गौतम बुद्ध अन्तर्राष्ट्रिय विमानस्थलको निर्माण कार्यले गति लियो

A+ A A-

भैरहवामा निर्माणाधीन गौतम बुद्ध अन्तर्राष्ट्रिय विमानस्थल निर्माणको कामले फेरि गति लिएको छ ।

लकडाउनमा सीमित कर्मचारीबाट काम भएकोमा लकडाउन हटाएसँगै कर्मचारी थप गरेर विमानस्थलको निर्माण कार्यलाई तीव्रता दिइएको हो ।

गौतम बुद्ध अन्तर्राष्ट्रिय विमानस्थलका आयोजना प्रमुख प्रवेश अधिकारीले विमानस्थलमा अहिले ३ सय जनाले धमाधम काम गरिरहेको बताए । तर, लकडाउनअघि नयाँ वर्ष २०२० मनाउन चीन पुगेका दक्ष कामदार कोरोनाका कारण काममा फर्कन नसक्दा केही उपकण जडान भने हुन नसकेको उनले बताए ।

‘निर्माणको काम गर्ने चिनियाँ दक्ष जनशक्ति प्रायः उतैका छन् । ८ बढी एयर कन्डिसनसँग सम्बन्धित चिनियाँ कामदार लकडाउनले चीनतर्फ रोकिएका छन्,’ आयोजना प्रमुख अधिकारीले भने, ‘सरकारले १ भदौबाट अन्तर्राष्ट्रिय उडान सुचारु गर्ने निर्णय गरेकाले भदौको पहिलो हप्तासम्म चिनियाँ दक्ष प्राविधिक आएपछि कामको गति अझै बढ्ने छ ।’

उनका अनुसार विमानस्थलका लागि आवश्यक केही सामग्री पनि चीनमै रोकिएकाले १ भदौपछि आउने छ ।

टर्मिनल भवनमा प्रयोग गरिने ब्यागेज ह्याण्डलिङ सिस्टम, सञ्चार उपकरण र कन्भेयर बेल्ट, धावन मार्गका लागि आवश्यक लाइट लगायतका उपकरण ल्याउन बाँकी रहेको र उडान सुरु हुनासाथ ल्याइने आयोजना प्रमुख अधिकारीले जानकारी दिए ।

अहिले भइरहेका कामदारले विमानस्थलमा टायल विछ्याउने, कन्ट्रोल टावर, टर्मिनल भवनमा फिनिसिङ र उपकरण जडान, विद्युतीकरण, भवन फिनिसिङको काम गरिरहेका छन ।

त्यस्तै, धावन मार्गमा मार्किङको सकिएको छ भने लाइटिङको फाउन्डेसन तयार गरी लाइट जडानको तयारी भइरहेको आयोजना प्रमुख अधिकारीले जानकारी दिए ।

फायर भवनको फिनिसिङको काम अन्तिम चरणमा पुगेको छ भने जहाज र ट्याक्सी पार्किङ स्थलको सिभिलतर्फको काम सकिएर विद्युतीकरणको काम सुरु भएको छ । धावन मार्गको वरीपरी पेरिमिटर सडक निर्माणको काम सुरु भइसकेको आयोजना प्रमुख अधिकारीले बताए ।

हालसम्म विमानस्थल निर्माणको काम ९१ प्रतिशत सम्पन्न भएको आयोजना कार्यालयको दाबी छ । २०१५ बाट निर्माण सुरु भएको विमानस्थल निर्माणको काम पटकपटक थपेर गत ३१ मार्चसम्म सम्पन्न गर्ने लक्ष्य लिइएको थियो ।

अझै ९ प्रतिशत काम सम्पन्न हुन ५ महिनाभन्दा बढी समय लाग्ने आयोजनाको अनुमान छ । अधिकारीका अनुसार कोरोनाको अवस्था हेरेर आयोजानको म्याद थप हुने बताए ।

कुनै बेला सुस्त गतिमा काम भइरहेको गौतमबुद्ध विमानस्थल निर्माणको काम तत्कालिन रवीन्द्र अधिकारी पर्यटनमन्त्रीमा नियुक्त भएपछि तीव्र गतिमा बढेको हो ।

६ अर्ब ८२ करोडको लगानीमा सम्पन्न हुन लागेको आइसीबी-१ स्तरको सो विमानस्थल आयोजनामा एडिबीको ४० दशमलव ५ प्रतिशत ऋण तथा १८ प्रतिशत अनुदान, ओपेक फन्ड फर इन्टरनेसनल डेभलपमेन्ट्सको ३० दशमलव पाँच प्रतिशत ऋण र नेपाल नागरिक उड्डयन प्राधिकरणको ११ प्रतिशत लगानी छ ।

यस्तै, आइसिबी-२ अन्तरगत विमानस्थलमा जडान हुने उपकरणहरूका लागि पनि करिब ५० करोड लगानी छ ।

प्रकाशित मिति: शुक्रबार, साउन ९, २०७७ ०९:२२