लकडाउन खुलेसँगै तरकारीको भाउ किन आकाशियो ?

A+ A A-

सरकारले कोरोना भाइरस रोकथाम तथा नियन्त्रणका लागि गरेको लकडाउन यो सातादेखि खुलाएको छ । सामान्य समयभन्दा सस्तोमा बिक्री भएको तरकारी लडकाउन हटेसँगै दोब्बर वृद्धि भएको छ ।

पछिल्लो २ सातादेखि बजारमा तरकारी भाउ दोब्बर वृद्धि हुँदा सेवाग्राही मारमा परेका छन् । देशभर अविरल वर्षाका कारण राजधानीमा तरकारीको मूल्य एक्कासि बढेको कालीमाटी फलफूल तथा तरकारी बजार विकास समितिले जानकारी दिएको छ ।

लकडाउनमा तरकारीकाे भाउ अन्य समयकाे भन्दा सस्तोमा बिक्री भएको थियो । दुई सातायता देशभर निरन्तर वर्षा भएका कारण बजारमा अधिकांश हरियो तरकारीको मूल्य दोब्बरले बढेको समितिले जनाएको छ ।

लकडाउन हटेसँगै काठमाडौंमा सर्वसाधारण फर्किने क्रम बढेको छ । लगातार वर्षा हुँदा राजधानी भित्रिने मुख्य राजमार्ग अवरोध हुँदा पनि तरकारीकाे मूल्यवृद्धि भएको समितिका सूचना अधिकारी विनय श्रेष्ठले बताए । लकडाउनको बेला सस्तिएको तरकारीको मूल्य उपत्यका तथा अन्य स्थानमा केही दिनदेखि परेको वर्षा नै मुख्य कारण भएको उनकाे बुझाइ छ ।

‘२ सातादेखि उपत्यकाका बाहिरी जिल्लामा बाढीपहिरोको प्रकोप बढेकाले यहाँ तरकारीको आयात नै कम हुँदा मूल्य बढेको हो । तर, दोब्बर मूल्यमा चाहिँ बिक्री भएको छैन । केही प्रतिशत मात्र वृद्धि भएको छ,’ उनले भने, ‘कालीमाटी फलफूल तथा तरकारी बजारमा तरकारीको मूल्यमा दोब्बरले वृद्धि भएको छैन । सामान्य समयभन्दा केही मात्रामा मूल्य बढेको हो । दोब्बरमा बिक्री भइरहेको भन्ने हल्ला सुनेको हो । यो विषयमा सम्बन्धित निकायले अनुगमन गर्नुपर्छ ।’

तरकारीको उत्पादनको सिजन नभएको र खेतबारीमा भएको तरकारी पनि बाढीका कारण बजारमा आउन नपाउँदा मूल्यमा सामान्य वृद्धि भने भएको उनको भनाइ छ ।

दोब्बरले वृद्धि

काठमाडाैंकाे कालीमाटी बजारमा हाल काभ्रे, मकवानपुर, धादिङ, चितवन, भक्तपुर, ललिपुरलगायत अन्य ठाउँबाट तरकारी आउने गरेको छ । लकडाउनका बेला यी जिल्लाबाट आएको तरकारी बजारमा बिक्री नहुँदा कम मूल्यमा बिक्री भएको थियो । लकडाउन भएका बेला यी जिल्लाबाट भित्रिएको तरकारीले ८० प्रतिशत बजार धानेको थियाे ।

कालीमाटी फलफूल तथा तरकारी बजार विकास समितिले तोकेको मूल्यमा चाहिँ बजारमा तरकारी नपाइएकाे र अभाव नै भएकाे पाइएकाे राष्ट्रिय उपभोक्ता मञ्चका अध्यक्ष प्रेमलाल महर्जनले बताए । उनले बजारमा दोब्बर मूल्यमा चाहिँ जति पनि तरकारी पाइने गरकाे बताए ।

हरियो तरकारीबाहेक स्वदेशी उत्पादनले लकडाउन अवधिभर त बजारमा तरकारी अभाव भएन । हाल तरकारी भित्रिने क्रम बढेपछि बजारमा तरकारी अभाव देखाएर मूल्य बढाउने चलखेल भइरहेको मञ्चका अध्यक्ष महर्जनले बताए ।

‘यो साता मुलुकभर आएको बाढीपहिरोका कारण तरकारी तथा फलफूल आयात कम भएको होला । तर, दोब्बर मूल्यमा चाहिँ बजारमा कसरी पाइरहेको छ ?,’ उनले भने, ‘बजारमा होलसेल मूल्यको तुलनामा खुद्रा मूल्य दोब्बर कायम भएको छ । बजारमा तरकारीको मूल्य दोब्बरले वृद्धि हुँदा उपभोक्ताको भान्सा महँगो हुन थालेको छ । कोरोनाको मारमा पिल्सिएका उपभोक्ता चर्को मूल्यकाे तरकारी किनेर खान बाध्य छन् ।’

कालीमाटी बजारमा सामान्य अवस्थामा दैनिक ७ सयदेखि ९ सय टन तरकारी उपत्यकाबाहिरबाट भित्रिने गरेको समिति बताउँछ । लकडाउनदेखि यता त्यसकाे आधा परिमाणमा मात्र भित्रिने गरेको समितिकाे भनाइ छ । समितिका अनुसार लकडाउन हटेपछि हाल २ सयदेखि ३ सय टन तरकारी मात्रै भित्रिने गरेको छ ।

