल अगाडि दुर्घटनामा परेको थियो ।

‘ठ्याक्कै मिति याद भएन, पूर्वराजा ज्ञानेन्द्र शाहले राजनीतिक दलहरूको अधिकार कटौती गर्दै सत्ता आफ्नो हातमा लिएको समय थियो । म गौशाला ट्राफिक प्रहरी प्रमुख थिएँ । राती ११ बजे युवराजधिराज दुर्घटनामा परेको सूचना आयो’, उनी थप्छन्, ‘हामी दुर्घटनास्थल गोपीकृष्ण हल अगाडि पुग्दा कालो कार बीच सडकको डिभाइडरमा ठोकिएर पल्टिएको थियो । नेपाली सेनाले चारैतिर घेरा हालेका थिए । कसैलाई पनि त्यो बाटो जाने अनुमति थिएन । त्यो दुर्घटनाको दृश्य भीआईपीको थियो ।’

त्यसबाहेक कलङ्की रविभवन अगाडि सार्वजनिक बस पल्टिँदा कुनै मान्छेको टाउको भित्र, खुट्टा बाहिर हुनेगरी च्यापिएको थियो । उनीहरूलाई बडो संवेदनशील अवस्थाबाट जोगाएर अस्पताल पुर्‍याएको उनी सम्झिन्छन् ।

पछि अस्पतालबाट बाँचेर आउनेहरूले डाक्टरलाई भन्दा आफूलाई धन्यावाद दिन अफिसमा पुगेको उनी सुनाउँछन् । आफूले सक्रिय भएर नलागेको भए उनीहरूको ज्यान बाँच्ने सम्भावना नरहेको उनको भनाइ छ ।

यस्तै अन्य धेरै घटनाको आफू साक्षी रहेको हाछेथु बताउँछन् ।

बिर्सनै नसक्ने आफ्नै दुर्घटना

कयौँ दुर्घटनाका साक्षी हाछेथु आफैँ पनि दुर्घटनाबाट बालबाल बाँचेका थिए । पूर्वप्रधानमन्त्री गिरिजाप्रसाद कोइराला कीर्तिपुरको एउटा कार्यक्रमबाट बालुवाटार फर्किंदै थिए । प्रधानमन्त्रीको गाडी स्कर्टिङका लागि अगाडि हाछेथु थिए ।

उनी त्यसबेला प्रहरी नायव निरीक्षक (सई)का रूपमा कालीमाटी ट्राफिक प्रहरी प्रमुख थिए । कीर्तिपुरबाट प्रधानमन्त्री कोइराला रिङरोडको बाटो हुँदै बालुवाटार फर्किंदै थिए । बल्खु, कलङ्की हुँदै सीतापाइला पुग्दा हाछेथु दुर्घटनामा परे । भीआईपीको स्कर्टिङमा प्रयोग गर्ने सेतो मोटरसाइकलमा सवार थिए उनी ।

म प्रधानमन्त्री कोइरालाको स्कर्टिङको अगाडि थिएँ । सीतापाइला पुग्दा मेरो अगाडिबाट गाईले सडक पार गर्न खोज्यो । इमेन्र्जेसी ब्रेक लगाएँ तर मोरसाइकल पल्टियो । म सडकमै बजारिएँ । धन्न ! पछाडिको कारले मलाई जोगायो ।’

प्रधानमन्त्रीको स्कर्टिङमै रहेको सुरक्षाकर्मीको अर्को कारको गति तीव्र हुँदा पनि आफू भाग्यवस बाँचेको उनी बताउँछन् ।

दुर्घटनामा आफूलाई सामान्य चोट मात्र लागेकाले केही समय आराम गरेर निको भएको उनको भनाइ छ ।

म सामान्य चोटले बिदामा घरमै बसेको थिएँ । पछि प्रधानन्त्रीज्यूले मेरो अवस्था बुझ्न आफैँ गाडी चालक र स्वकीय सचिव पठाउनुभएको थियो । मैले ठीक छु भन्ने सन्देश पठाएँ’, हाछेथु भन्छन् ।

सडकमा खटिएर हजारौँ दुर्घटना देखेका हाछेथु आफैँ प्रधानमन्त्रीकै स्कर्टिङमा गएका बेला दुर्घटनामा परे । त्यो दुर्घटनामा कसरी बाँचेँ ? भनेर अहिले पनि जिउ सिरिङग हुन्छ हाछेथुको ।

प्रकाशित मिति: शनिबार, साउन १०, २०७७ ०९:५३