समितिले तोकेको र बजारमा बिक्री भइरहेको मूल्यमा फरक

गोलभेँडा सानो २० रुपैयाँ प्रतिकेजी (हाल बजारमा ७० रुपैयाँ प्रतिकेजीमा बिक्री)
गोलभेँडा सानो (टनेल) २२ रुपैयाँ प्रतिकेजी (बजारमा प्रतिकेजी ६० रुपँयाँमा बिक्री)
आलु रातो ६९ रुपैयाँ प्रतिकेजी (बजारमा ११० रुपैयाँ प्रतिकेजीमा बिक्री)
आलु रातो (मुडे) ५९ रुपैयाँ केजी (बजारमा १२० रुपैयाँ प्रतिकेजीमा बिक्री)
प्याज सुकेको भारतीय ३४ रुपैयाँ प्रतिकेजी (बजारमा ८० रुपैयाँ प्रतिकेजीमा बिक्री)
गाजर(लोकल) ६२ रुपैयाँ प्रतिकेजी (बजारमा ९० रुपैयाँ प्रतिकेजीमा बिक्री)
बन्दा (लोकल) ३८ रुपैयाँ प्रतिकेजी (बजारमा ७० रुपैयाँ प्रतिकेजीमा बिक्री)
काउली स्थानीय ११५ रुपैयाँ प्रतिकेजी (बजारमा १८० रुपैयाँ प्रतिकेजीमा बिक्री)
सेतो मूला (हाइब्रिड), मूला सेतो (लोकल) ६५ रुपैयाँ प्रतिकेजी (बजारमा ९० रुपैयाँ प्रतिकेजीमा बिक्री)
भन्टा लाम्चो ६२ रुपैयाँ प्रतिकेजी (बजारमा ८५ रुपैयाँ प्रतिकेजीमा बिक्री)
बोडी (टनेल) ६८ रुपैयाँ प्रतिकेजी (बजारमा ८० रुपैयाँ प्रतिकेजीमा बिक्री)
घिउसिमी (लोकल), घिउसिमी (हाइब्रlड) ८५ रुपैयाँ प्रतिकेजी (बजारमा १४० रुपैयाँ प्रतिकेजीमा बिक्री)
तीते करेला ३३ रुपैयाँ प्रतिकेजी ( बजारमा ७० रुपैयाँ प्रतिकेजीमा बिक्री)
हरियो धनियाँ २५५ रुपैयाँ प्रतिकेजी (बजारमा ४ सय रुपैयाँ प्रतिकेजीमा बिक्री)
हरियो फर्सी (डल्लो), फर्सी पाकेको ५५ रुपैयाँ प्रतिकेजी (बजारमा ९० रुपैयाँ प्रतिकेजीमा बिक्री)
पालुंगोकाे साग, चमसुरको साग र रायोकाे साग ७५ रुपैयाँ प्रतिकेजी (बजारमा १ सय १० रुपैयाँ प्रतिकेजीमा बिक्री)
परबर (लोकल) १०५ रुपैयाँ प्रतिकेजी (बजारमा २ सय रुपैयाँमा बिक्री)
घिरौँला ५५ रुपैयाँ प्रतिकेजी (बजारमा ९० रुपैयाँ प्रतिकेजीमा बिक्री)
स्कुस ६५ रुपैयाँ प्रतिकेजी (बजारमा ९० रुपैयाँ प्रतिकेजीमा बिक्री)
कुरिलो २४५ रुपैयाँ प्रतिकेजी (बजारमा ३५० रुपैयाँ प्रतिकेजीमा बिक्री)
न्युरो ११५ रुपैयाँ प्रतिकेजी (बजारमा २ सय रुपैयाँ प्रतिकेजीमा बिक्री)
काँक्रो (लोकल) र काँक्रो (हाइब्रिड) ५५ रुपैयाँ प्रतिकेजी (बजारमा ९० रुपैयाँ प्रतिकेजीमा बिक्री)
खुर्सानी हरियो (बुलेट), खु्र्सानी हरियो ६५ रुपैयाँ प्रतिकेजी (बजारमा ९० रुपैयाँ प्रतिकेजीमा बिक्री)
खुर्सानी हरियो (माछे) ९५ रुपैयाँ प्रतिकेजी (बजारमा १५० रुपैयाँ प्रतिकेजीमा बिक्री)
खुर्सानी हरियो (अकबरे) १९५ रुपैयाँ प्रतिकेजी (बजारमा २ सय ९० रुपैयाँ प्रतिकेजीमा बिक्री)
स्रोत : समिति र व्यापारी

कालीमाटी फलफूल तथा तरकारी बजार विकास समितिले ताेकेकाे भन्दा बजारमा दोब्बर मूल्यमा तरकारी व्यापारीले उपभोक्तालाई बिक्री गरिरहेका छन् । बजारमा केही व्यवसायीले तरकारीमा कृत्रिम अभावसमेत देखाएर मनपरी मूल्य लिई ठगिरहेको उपभोक्ताहरूकाे गुनासाे छ ।

बजारमा अस्वाभाविक रूपमा तरकारीको मूल्य बढे पनि बजार अनुगमन गर्ने जिम्मेवार निकाय वाणिज्य तथा आपूर्ति व्यवस्था विभाग भने मौन छ । अनुगमन नगर्दा व्यवसायीले मनपरी मूल्यमा तरकारी बिक्री गरेर ठगिरहेको उपभोक्ताकाे आरोप छ ।

तरकारी व्यापारीले भने होलसेलमा नै महँगो भएर आएकाले खुद्रा मूल्य पनि बढाएर बेच्नुपर्ने बाध्यता भएको बताउँछन् । बजारमा तरकारी प्रशस्त भए पनि केही व्यापारीले तरकारी अभाव भएको देखाएर मूल्य बढाउँदा खुद्रा बिक्री गर्नेलाई समस्या भएको उनीहरूको भनाइ छ ।

प्रकाशित मिति: शुक्रबार, साउन ९, २०७७ १६:४२